Вы будзеце смяяцца, але, напярэдадні суду аб ліквідацыі газеты, «Наша Ніва» атрымала новае папярэджанне.
Вы будзеце смяяцца, але, напярэдадні пачатку працэсу аб ліквідацыі газеты, «Наша Ніва» атрымала новае папярэджанне. Яго сёння спешна з кур’ерам даставілі ў рэдакцыю пасля 17.00, а пасля яшчэ даслалі факсам з Міністэрства інфармацыі.
Гэтым разам міністэрства пільна ўгледзелася ў выходныя звесткі нумару «НН» ад 1 чэрвеня 2011 года і заўважыла, што там, у парушэнне арт.22 Закону аб СМІ, не ўказаны падпісны індэкс!
Зазвычай «НН» друкуе падпісныя індэксы на старонцы 2, у блоку інфармацыі для чытачоў. Таму і захапляе пільнасць позірку спецыялістаў ідэалагічнага ведамства: той нумар быў АДЗІНЫМ, дзе блоку з індэксамі не было. На яго месцы стаяў артыкул «Вышэйшы гаспадарчы суд адкрыў дарогу да закрыцця «Нашай Нівы».
Паводле цяперашняга беларускага заканадаўства ў галіне СМІ нават такая фармальная прычэпка можа пацягнуць за сабой закрыццё выдання. І прэцэдэнты ўжо былі: так, газету «Згода» ліквідавалі за тое, што ў выходных звестках не было пазначанае поўнае імя галоўнага рэдактара. Падобнага характару прэтэнзіі выклікалі рэпрэсіўныя меры супраць часопіса ARCHE, газеты «Салідарнасць».
На думку юрыстаў, у выпадку «НН» Міністэрства інфармацыі так перастрахоўваецца. Паводле заканадаўства, можна ліквідаваць выданне, калі яно мае два і болей папярэджанні. Тым часам 22 і 26 ліпеня сканчаецца тэрмін дзеяння двух папярэджанняў, атрыманых «НН» летась за публікацыі звязаныя з фільмам «Хросны бацька». А 14 ліпеня пройдуць тры месяцы ад моманту атрымання апошняга папярэджання, цягам якіх, паводле заканадаўства, газету можна зачыніць. І калі не ўдасца ліквідаваць «НН» у бліжэйшы час, новае папярэджанне будзе нагодай распачаць новую справу аб ліквідацыі.
Дарэчы, дамоклаў меч Праляскоўскага вісіць і над дзяржаўнай газетай «Рэспубліка», заснаванай Саветам міністраў: у яе выходных звестках таксама няма падпісных індэксаў:
Але штосьці не было чуваць, каб «Рэспубліку» каралі за гэта.
-
Ціханоўскі і Пятрухін распаўсюдзілі новую лабуду: што палітвязень Папоў атрымаў 16 гадоў турмы з-за публікацыі «НН»
-
Беларускі музей імя Івана Луцкевіча рыхтуе выставу да 120‑годдзя «Нашай Нівы» і просіць дапамагчы з экспанатамі
-
Хто ведае больш — той абаронены. Калі вы цэніце працу «НН», падтрымайце нас праз Патрэон
Цяпер чытаюць
Брат беларускай каралевы прыгажосці трапіў у рэанімацыю ў Азербайджане6
Каментары