Беларуская чыгунка ў найбліжэйшыя пяць гадоў плануе цалкам электрыфікаваць беларускі ўчастак Міжнароднага транспартнага калідора IXB,
паведамілі карэспандэнту БелТА ў
прэс-службе БЧ.
Беларуская чыгунка вядзе актыўную працу па электрыфікацыі чыгуначных ліній. Работы па электрыфікацыі ўчасткаў у рамках IX транспартнага калідора пачатыя ў гэтым годзе. Цяпер рэалізуецца першы этап праекта — электрыфікацыя на ўчастку Жлобін — Асіповічы. Сумесна з Літоўскімі чыгункамі будзе электрыфікаваны кірунак Маладзечна — Гудагай — дзяржмяжа — Кяна — Н. Вільня. «Такім чынам, у найбліжэйшыя пяць гадоў плануецца цалкам электрыфікаваць беларускі ўчастак адгалінавання Міжнароднага транспартнага калідора IXB», — адзначылі ў прэс-службе. Гэта дасць магчымасць арганізаваць на дадзеных участках рух цягнікоў на электрацязе, што будзе садзейнічаць павышэнню канкурэнтаздольнасці перавозак, прыцягненню дадатковых транзітных патокаў у напрамку Поўнач-Поўдзень, палепшыць экалагічную абстаноўку.
Значныя аб’ёмы інвестыцый БЧ накіроўвае сёння і на развіццё інфраструктуры — павелічэнне прапускной здольнасці чыгуначных участкаў, рамонт шляхоў, будаўніцтва валаконна-аптычнай лініі сувязі, павышэнне хуткасцяў руху. У 2011 годзе Беларуская чыгунка адрамантуе 576,6 км шляхоў. З іх на 207,6 км прадугледжаны аднаўленчы рамонт, пры якім будзе цалкам абноўленае чыгуначнае палатно. На астатніх 369 км правядуць сярэдні рамонт, падчас якога ўчасткі шляхоў будуць мадэрнізаваныя. У 2010 годзе ў выніку правядзення рамонтна-дарожных працаў мадэрнізавана 534,1 км чыгуначных шляхоў. Дзякуючы гэтаму павялічылася хуткасць пасажырскіх цягнікоў, у тым ліку на асобных участках напрамкаў Мінск — Брэст — да 140 км/г, Калінкавічы -Лунінец — да 120 км/г, Баранавічы — Ліда — да 100 км/г.
Каментары