«Расіяне хочуць замяніць мяне». Зяленскі выказаўся пра выбары і перамір'е
Прэзідэнт Украіны заявіў, што калі будзе хаця б двухмесячнае перамір'е, ён гатовы правесці выбары прэзідэнта, але Расія хоча яго замяніць. Пра гэта Уладзімір Зяленскі выказаўся брытанскаму журналісту Пірсу Моргану, піша РБК-Украіна.
«Думаю, нашы партнёры павінны адказаць на адно пытанне: чаго яны хочуць? Яны хочуць выбараў ці проста хочуць замяніць мяне? Бо, як я думаю, рускія проста хочуць замяніць мяне. І тады яны выкарыстоўваюць тое, пра што вы казалі раней — фізічная ліквідацыя або іншыя крокі», — сказаў прэзідэнт.
Зяленскі падкрэсліў, што ніколі не будзе адкідваць прапановы ЗША, калі яны могуць прынесці Украіне мір. Таму калі будзе нават двухмесячнае перамір'е, ён гатовы гаварыць з парламентам і падштурхнуць да рашэння, якое цяпер дэпутаты не падтрымліваюць.
«І нават людзі не падтрымліваюць правядзенне выбараў падчас вайны. Бо нават калі ў вас будзе двухмесячнае перамір'е, гэта не азначае заканчэння вайны. Але нават у такім выпадку — калі перамір'е будзе толькі на два месяцы — магчыма, можна будзе падпісаць нейкія дакументы або правесці рэферэндум, і людзі прымуць мір. Я зраблю ўсё магчымае, я пагавару з парламентам. Яны зменяць закон, спадзяюся», — заявіў кіраўнік дзяржавы.
Таксама ён распавёў, што расіяне падчас размовы з амерыканцамі кажуць, што на іх думку, выбары ва Украіне можна правесці за тыдзень-два. Аднак у РФ забываюць, «што мы не Расія».
У Вярхоўнай Радзе ёсць розныя партыі, але нават падчас вайны ў іх розныя пазіцыі наконт многіх законаў і мноства пытанняў. Таму немагчыма проста «націснуць» і нельга «зламаць» парламент. Трэба казаць і мець рэальныя падставы, чаму выбары трэба праводзіць проста цяпер.
Рэзюмуючы Зяленскі дадаў, што папрасіў ЗША спыніць Уладзіміра Пуціна на некалькі месяцаў дзеля выбараў. Калі гэта будзе, тады ён згодны правесці выбары.
Каментары