Пайшлі чуткі, што з беларускіх заправак знікне бензін АІ-92. У «Белнафтахіме» патлумачылі
Апошнім часам у сеціве аўтамабілісты актыўна каментуюць пытанне магчымага знікнення з беларускіх АЗС бензіну АІ-92. Ці сапраўды гэтага варта чакаць, пракаментаваў старшыня канцэрна «Белнафтахім» Ілля Ікан, піша БелТА.
Па словах Іллі Ікана, пакуль гаворкі пра хуткае знікненне 92‑га бензіну няма, аднак тэндэнцыя да змены структуры спажывання сапраўды існуе.
Статыстыка паказвае, што попыт на АІ-92 паступова зніжаецца, а ўсё больш кіроўцаў выбіраюць АІ-95 і паліва з яшчэ вышэйшым актанавым лікам. Асабліва гэта прыкметна ў Мінску і Мінскай вобласці, дзе доля АІ-95 ужо дасягае 70—80% ад агульнага аб’ёму спажывання бензіну.
Кіраўнік канцэрна адзначыў, што сучасны аўтапарк у Беларусі становіцца больш тэхналагічным: многія аўтамабілі абсталяваныя турбіраванымі і высокафарсіраванымі рухавікамі, якія патрабуюць якаснага высокаактанавага паліва. Адпаведна, вытворцы павінны рэагаваць на патрэбы рынку.
На беларускіх нафтаперапрацоўчых заводах ужо рэалізуюцца інвестпраекты па вытворчасці высокаактанавых дабавак. На адным прадпрыемстве праект ужо ўкаранёны, на другім — пачынаецца. Гэта дазволіць забяспечыць рынак бензінам АІ-95, АІ-98 і нават АІ-100 у дастатковай колькасці.
Разам з тым Ілля Ікан падкрэсліў, што ў найбліжэйшыя гады АІ-92 застанецца ў продажы. Як мінімум да 2030 года, па яго словах, гэты від бензіну не знікне з беларускіх заправачных станцый, бо значная частка аўтамабіляў па-ранейшаму разлічаная менавіта на яго.
Пры гэтым у доўгатэрміновай перспектыве структура «бензінавага кошыка» можа змяніцца на карысць больш высокаактанавых марак — АІ-95, АІ-98 і АІ-100.
Цяпер чытаюць
ДФР кашмарыць транспартнікаў: у вялікіх лагістычных аператараў крымінальныя справы, вобшукі і арышты17
Каментары