Калі прадавец адмовілася завярнуць каўбасу ў бясплатны цэлафан, ён звярнуўся ў суд.
— Я рады, што суддзя вынес менавіта такое рашэнне. Справа ж не ў грашах, а ў прынцыпе. Як пакупнік я хачу, каб мае правы заўсёды выконваліся, — кажа «Камсамолцы» мінчанін Сяргей Мядзведзеў.
Справу суд Баранавічаў разглядаў у панядзелак. Пакупнік патрабаваў ад мясцовай крамы «Дружба» заплаціць яму 40 000 маральнай шкоды. Сяргея абурыла, што пры куплі каўбасы прадавец адмовілася заварочваць яе ў бясплатны цэлафан і прапанавала купіць пакуначак за 20 рублёў. Здавалася б, дробязь, але толькі не для Мядзведзева. Ён тут жа запатрабаваў кнігу заўваг і прапановаў, а потым звярнуўся ў суд.
— Гэты пазоў вельмі незвычайны, але мы яго прынялі да разгляду. У гісторыі нашага суда гэта першы выпадак, каб пакупнік патрабаваў 40 тысяч за бясплатную ўпакоўку.
З аднаго боку, дробязь, але з іншага боку, калі б кожны быў такі прынцыповы, то гандаль працаваў бы як належыць,— пракаментаваў старшыня суда Баранавіцкага раёна і г. Баранавічы Мікалай Кміта.
Праўда, суд абавязаў краму выплаціць не 40 тысяч, а 20.
— Гэты пакупнік юрыст па адукацыі, і нам здалося, што з яго боку гэта нейкая гульня. Так, прадавец не мела рацыі, у яе скончылася упаковачная плёнка, і замест таго каб схадзіць па яе, яна прапанавала пакет за 20 рублёў. За гэта яе пазбавілі прэміі ў памеры 60 тысяч, — кажа дырэктар крамы Дзіна Богуш.
У краме разумеюць, што прадавец не меў рацыі, але і ўпартасці пакупніка дзівяцца. Маўляў, розныя бываюць сітуацыі ў жыцці, і замест таго каб паспрабаваць дамовіцца, ён пайшоў у суд. Скрупулёзнага Сяргея Мядзведзева ведаюць многія прадаўцы ў раёне, дзе ён жыве.
Мужчына ўжо 25 (!) разоў высвятляў адносіны з гандлем, праўда, не ўсе выпадкі даходзілі да суда.
— Я сам жыву ў Мінску, але часта езджу ў камандзіроўкі па краіне і заўсёды звяртаю ўвагу на работу крамаў. Раз існуюць пэўныя нормы, то чаму прадаўцы іх ігнаруюць? Часам за парушэнні я выстаўляў рахунак у 30 тысяч, часам — 200 тысяч. Калі бачыў, што дырэктар бязбольна на гэта рэагаваў і прасіў прабачэння, то вяртаў гэтыя грошы, — кажа Сяргей Мядзведзеў. — Але самае крыўднае, што сёння, да прыкладу, разбіраешся з прадаўцом праз пакет, яна, здаецца, усё разумее, а на наступны дзень прыходзіш, і іншы прадавец робіць тое самае, гэта значыць адмаўляецца заварочваць каўбасу ў пакет.
Каментары