Дзіцячы садок у Зялёным Лузе аддалі іранцу пад офісны будынак

Закінуты дзіцячы садок на вуліцы Мірашнічэнкі часам служыў прытулкам для бадзягаў, беспрытульнікаў і п’яных кампаній. Але некалькі месяцаў таму на браме з’явіўся замок, а за 2-павярховым будынкам пачаў наглядаць вартаўнік. Садок адновяць, падумалі было мясцовыя жыхары, але памыліліся. Учора на сустрэчы з інвестарам і чыноўнікамі яны даведаліся, што струхлелы будынак пераробяць у офісны цэнтр. Здавалася б, таксама нядрэнная навіна — што б там ні рабілі, а адной ганебнай плямай на карце Мінска стане менш. Аднак у жыхароў Зялёнага Лугу іншае меркаванне. «Навошта нам офісы? — абураныя яны. — Хто паклапоціцца пра нашых дзяцей?»

Дзіцячы садок на Мірашнічэнкі, 41 закрылі ў 1998 годзе, з таго часу будынак не эксплуатуецца. У 2002-м яго вывелі з разраду дашкольных установаў, пасля чаго 2-павярховы будынак некалькі разоў мяняў уласнікаў. У снежні 2010-га яго выкупіў іранскі інвестар, які зарэгістраваў у Беларусі ЗТАА «Бел Стэла Інвест».

Сёння былы дзіцячы садок выглядае змрочна. Будынак ахоўваюць вартаўнік і дзве сабакі. Унутры ўжо пачаліся працы.

Не павялічваючы колькасць паверхаў будынка, інвестар збіраецца абсталяваць у ім 80 офісных памяшканняў, у якіх размесціцца кампанія «Бел Стэла Інвест». Побач прадугледжваецца стаянка на 56 машын.

Падчас учорашняй прэзентацыі праекта, якая адбылася ў актавай зале школы № 34, прадстаўнікі інвестара сказалі, што ўсё ўжо гатова да аднаўлення. Паводле іх словаў, капітальны рамонт сувымерны з будаўніцтвам новага будынка і павінен завяршыцца да канца 2012 года.

— Што атрымаюць жыхары раёна ад рэалізацыі праекта?

— Усё гэта нам не трэба. Адкажыце мне, дзеду, на пытанне: чаму мая ўнучка вымушаная дабірацца ў дзіцячы садок з дзвюма перасадкамі? — звярнуўся да прадстаўнікоў адміністрацыі Савецкага раёна пажылы чалавек.

Яго словы тут жа падтрымала зала.

— З садкамі ў раёне бяда. Дзяцей у мяне трое, ніводнага не магу ўладкаваць побач з домам, — падышла да мікрафона шматдзетная маці. — Нам прапануюць дзіцячы сад на вуліцы Якуба Коласа. А хочаш у сваім раёне, дык дырэктар без праблем абяцае вырашыць пытанне. Але за 700 тысяч рублёў! Доўга такое будзе працягвацца ў нашай краіне?

Першы намеснік кіраўніка адміністрацыі Савецкага раёна Аляксандр Шклярык паспрабаваў пасадзіць жанчыну на месца, але так і не расказаў, калі і дзе будуць будавацца новыя садкі, не адказаў, чаму ў 2002 годзе будынак вывелі з падпарадкавання Мінадукацыі. Пытанні гэтыя, маўляў, сёння не разглядаюцца.

— У адпаведнасці з палажэннем аб правядзенні грамадскіх абмеркаванняў, нашая мэта — праінфармаваць вас наконт праекта, — растлумачыў ён. — Для вашых меркаванняў і заўваг існуе адмысловая скрыня. Напісаць прапанову можна цяам двух тыдняў.

— Не будуць нам будаваць новыя садкі. Хіба ў горада ёсць на тое грошы, калі дзейныя садкі падтрымліваюцца на паборах з бацькоў? Дай грошы то на новую плітку і шпалеры, то на ўнітазы, — выказаўся нехта з залы.

Аляксандр Шклярык запярэчыў:

— Перш чым сцвярджаць такое, пакажыце рахункі, што вы плацілі грошы за гэта.

У неабходнасці праекта паспрабаваў пераканаць жыхароў раёна намеснік дырэктара ЗТАА «Бел Стэла Інвест» Хедыяці Німа.

— Мне стала сорамна за Беларусь, калі я гэты будынак убачыў, — сказаў ён і паабяцаў ператварыць тэрыторыю ў прыгожае і добраўпарадкаванае месца.

У той жа час іранскі бізнэсовец адчувае і пачуццё расчаравання: — Да прыходу ў Беларусь я думаў, тут усё вырашаецца проста: купляем і будуем. Але гэта аказалася не так. Паўтара года цягнуцца ўзгадненні. Мы ўвайшлі «у мінус», цікавасць да вядзення бізнэсу ўжо не тая.

Большасць жыхароў Зялёнага Лугу, што сабраліся ў школьнай актавай зале, выказаліся супраць рэканструкцыі і папрасілі «вярнуць усё як было», гэта значыць адрадзіць дзіцячы садок. Натуральна, меркаванне двух дзясяткаў чалавек яшчэ ні пра што не кажа. Пісьмовыя заўвагі і прапановы да 1 мая можна накіраваць альбо ў адміністрацыю Савецкага раёна (вул. Дарашэвіча, 8) з пазнакай «грамадскае абмеркаванне» альбо пакінуць па месцы размяшчэння экспазіцыі (актавая зала школы № 34 па вул. Мірашнічэнкі, 35) у спецыяльнай скрыні.

• 0
• 0
• 0
• 0
• 0
• 0
• 0
• 0