Прэзідэнт Еўрапарламента заклікаў Лукашэнку правесці рэформы і вызваліць усіх палітвязняў
Прэзідэнт Еўрапейскага парламента Марцін Шульц заклікаў Аляксандра Лукашэнку правесці ў Беларусі палітычныя рэформы і вызваліць усіх палітзняволеных. Пра гэта Шульц заявіў 10 верасня, адкрываючы сесію ЕП у Страсбургу.
«З вялікай заклапочанасцю мы назіраем за тым, як працягваецца парушэнне правоў чалавека, вяршэнства закона і дэмакратычных каштоўнасцяў у Беларусі, — сказаў Шульц. — Я вельмі занепакоены апошнімі падзеямі ў краіне, у тым ліку забаронай на выезд некаторым лідарам апазіцыі і праваабаронцам, а таксама законамі, якія пашыраюць паўнамоцтвы КДБ, і нядаўнім выдварэннем шведскага пасла».
Шульц падкрэсліў, што першым крокам беларускіх улад павінна быць неадкладнае і безумоўнае вызваленне ўсіх палітзняволеных у краіне і іх поўная рэабілітацыя.
«Далейшае ўтрыманне пад вартай Алеся Бяляцкага, Мікалая Статкевіча, Паўла Севярынца, Сяргея Каваленкі, Дзмітрыя Дашкевіча і іншых палітзняволеных з’яўляецца непрымальным. Мы не забыліся!» — заявіў кіраўнік Еўрапарламента.
Ён заклікаў афіцыйны Мінск забяспечыць правядзенне парламенцкіх выбараў, якія адбудуцца 23 верасня, «з павагай міжнародных стандартаў, каб усе кандыдаты мелі роўныя шансы і каб назіральнікі АБСЕ маглі свабодна выканаць сваё заданне».
Цяпер чытаюць
Амаль усе чаты і суполкі калоній і СІЗА Беларусі прызналі экстрэмісцкімі фармаваннямі. Пад пагрозай тысячы чалавек4
Каментары