На кампакт‑дыску ў фармаце мр3 прафэсыйны дыктар Леанід Дзяркач начытвае славутую аповесьць Арлова «Час чумы».
 |
Раней на дысках ужо выйшлі творы «1984» ды «Ферма» Джорджа Оруэла ў перакладзе на беларускую мову, а таксама зборнік «Беларускія народныя казкі». Аповесць «Час чумы» — першы аўтарскі твор, выдадзены ў аўдыёфармаце.
— Я даўно думаў пра гэта, ‑‑ прызнаецца Ўладзімер Арлоў. — Бо ў наш час людзі, асабліва маладыя, больш слухаюць, чым чытаюць. Але ўсё не даходзілі рукі. Канчаткова мяне пераканаў выпадак у басэйне. Я доўга назіраў, як на суседняй дарожцы плавае хлопец з плэерам — нейкім сучасным, вадастойкім. А калі я запытаўся, якую ж ён музыку слухае, дык пачуў, што ён слухае… кніжкі! Тады я вырашыў, што пара і мне выдаваць.
У плянах пісьменьніка — сваім голасам начытаць кніжку для дзетак «Адкуль наш род»; гістарычны бэстсэлер «Таямніцы полацкай гісторыі», які вытрымаў ужо 4 перавыданьні; падарожныя нататкі «Сланы Ганібала», а таксама вядомую аповесьць «Ордэн белай мышы». Праца нялёгкая, бо чытаньне ўголас аднае кніжкі цягнецца прыкладна 20 гадзін. Але, як лічыць Арлоў, гэта вартая справа, бо цяпер да беларускага слова людзі змогуць зьвярнуцца і ў аўто, і проста ідучы па вуліцы.
Для аматараў традыцыйнага чытаньня спадар Арлоў адчыніў сайт, дзе можна спампаваць многія тэксты.
Каментары