У Баранавічах памерла вядомая польская грамадская дзяячка ў Беларусі Альжбета Далэнга-Ужосак, паведаміла былая кіраўніца Саюза палякаў у Беларусі Анжаліка Борыс. Ёй было 95 гадоў.
«Год таму, 31 сакавіка, я была ў спадарыні Эльжбеты ў Баранавічах. Яна была заснавальніцай Польскай грамадскай школы імя Тадэвуша Рэйтана ў Баранавічах — першай адукацыйнай установы такога тыпу на Беларусі. Вельмі заслужаны чалавек для польскасці ў Беларусі», — напісала Анжаліка Борыс.
Альжбета Далэнга-Ужосак нарадзілася 7 верасня 1930 года ў горадзе Млава недалёка ад Варшавы, аднак дзяцінства і маладосць правяла ў Баранавічах, дзе наведвала польскую пачатковую школу імя Марыі Канапніцкай (ліквідаваную пасля Другой сусветнай вайны).
У 1954 годзе яна паступіла на лінгвістычны факультэт (германістыка і раманістыка) у Інстытут замежных моў у Мінску. У 1960‑я гады зноў пасялілася ў Баранавічах, дзе працавала настаўніцай.
У 1980‑я гады стаяла ля вытокаў польскага нацыянальнага адраджэння ў горадзе і Баранавіцкім раёне. З яе ініцыятывы ў Баранавічах была створана грамадская польская школа (пазней імя Тадэвуша Рэйтана), а сама яна стала яе дырэктаркай. Заняткі першапачаткова праходзілі ў яе доме. Жанчына доўгі час кіравала гарадскімі і раённымі структурамі Саюза палякаў у Беларусі.
Маці Альжбеты, Тарэса Далэнга-Ужосак, у вайну ратавала ад нацыстаў яўрэяў і атрымала ад Ізраіля званне праведніцы народаў свету. Тарэса Селівончык, дачка Альжбеты, працягнула справу маці, пераняўшы ад яе дырэктарства ў польскай школе ў Баранавічах і кіраванне мясцовай філіяй СПБ.
Цяпер чытаюць
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі4
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары