Узбуджаны плённым ужываньнем «Крамбамбулі», Сяргей Міхалок праяўляе ўсё большую актыўнасьць. Днямі, адначасна ў Беларусі, Расеі й ва Ўкраіне, выходзіць чарговы альбом «Ляпіса Трубяцкога», назва якога — «Золотые яйцы» — яўна заснаваная на гульні філялягічнымі штучкамі. У альбоме дзьве новыя беларускамоўныя песьні.
Старая песьня — «Любові капец» з самай першай праграмы гурту — перазапісаная з удзелам біг-бэнду МУС. На загалоўную песьню альбому адзьняты пацешны кліп.
Але Міхалку гэтага мала. Ён у вобразе Сірожы разам з сваім хаўрусьнікам Сашам днямі расьсьмяшыў усю Ўкраіну. Этэр захапілі татальна: іх галасы чуваць на дзьвюх радыёстанцыях ды яшчэ на адным тэлеканале. Стылістыка ўсё тая ж — адно што ўстаўляюць час ад часу дзеля жоўта-блакітнага слаўца і тамтэйшыя выразы. «Опэра для лянівых», кажуць, пайшла ва Ўкраіне на «ўра». Там Саша і Сірожа, пэўна, на зразумелай мове растлумачаць, чаму паказ гэтай опэры не дазволілі ў беларускім этэры.
А іх прадусар Яўген Калмыкоў нядаўна быў заўважаны ў адной з музычных крамаў за ганебным учынкам: ён яўна хацеў набыць альбом групы «Краски». Аднак своечасова заўважыў гнюсных папарацы і з словамі «Шкада, але грошай з сабой ня маю» змушаны быў паставіць дыск на палічку… Так яму і паверылі!
Адам Лепель
Цяпер чытаюць
Беларуска, уласніца рэстарана ў Батумі, апынулася ў цэнтры скандалу з сабакамі14
Каментары