Зь верасьнем у Эўропу прыходзіць новы спартовы сэзон.
Футбольная матухна-Эўропа адпачыла ад чэмпіянату кантынэнту ды Алімпіяды і 4 верасьня пачала кваліфікацыйны адбор да чэмпіянату сьвету-2006.
Беларусы стартавалі 8 верасьня гасьцявой нічыёй з нарвэжцамі. Каб трапіць на мундыяль у Нямеччыну, трэба як мінімум заняць другое месца ў сваёй групе. З наймацнейшай і найслабейшай зборнымі падгрупы — Італіяй і Малдовай — згуляем якраз у кастрычніку. Дарэчы, у кваліфікацыі да Эўра-2004 мы занялі апошняе месца, прапусьціўшы наперад менавіта Малдову. Беларуская фэдэрацыя футболу, каб заахвоціць «дарослых» гульцоў, паабяцала выплаціць нацыянальнай зборнай пры ўмове выхаду на мундыяль-2006 1 млн 200 тыс. даляраў.
Грошы і спорт — рэчы непадзельныя. Вось перад гульнёй са зборнай Грэцыі прэм’ер-міністар Альбаніі паабяцаў сваім футбалістам у выпадку перамогі 500 тыс. даляраў. Альбанцы перамаглі чэмпіёнаў Эўропы — 2:1. Праўда, перамога над адвечнымі палітычнымі супернікамі была азмрочана грэцкімі заўзятарамі. Яны ўчынілі ў раёнах, дзе пражывае альбанская меншасьць, пагромы.
Каб у нас дбалі яшчэ пра клюбны футбол! Калі ў вышэйшай лізе яшчэ нейкі парадак, то ў першай — суцэльныя праблемы. Возьмем, напрыклад, «Маладэчна». Летась клюб чакана выбыў у першую лігу. З сыходам з гораду ў пачатку 90-х Генадзя Карпенкі пачаліся пэрманэнтныя фінансавыя праблемы. Так і цяпер. У міжсэзоньне частка гульцоў з каманды разьбеглася. Пачалі зьбіраць непатрэбных іншым клюбам футбалістаў. Першы круг у гэтым сэзоне «Маладэчна» скончыла на трэцім месцы. Але пачаліся затрымкі з выплатай заробку: у ліпені футбалістам не заплацілі нават за травень. Паўтара дзясятка гульцоў сышлі з каманды, і давялося заяўляць 16-гадовых юнакоў са спартшколы. Хатнія паядынкі каманда праводзіць у вёсцы Чысьць, што за 20 км ад Маладэчна, таму пахварэць за ўлюбёны клюб могуць зьезьдзіць самыя апантаныя. Трэніруецца каманда ў вайсковай часьці, з пачатку сэзону не набыла ніводнага мяча і мае толькі адзін камплект формы. Пра якія тады дасягненьні можа ісьці гаворка? Тут бы ў другую лігу ня вылецець. Атрымалі пяць запар паражэньняў з буйным лікам.
Поўнасьцю гэты артыкул можна прачытаць у папяровай і pdf-вэрсіі "Нашай Нівы"
Алег Раявец
Цяпер чытаюць
Што вядома пра жанчыну, якая загінула ў аўтобусе, што вёз беларускіх футбалістаў-школьнікаў у Геленджык?18
Каментары