«Людзі пыталіся, ці будзе грахом прышчапляцца». Што альшанскі пастар кажа пра вакцынацыю?
У 8-тысячнай вёсцы Альшаны за ўвесь час працы пункта вакцынацыі прышчапіўся толькі адзін чалавек, і той — з іншай вёскі. Мабільны пункт у выніку закрылі. Нежаданне вакцынавацца мясцовая раёнка звязала з рэлігійнымі перакананнямі мясцовых жыхароў, якія лічаць, што вакцына «ад нячыстага». А што кажа альшанскі пастар? «Наша Ніва» звязалася з ім.
«Няпраўда, што мы пераконваем людзей не прышчапляцца. У царквы няма прадузятасці. Мы не вучым: маўляў, гэта грэх, не ідзіце, — адказаў пастар царквы хрысціян веры евангельскай Васіль Сімановіч. — У нас стаўленне такое — гэта права кожнага чалавека. І калі чалавек лічыць патрэбным прышчапіцца — ніякіх праблем з нашага боку няма.
Да мяне звярталіся людзі па парады. Казалі некаторыя, што іх прымушаюць прышчапляцца на працоўных месцах. Пыталіся: як вы лічыце, ці будзе грахом прышчапляцца? Я даў такі адказ: ні ў якім разе, можаце смела вакцынавацца.
А з іншага боку, схіляць людзей мы не маем права — ні з аднаго, ні з іншага боку. Гэта не рэлігійнае пытанне — пытанне выключна здароўя людзей. І кожны мае права на сваё меркаванне. Але забароны на рэлігійнай глебе няма».
Па словах пастара, у Альшанах усё ж ёсць некалькі вакцынаваных. Сваякі яго, напрыклад, рабілі прышчэпку, але не ў мабільным пункце. Сам пастар яшчэ не вакцынаваўся.
На трансляцыях з апошніх службаў бачна, што прыхаджане ў царкве носяць маскі.
Чытайце таксама:
«Даводзілася выбіраць, аддаць прэпарат пажылому пацыенту ці пакінуць для больш перспектыўнага». Былая доктарка пра жахлівае закуліссе эпідэміі
«Нават яго прыхільнікі зразумелі, што жыць як раней ужо не атрымаецца». Беларусы расказалі пра атмасферу ў краіне напярэдадні выбараў6
Каментары