Decentralizacyja ŭłady
Švedzki urad pryniaŭ rašeńnie pra dalejšuju hieahrafičnuju decentralizacyju ŭłady. Nacyjanalnaje telebačańnie ŭžo pracuje ŭ paŭnočnym Umeo. Na praciahu nastupnaha hodu jašče 16 dziaržaŭnych ustanoŭ pierajeduć u pravincyjnyja centry na poŭdni i poŭnačy krainy. Robicca heta ŭ adpaviednaści z pryncypami demakratyi (prava narodu na ŭdzieł va ŭładzie). Ličycca, što ŭ čas roskvitu Internetu niama patreby kancentracyi ŭsich słužboŭcaŭ u adnym miescy. Adnačasova ličycca, što pierajezd pavialičyć kolkaść pracoŭnych miescaŭ u hłybincy i nadaść vahi tutejšym haradam.
Andrej Katlarčuk, ułasny karespandent «NN» u Stakholmie
U Estonii vybary praź Internet
Estoncy zmohuć hałasavać padčas nastupnych vybaraŭ praź Internet, nie vychodziačy z chaty. Pastanovu pra toje pryniaŭ parlament krainy. Kali ŭ Talinie padčas vosieńskich miascovych vybaraŭ systema spracuje biezzahanna, dyk jana budzie vykarystanaja ŭ časie parlamenckich vybaraŭ — 2007.
Kab prahałasavać, vybarščyku nieabchodna budzie mieć paśviedčańnie asoby z elektronnaj mikraschiemaj, admysłovy skaner i złučeńnie z «suśvietnym pavucińniem». Svaju asobu vybarščyk paćvierdzić, praciahnušy paśviedčańnie praz skaner. Pavodle papiaredniaha rašeńnia, hałasavańnie praź Internet budzie adbyvacca pamiž šostym i čaćviortym dniami pierad zvyčajnymi vybarami. Kali niechta, prahałasavaŭšy praź Internet, paśla pryjdzie na vybarčy ŭčastak i prahałasuje tradycyjnym čynam, dyk u takim razie budzie ŭličvacca tolki hety druhi hołas. Takim čynam ułady miarkujuć zaścierahčysia ad niebiaśpieki taho, što niechta prymusić vybarščyka prahałasavać doma za peŭnaha kandydata.
Ad časoŭ adnaŭleńnia niezaležnaści estoncy zrabili staŭku na raźvićcio zvyšnovych technalohij. Štohod na hetyja mety ź dziaržbiudžetu vydatkoŭvajecca bolš za 1% srodkaŭ. Siońnia dostup da Internetu ličycca ŭ Estonii adnym z asnoŭnych pravoŭ usich hramadzianaŭ. Stvorana sietka biaspłatnych punktaŭ dostupu, u tym liku ŭ haradzkich biblijatekach. U sietcy ŭrad ładzić hramadzkaje abmierkavańnie prajektaŭ pastanoŭ, a hramadzianie mohuć prapanoŭvać svaje prajekty pastanoŭ dy zakonaŭ uradu j parlamentu. Pry dapamozie Internetu možna padavać usie prašeńni j aficyjnyja dakumenty. Sam urad pracuje vyklučna z elektronnymi dakumentami, a pasiadžeńni Kabinetu ministraŭ adbyvajucca pierad ekranami kamputaraŭ.
Ciapier čytajuć
U Biełarusi znajšli kopiju šviejcarskich Alpaŭ — ale turystaŭ tam nie čakajuć2
Kamientary