Udałaja vyprava

Sioletni šachmatny fest «Pardubicy-oŭpen» staŭ dla biełaruskich šachmatystaŭ samym paśpiachovym za ŭsiu historyju pajezdak u Čechiju.

Hrasmajstar Andrej Kavaloŭ zavajavaŭ čystaje pieršaje miesca ŭ hałoŭnym turniry, dastaŭšy pryz u 3000 dalaraŭ; jaho kaleha Siarhiej Azaraŭ apynuŭsia na trecim miescy. Vydatna vystupili ŭ turniry «A», dzie hulali 58 hrasmajstraŭ, taksama braty Žyhałki i Mikita Majoraŭ, jaki ni razu nie sastupiŭ svaim tytułavanym supiernikam (praŭda, zrabiŭ šeść ničyich u dzieviaci turach).

Najstarejšy ŭdzielnik turniru Ratmir Chołmaŭ, prajhraŭšy Andreju Žyhałku i zrabiŭšy ničyju ź Siarhiejem, pažartavaŭ: «Nu voś, ciapieraka ja praekzamenavaŭ usiu biełaruskuju šachmatnuju škołu». Sp.Chołmaŭ u peŭnym sensie sam naležyć da hetaj škoły: vydatny hrasmajstar, jaki ŭ 1950—1960-ja ŭvachodziŭ u suśvietnuju šachmatnuju elitu, doŭhi čas žyŭ u Miensku i vystupaŭ za Biełaruś. Paśla pierabudovy Chołmaŭ viarnuŭsia ŭ Rasieju. Uviesnu jamu spoŭniłasia 80, ale ŭ Pardubicach jon uźbiŭsia na «plus» — uziaŭ piać ačkoŭ ź dzieviaci.

Nadzieja Palivoda, čakajučy na zaćviardžeńnie ŭ FIDE tytułu mižnarodnaj majstarki, ledź nia vykanała ŭ Čechii i normu hrasmajstarskaha bału. A voś Rachili Ejdelson krychu nie pašancavała: jana vystupała ŭ pabočnym turniry i, pakazaŭšy dobry vynik (6,5 z 9), atrymała tolki «žanočy» pryz — dziesiać dalaraŭ. I tych na zakryćci nie chacieli davać, bo, praź niedahlad arhanizataraŭ, u kamputary nie było paznačana, što Rachil — žančyna! «Naleta pryjedu vyjhravać piatnaccać dalaraŭ», — paśmiajałasia viciablanka sa svaich pryhod.

Źmicier Łybin u Pardubicach pracavaŭ namieśnikam hałoŭnaha sudździ; pavodle jaho słoŭ, arhanizacyja turniru štohod źmianiajecca ŭ lepšy bok. Sioleta ŭdzielniki raźmiaščalisia ŭ prastornaj zali ladovaha pałacu, i dziakujučy tamu, što niedzie pad nahami vyparaŭsia lod, mienš pakutavali ad śpiakoty. Mo i biełaruski «oŭpen» pravieści na chakiejnaj placoŭcy?

Jak u Miensku, tak i ŭ Pardubicach hulcy byli papiaredžany ab zabaronie na vykarystańnie mabilnych telefonaŭ u zali. Na mienskim «oŭpenie» sudździ paškadavali parušalnika — mo tamu, što praviły FIDE dla biełaruskich šachmatystaŭ pakul u navinu. U Čechii trom udzielnikam, jakija ŭchitrylisia bomknuć telefonami, umomant zaličyli parazu.

• 0
• 0
• 0
• 0
• 0
• 0
• 0
• 0