Alaksandra Hierasimienia. Tryumfalnaje viartańnie ŭ płavańnie paśla padstavy

U junijorskim uzroście zorcy našaha sportu daviałosia prajści praź nievierahodnyja vyprabavańni.

Na Hulniach u Łondanie Alaksandra Hierasimienia zavajavała pieršyja alimpijskija miedali pa płavańni ŭ historyi niezaležnaj Biełarusi.

Za adzinaccać hadoŭ da hetaha, junijorkaj, jana biłasia za ŭznaharody z najlepšymi ŭ śviecie. Ale adnojčy na trenirovačnych zborach na Alaksandru abrynuŭsia ŭdar, praź jaki jana źnikła ź infarmacyjnaj prastory na hady.

― My pajechali na Kipr. Usio było cudoŭna: rychtavalisia, treniravalisia. Ale adnojčy mnie zrabiłasia błaha, płavać było ciažka, uźnikli prablemy sa zdaroŭjem, — ščyra raskazvaje Alaksandra. — Niervy, pieražyvańni: trenier nie razumieje, što zdaryłasia, ja nie razumieju. My pryjechali dadomu na paru dzion, na nosie byŭ čarhovy zbor. I ŭ hety samy momant mianie ŭziali na dopinh. Za try tydni da hetaha mianie ŭžo praviarali. Niečakana znajšli zabaronienaje rečyva. My nie viedajem dakładna, što adbyłosia na kiprskich zborach, ja vykazvaju tolki svaje zdahadki. U nas było centralizavanaje charčavańnie. Chto dzie siadzić, było viadoma.

Dumaju, što adzin niadobrazyčliviec — nie budu ahučvać, chto, choć jość kankretnyja padazreńni, — prosta padsypaŭ jaho ŭ ježu. Mianie mała taho, što padstavili: potym była navodka, kab mianie ŭziali na dopinh.

— Niaŭžo prablemy byli takija surjoznyja?

— Kaniečnie.

Vy ŭjavicie, što vam dali nie razavuju dozu niejkich lekaŭ, a ŭ sto razoŭ bolš.

A ŭ vyniku nie vystupała ciaham troch hadoŭ. Ale ja ŭžo paśpieła adčuć smak pieramohi i viedała, što mahu viarnucca. Zastałasia niejkaja nierealizavanaść.

* * *

Siońnia «Załataja rybka» (tak ź luboŭju i pavahaj nazyvajuć spartsmienku zaŭziatary) raskazvaje pra minułaje z elehantnaj lohkaściu. Choć viartańnie ŭ vialiki sport było pakručastym i raściahnułasia na hady.

Tym nie mienš, u 2011 hodzie jana zrabiłasia čempijonkaj śvietu i najlepšaj spartsmienkaj Biełarusi. A praz hod uziała dva srebry na Alimpijadzie u Łondanie. Praź niekalki miesiacaŭ — jašče i zołata čempijanatu Jeŭropy.

Elehantnaja (u žyćci jašče lepšaja, čym na fota), vysakarodnaja i nievierahodna pryjemnaja Alaksandra Hierasimienia nikoli, vidać, nie spyniałasia pierad ciažkaściami.

— Mnie było amal 11 hadoŭ, kali ja narešcie dajšła da basiejna. Heta paznavata. Na toj momant ja adstavała.

— Baćki nie pabajalisia addać u sport?

— Maci zajmałasia spartovym šmatborjem, tata — trajnym skačkom. Ź dziacinstva mianie pryvučali da fizkultury.

Baćka niadaŭna znajšoŭ niejkija vyniki, jakija jon zanatoŭvaŭ. Kali mnie było dva hady, jon zapisvaŭ, naprykład, maje pakazčyki pa skačkach u daŭžyniu.

Spačatku baćki byli vielmi zadavolenyja, što ja zajmałasia płavańniem. A potym uźnikli pytańni: jany na spravie viedali realii prafiesijnaha sportu. Adnak ja adstajała svoj punkt hledžańnia.

* * *

Niezvyčajny dla vialikaha sportu fakt: ciaham usioj spartovaj karjery — ź dziacinstva da alimpijskich viaršyniaŭ — Alaksandra addana pracavała ŭ kamandzie sa svajoj pieršaj nastaŭnicaj.

— Kali ja pryjšła ŭ basiejn, u mianie było dva treniery: Alena Uładzimiraŭna Klimava i Volha Siarhiejeŭna Jaskievič. Jany pracavali ŭ pary, ale potym kamandy padzialili na chłopčykaŭ i dziaŭčynak. I z nami, dziaŭčynkami, pracavała Alena Uładzimiraŭna.

— Tak amal nie byvaje, kab pierśpiektyŭnuju spartsmienku ŭ dziciačaha treniera nie zabrali.

— Lepšaha treniera, čym moj, niama.

A samaje hałoŭnaje — heta ŭzajemarazumieńnie. Kali jaho niama, kašy nie zvaryš.

Niekalki hadoŭ tamu pačali pracavać sumiesna ź Dźmitryjem Mancevičam, biełarusam, jaki treniruje kamandu Turcyi. Niekalki razoŭ na hod ja jeździła da jaho na zbory. Navinki, jakija ŭvodzilisia ŭ maju padrychtoŭku, davali dobry vynik.

* * *

Dla biełarusaŭ Alaksandra Hierasimienia — nie prosta papularnaja spartsmienka.

Zrabiŭšysia zorkaj płavańnia, jana nie ŭciahnułasia ŭ falšyvyja ideałahičnyja hulni i nie padładziłasia pad pryncypy, joj niablizkija. U toj ža čas Alaksandra admoviłasia ad miljonnych kantraktaŭ, jakimi jaje zamańvali z-za miažy.

Jana nahadvaje travinku, jakaja prabiłasia praz asfalt biełaruskaha hramadstva i daje spadzieŭ na adekvatnaść i moc novaha biełaruskaha pakaleńnia.

Alaksandra ščyra vykazvaje svajo mierkavańnie na lubyja pytańni i nie baicca, što čynoŭniki buduć jaje papikać.

Cikavy i toj fienomien, što ŭskaraskacca na Alimp naša «Załataja rybka» zmahła ŭ davoli spartanskich umovach. Da prykładu,

u Biełarusi dahetul funkcyjanuje tolki adzin basiejn, dzie jość startavyja tumbački mižnarodnaha ŭzoru. Topavyja płyŭcy, jakich u nas možna pieraličyć pa palcach, zajmajucca ŭ tych ža umovach, što i zvyčajnyja amatary-fizkulturniki, jakija prychodziać u «basik» prapłyć kiłamietr-druhi.

— Jakim čynam pry takoj infrastruktury vam i trenieru ŭdałosia padniacca tak vysoka? — cikavimsia ŭ Alaksandry jaje sakretam vyžyvańnia i rostu.

— Jość mierkavańnie, što biełarusy talerantnyja, pad kahości padładžvajucca i z usim naviazanym pahadžajucca. Dy nie!

* * *

Alaksandra Hierasimienia — heta nie tolki vialiki sport.

Paralelna z treniroŭkami Saša atrymlivaje adukacyju ŭ Biełaruskim dziaržaŭnym ekanamičnym univiersitecie i ŭ suśvietna viadomym Oksfardskim kaledžy, dzie vyvučaje mižnarodny mieniedžmient.

— A pieršuju adukacyju ja atrymała va Univiersitecie fizkultury i sportu, kab adčuvać svoj arhanizm i razumieć, što adbyvajecca ŭnutry. Ja nie viedaju, kudy i jakim vietram mianie zaniasie ŭ budučyni. U hałavie płanaŭ šmat, choć pakul nie čas ich ažyćciaŭlać. U lubym razie, budučynia paśla sportu budzie źviazana z kiraŭnickaj dziejnaściu, mieniedžmientam.

Adnak pakul słaŭnaja, vartaja kino karjera Alaksandry jašče dalokaja ad skančeńnia.

— Pieradstartavy mandraž abciažarvaje, ale ŭ toj ža čas heta narkotyk. Pakul ja ad hetaha admovicca nie mahu.

Kali pabaču, što patencyjał vyčarpany, to adkładu ŭbok kupalniki, šapački i skažu: «Spadarstva, da pabačeńnia, ja zrabiła, što zmahła». Ale pakul ja adčuvaju, što mahu dasiahnuć jašče bolš vysokaha vyniku.

• 0
• 0
• 0
• 0
• 0
• 0
• 0
• 0