Tolki za sioleta zarabotnaja płata supracoŭnikaŭ Nacyjanalnaj dziaržaŭnaj teleradyjokampanii vyraście pryblizna ŭ 3 razy.
Alaksandar Łukašenka padpisaŭ ukaz pra dadatkovuju finansavuju padtrymku supracoŭnikaŭ Nacyjanalnaj dziaržaŭnaj teleradyjokampanii. Zhodna z padpisanym dakumentam biudžetnaja častka zarobkaŭ pracaŭnikoŭ kampanii ŭvadnačaśsie pavyšajecca na 40%.
Ukaz №384 ad 9 žniŭnia 2007 hodu byŭ padpisany kiraŭnikom dziaržavy «ŭ metach dalejšaha ŭdaskanalvańnia ŭmoŭ ažyćciaŭleńnia dziejnaści ŭ halinie teleradyjoviaščańnia j uzmacnieńnia dziaržaŭnaj padtrymki pracaŭnikoŭ Nacyjanalnaj dziaržaŭnaj teleradyjokampanii». Hetym dakumentam unosiacca istotnyja źmieny va Ŭkaz prezydenta № 125 ad 1997 hodu «Pra vypłaty stymulacyjnaha charaktaru pracaŭnikam Nacyjanalnaj dziaržaŭnaj teleradyjokampanii». Takim čynam, byŭ źmienieny nieparušany ciaham 10 hadoŭ pryncyp stymulavańnia pracy pracaŭnikoŭ NDTRK, kali ŭsie nadbaŭki i premijalnyja mahli vypłočvacca tolki «za košt dachodaŭ ad reklamna‑haspadarčaj dziejnaści». Vyhladaje, hetych dachodaŭ stała nie stavać dla hodnaj apłaty pracy supracoŭnikaŭ NDTRK, i prablema była vyrašana ŭkazam kiraŭnika dziaržavy.
Zhodna z padpisanym dakumentam ciapier staršyni Nacyjanalnaj dziaržaŭnaj teleradyjokampanii dajecca prava nakiroŭvać biudžetnyja srodki jak na ŭstalavańnie stymulacyjnych nadbavak, tak i na premiravańnie svaich supracoŭnikaŭ, za vyniatkam tych, chto maje status dziaržsłužboŭcaŭ. Jak skazana va ŭkazie, na ŭstalavańnie nadbavak stymulacyjnaha charaktaru staršynia NDTRK moža nakiroŭvać da 20% ad pamieru planavaha fondu zarabotnaj płaty i stolki sama — na premiravańnie.
Takim čynam, dola biudžetu NDTRK adrazu moža paciažeć (i, chutčej za ŭsio, najbližejšym časam paciažeje) adrazu na 40%. I heta ŭ toj čas, kali ŭsie astatnija słai nasielnictva zaklikajuć uzmocniena ekanomić.
Varta taksama adznačyć, što ŭsiaho dva tydni tamu ŭrad vydaŭ pastanovu pra ŭzmacnieńnie finansavaj padtrymki Nacyjanalnaj dziaržaŭnaj teleradyjokampanii, ZAT «Druhi nacyjanalny kanał» i ZAT «Staličnaje telebačańnie». Zhodna z rašeńniem uradu dla hetych kampanij byŭ ustalavany pavyšany kaeficyjent (2,2) hraničnaha narmatyvu taryfnaj staŭki pieršaha razradu, što aznačała faktyčnaje pavyšeńnie bolš jak udvaja słužbovych akładaŭ usich supracoŭnikaŭ. Ciapier ža ad pamieru hetych padvojnych akładaŭ NDTRK zmoža farmavać taksama pamier stymulacyjnych nadbavak i premijalnych. Faktyčna, kali padličyć, atrymajecca, što tolki za sioleta zarabotnaja płata supracoŭnikaŭ Nacyjanalnaj dziaržaŭnaj teleradyjokampanii vyraście pryblizna ŭ 3 (!) razy.
Kamientary