Z ofisu redakcyi niedziaržaŭnaj haziety «Narodnaja vola» ŭ piatnicu, 10 žniŭnia, sudovyja vykanaŭcy pry adsutnaści kiraŭnictva vydańnia zabrali manitory da kampjutaraŭ i inšuju arhtechniku.
Z ofisa redakcyi niedziaržaŭnaj haziety «Narodnaja vola» ŭ piatnicu, 10 žniŭnia, sudovyja vykanaŭcy pry adsutnaści kiraŭnictva vydańnia zabrali manitory da kampjutaraŭ i inšuju arhtechniku.
U druhoj pałovie dnia ŭ redakcyju «Narodnaj voli» naviedaŭsia sudovy vykanaŭca ź Leninskaha rajonnaha suda Minska Siarhiej Klimaŭ z kalehami. Na toj momant kiraŭnikoŭ haziety na miescy nie było, u ofisie pracavali tolki niekalki supracoŭnic. Sudovy vykanaŭca zabraŭ 7 manitoraŭ, ksieraks i inšuju arhtechniku, pakinuŭšy dla kiraŭnictva akt ab adabrańni.
Jak patłumačyŭ prysutnym sudovy vykanaŭca, technika vymajecca pa pryčynie nievykanańnia redakcyjaj sudovaha rašeńnia ŭ dačynieńni haziety.
Pa słovach hałoŭnaha redaktara Iosifa Siaredziča, pracedura adabrańnia zroblena z parušeńniem zakanadaŭstva — u adsutnaść kiraŭnictva, taksama zabrali ŭ pieršuju čarhu arhtechniku, jakaja znachodziłasia ŭ vytvorčaści i vykarystoŭvałasia niepasredna dla stvareńnia haziety. Bolš za toje, častka adabranaj sudovymi vykanaŭcami techniki naležyć nie haziecie, a pryvatnym asobam. (Niekatoryja žurnalisty pa damovie z redakcyjaj vykarystoŭvajuć na pracy ŭłasnyja kampjutary.)
U paniadziełak, 13 žniŭnia, paśla pieramoŭ hałoŭnaha redaktara ŭ sudzie Leninskaha rajona i vypłaty štrafu techniku ŭ redakcyju viarnuli.
Nahadajem, naprykancy minułaha hoda pa rašeńni Leninskaha suda Minska redakcyja «Narodnaja voli» i jaje aŭtar musili zapłacić 2 miljony rubloŭ hienieralnamu dyrektaru TAA «Ekanomika i prava» Alaksandru Kaŭtunienku. Pryčynaj zysku A.Kaŭtunienki da «Narodnaj voli» staŭ artykuł pad nazvaj «Butovo minskoho pošiba», nadrukavany ŭ №№140‑141 ad 20 vieraśnia 2006 hoda.
U artykule, na jaki pakryŭdziŭsia biźniesmien, raspaviadałasia, jak žycharka Minska Volha Adamovič zastałasia biez žylla paśla taho, jak zrujnavali jaje pryvatny dom u centry horada dla budoŭli elitnaj šmatpaviarchoŭki. Kiraŭnikom firmy‑zabudoŭščyka źjaŭlaŭsia A.Kaŭtunienka.
Pieršapačatkova zyskoŭca pradjaviŭ da haziety 14 abvinavačańniaŭ i patrabavaŭ pa 100 miljonaŭ rubloŭ z redakcyi i aŭtara. U vyniku sud zadavoliŭ tolki adno abvinavačańnie i źmienšyŭ pamier sumy da 1,5 miljona rubloŭ z redakcyi i 500 tysiač z aŭtara artykuła.
Pavodle I.Siaredziča, rašeńnie suda nie vykanali ŭ termin, pakolki była vierahodnaść, što jano źmienicca.
Kamientary