Chronika apazycyi za 7 — 13 žniŭnia

7 žniŭnia

Kazulin 500 dzion

7 lipienia spoŭniłasia 500 dzion, jak były kandydat na pasadu prezydenta Alaksandar Kazulin znachodzicca ŭ turmie. Dačka palitviaźnia Julija zajaviła pra cisk na baćku z boku administracyi kalonii i kiepski stan jaho zdaroŭja.

Nie adzin Miron u Viciebsku

Bieł‑čyrvona‑bieły ściah byŭ uźniaty ŭ centry Viciebsku na mačcie anteny mabilnaj suviazi. Praz paŭhadziny jaho źniali pažarniki. Milicyja zatrymała pobač z budynkam vasiemnaccacihadovaha maładziona, jakoha ličyć za lehiendarnaha Mirona. Adnak pieršy ściah u Lozna, za jaki ŭziaŭ na siabie adkaznaść Miron, byŭ vyviešany bolš za 11 hadoŭ tamu.

Dvoje zatrymanyja, čatyrom udałosia schavacca

Paśla 16‑j ŭ Miensku na kulturnickaj akcyi, pryśviečanaj 490‑j hadavinie vydańnia ŭ Prazie «Psałtyra» Francyska Skaryny, zatrymanyja šeść siabraŭ Moładzi BNF.

Maładyja ludzi ŭskładali kvietki da pomnika Skarynu la Nacyjanalnaj biblijateki, a taksama zładzili performans. Na ich nalacieli dva milicyjanty, stali łavić.

Pratrymaŭšy paŭtaru hadziny ŭ pastarunku, maładych ludziej biez tłumačeńnia pryčynaŭ vypuścili.

Abaraniać palitviaźniaŭ

Mienharvykankam admoviŭ aktyvistam ruchu «Za Svabodu» ŭ praviadzieńni pikietaŭ u padtrymku palitviaźniaŭ. Nibyta na miescy planavanych pikietaŭ buduć pravodzicca pracy pa padrychtoŭcy da śviatočnych mierapryjemstvaŭ, pryśviečanych 940‑hodździu Miensku.

8 žniŭnia

Hryščenia i Azarka

Baranavicki aktyvist Jarasłaŭ Hryščenia pieraviedzieny sa statusu padazronaha ŭ abvinavačanyja. Materyjały spravy składajuć 143 staronki, try videadyski i 76 rečdokazaŭ. U Hryščeni ŭziali padpisku pra niavyjezd. Spravu pieraniaŭ novy śledčy — V.Paŭłoŭski. Chłopca abvinavačvajuć u dziejnaści ad imia niezarehistravanaj arhanizacyi «Małady front».

Azarku buduć sudzić

Maładafrontaŭcy Naście Azarcy taksama vystaŭlena aficyjnaje abvinavačańnie ŭ kryminalnaj spravie, raspačataj KDB za ŭdzieł u niezarehistravanaj arhanizacyi. Śledčy ŭ Mienskaj abłasnoj prakuratury paviedamiŭ joj, što ciaham miesiaca moža adbycca sud. Budzie jon u Niaśvižy.

Šydłoŭskamu dadali

Sud Partyzanskaha rajonu Miensku pryhavaryŭ moładzievaha aktyvista Alaksieja Šydłoŭskaha da 5 sutak administracyjnaha aryštu pa art. 17.1 KaAP (drobnaje chulihanstva). «Nachulihaniŭ» jon nibyta 24 lipienia. Tym časam A.Šydłoŭski 25 lipienia ŭžo byŭ asudžany na 15 sutak za analahičnaje pravaparušeńnie, učynienaje im nibyta ŭ toj ža dzień.

Partyi BEZ i «Nadzieja» pad pahrozaj likvidacyi

Viarchoŭny sud pryznačyŭ datu razhladu pazovu Minjustu pra likvidacyju Biełaruskaj ekalahičnaj partyi (BEZ). Słuchańnie pačniecca 29 žniŭnia. Partyi zakidajuć zamały kolkasny skład, adsutnaść rehijanalnych i haradzkich strukturaŭ, što supiarečyć zakanadaŭstvu. Padobnyja prablemy paŭstali i pierad Biełaruskaj žanočaj partyjaj «Nadzieja».

10 žniŭnia

Sieviaryncu nie dali dazvołu

Moładzievaha lidera Paŭła Sieviarynca nie vypuskajuć za miežy Biełarusi. U adździele pa hramadzianstvie i mihracyi Pieršamajskaha rajonu Viciebsku palityku admovilisia stavić štamp, jaki dazvalaje vyjezd z krainy.

Aryšt za ściah

Ranicaj supracoŭniki milicyi i słužby achovy zatrymali Illu Šyłu, Andrusia Tyčynu i Barysa Parchamčuka. Pryčynaju staŭsia bieł‑čyrvona‑bieły ściah, što junaki trymali ŭ rukach, viartajučysia ź letnika. Milicyjanty ŭžyli ŭ dačynieńni da niepaŭnaletnich Tyčyny i Šyły fizyčnuju siłu. Praź niekalki hadzinaŭ zatrymanych vyzvalili biez składańnia pratakołaŭ.

13 žniŭnia

Ščukinu paraili

Supracoŭniki čyhunačnaha RUUS Viciebsku zatrymali pravaabaroncu Valeryja Ščukina, kali jon źbiraŭ achviaravańni hramadzianaŭ na vypłatu maralnaj škody Tacianie Bujevič, jakaja padčas vybarčaj kampanii ŭ miascovyja saviety vykonvała abaviazki sakratarki pry staršyni abłasnoj kamisii. Za abrazu T.Bujevič i jašče troch čalcoŭ akruhovaj kamisii Ščukinu prysudzili spłacić vałanciorcy vybarčaj kamisii 250 tys. rubloŭ. Pensijaner Ščukin vyrašyŭ pajści źbirać hrošy na vulicu sa zvarotam da hramadzianaŭ ab akazańni «65‑hadovamu pensijaneru Valeryju Ščukinu finansavaj dapamohi dziela vypłaty 37‑hadovaj Tacianie Bujevič srodkaŭ na maralnyja traty». Milicyjanty nie znajšli va ŭlotcy kramoły i praź dźvie hadziny vyzvalili apazycyjanera. Pry hetym paprasili nie raspaŭsiudžvać zvarot dy paraili paprostu žabravać.

Kleckaja prakuratura

adnaviła kryminalnuju spravu suprać miascovaha aktyvista i vydaŭca niezaležnaha biuleteniu Siarhieja Panamarova. Jaje ŭžo adzin raz zavodzili, ale paśla spynili. Pryčynaj była natatka ŭ hazecie «Bojki Kleck», jakuju sp. Panamaroŭ vydaje ŭłasnymi srodkami. Kiraŭnička Kleckaj jurydyčnaj kansultacyi Natalla Siemaškievič paličyła abraźlivaj infarmacyju ŭ adnym z artykułaŭ.

• 0
• 0
• 0
• 0
• 0
• 0
• 0
• 0