Rehistracyja i prapiska: što jość što

Siońnia ŭ Miensku na pres‑kanferencyi pradstaŭniki Ministerstva ŭnutranych spravaŭ i Nacyjanalnaha centru zakonaprajektnaj dziejnaści pry prezydencie Respubliki Biełaruś tłumačyli, čym rehistracyja adroźnivajecca ad prapiski.

7 vieraśnia prezydent Biełarusi A. Łukašenka padpisaŭ ukaz №413
«Ab udaskanaleńni systemy ŭliku hramadzianaŭ pa miescy žycharstva i miescy pierabyvańnia»,
zhodna ź jakim, z 1 studzienia 2008 h. skasoŭvajecca instytut prapiski, zamiest jakoha ŭvodzicca adziny paradak rehistracyi hramadzian Respubliki Biełaruś, a taksama zamiežnych hramadzian i asobaŭ biez hramadzianstva, jakija ŭvieś čas pražyvajuć u Respublicy Biełaruś, pa miescy žycharstva i miescy pierabyvańnia.

Pavodle namieśnika dyrektara Nacyjanalnaha centru zakonaprajektnaj dziejnaści Ludmiły Panfioravaj, adroźnieńni nastupnyja:

‑‑ kali systema prapiski rehulujecca niekalkimi roznaŭzroŭnievymi narmatyŭnymi aktami, paradak rehistracyi budzie adzinym dla ŭsioj terytoryi krainy, ź niekatorymi adroźnieńniami dla stalicy;

‑‑ pry pierarehistracyi nia treba budzie zdymacca z uliku pa starym miescy žycharstva. Novaja rehistracyja aŭtamatyčna admianiaje papiaredniuju, źmianšajecca kolkaść nieabchodnych dakumentaŭ;

‑‑ ułaśnik moža rehistravacca pa miescy znachodžańnia žylla biez abmiežavańniaŭ. Možna rehistravacca navat u sadovych domikach ci na leciščach, u budynkach, padlehłych znosu i kapitalnamu ramontu. Praduhledžana taksama rehistracyja dla asob, što pražyvajuć u budynkach relihijnaha kultu;

Ł. Panfiorava zaznačyła, što pavodle novaha paradku možna budzie zarehistravać vialikuju adzinuju siamju, niahledziačy na pamier žyłoj płoščy. Taksama ŭpieršyniu buduć rehistravać asob, jakija nia majuć asnoŭnaha miesca žycharstva.

Namieśnik načalnika Departamentu pa hramadzianstvie i mihracyi MVD Anatol Łanin miarkujeŭ, što novy paradak rehistracyi vyzvalić sudy ad fiktyŭnych šlubaŭ i razvodaŭ, ablehčyć kantrol pieramiaščeńnia nasielnictva i źlikviduje rynak handlu prapiskaj, lahčej stanie adsočvać miescaznachodžańnie hramadzian inšych krainaŭ, jakija majuć vid na žycharstva ŭ Biełarusi. Źmiakčycca zakanadaŭstva adnosna parušeńnia pražyvańnia nie pa miescy prapiski — za pražyvańnie biaz rehistracyi hramadzianin spačatku atrymaje papiaredžańnie, i tolki potym štraf. Płata za rehistracyju składzie 0,2 bazavych vieličyni (siońnia 6 200 rubloŭ)

Aproč taho, kab atrymać pracu, dastatkova budzie zarehistravacca pa miescy pierabyvańnia na hod, paśla prosta praciahvać rehistracyju.

Eksperty «NN» miarkujuć, što źmieny ŭ zakanadaŭstvie majuć šmat stanoŭčych rysaŭ. Heta skaračeńnie terminu afarmleńnia rehistracyi (3 dni), admiena pošlinaŭ niekatorym katehoryjam nasielnictva, mahčymaść zarehistravacca pa miescy pierabyvańnia, nie mianiajučy pastajannaje rehistracyi. Asoby, što nie paśpieli aformić prava vałodańnia žyllom, majuć na heta try hady pierachodnaha peryjadu. Praŭda, u Miensku treba budzie čakać prytoku pracoŭnaj siły, niahledziačy na toje, što pastajanna zarehistravacca ŭ stalicy stanie składaniej.

• 0
• 0
• 0
• 0
• 0
• 0
• 0
• 0