Łatvijskija deputaty akazalisia ŭ efiry biełaruskaha dziaržtelekanała, choć nie davali jamu intervju. Jak tak vyjšła
U prahramie «Poniatnaja politika» na dziaržtelekanale «Biełaruś 1» 23 sakavika byli pakazanyja «ekskluziŭnyja intervju» z udziełam deputataŭ Jeŭraparłamienta, siejmaŭ Litvy, Łatvii i Polščy. Siarod ich byli łatvijskija deputaty Jurys Vilums i Aleh Buraŭ. Adzin ź ich raskazaŭ partału Delfi, što hutaryŭ nie ź biełaruskimi prapahandystami, a ź niejkimi studentkami — nibyta dla niezaležnaha rasijskaha vydańnia «Novaja hazieta Jeŭropa», piša vydańnie «Lusterka».
Na praciahu paŭhadziny aŭtary prapahandysckaj pieradačy na biełaruskim dziaržTB staralisia danieści dumku, što palityki ŭ ES dalokija ad realnaści, abviarhajučy ich kamientaryi «faktami» i mierkavańniami «zvyčajnych» ludziej. U pieradačy vykarystanyja frahmienty videa z udziełam deputataŭ Siejma Łatvii Jurysa Vilumsa i Aleha Burava.
U adnym z frahmientaŭ Vilums na ruskaj movie kaža, što «nie bačyć pryčyn žyć spakojna, pakul Rasijskaja Fiederacyja isnuje ŭ ciapierašnich pamierach». Mierkavańnie Burava tranślujecca bolš šyroka: jon raskazvaje pra składanuju ekanamičnuju situacyju ŭ Łatvii i nieabchodnaść pavieličeńnia abaronnaha biudžetu, padkreślivajučy, što srodki varta nakiroŭvać nie tolki na zakupku techniki za miažoj, ale i na raźvićcio miascovaj vytvorčaści, naprykład, dronaŭ.
Akramia taho, Buraŭ adznačyŭ, što apošni raz byŭ u Biełarusi na Novy hod u 2020 hodzie i stanoŭča adhuknuŭsia pra biełaruski narod, nazvaŭšy jaho adkrytym i dobrazyčlivym.
U pieradačy taksama pakazany siužet z udziełam žančyny, mierkavana z Łatvii, jakaja śćviardžaje, što jaje znajomaja płacić bolš za 300 jeŭra za aciapleńnie dvuchpakajovaj kvatery i paśla apłaty rachunkaŭ u jaje nie zastajecca hrošaj na ježu. Akramia taho, u prahramie śćviardžajecca, što śmiarotnaść u Łatvii ŭdvaja vyšejšaja, čym u ES, i što ludzi masava źjazdžajuć z krainy. Uvieś hety naratyŭ supraćpastaŭleny stanoŭčamu vobrazu žyćcia ŭ Biełarusi.
Pieradaču «Poniatnaja politika» viadzie ŭklučany ŭ sankcyjny śpis Jeŭrasajuza Siarhiej Husačenka.
Deputaty Siejma Łatvii admaŭlajuć, što razmaŭlali ź biełaruskimi prapahandystami. Buraŭ zajaviŭ, što «nie davaŭ intervju ni hetaj pieradačy, ni hetamu žurnalistu». Jon dadaŭ, što za čas pracy kamunikavaŭ z ukrainskimi i rasijskimi apazicyjnymi žurnalistami, jakija pracujuć u Jeŭropie.
Vilums taksama zajaviŭ, što nie davaŭ kamientaryjaŭ biełaruskamu dziaržtelekanału, i padkreśliŭ, što jaho pazicyja ŭ dačynieńni da ŭładaŭ Biełarusi adnaznačnaja, tamu ŭdzieł u pracy prapahandysckich ŚMI byŭ by niedapuščalny. Pry hetym jon uzhadaŭ, što vykarystanuju ŭ pieradačy zajavu zrabiŭ u intervju dźvium studentkam, jakija nazvalisia pradstaŭnicami «Novaj haziety Jeŭropa».
Heta nie pieršy raz, kali pad prykryćciom vydańnia «Novaja hazieta Jeŭropa» stvarajecca kantent dla biełaruskaj dziaržprapahandy. Naprykład, 25 sakavika nibyta dla hetaha resursu dvoje maładych ludziej zdymali videa na akcyi ŭ honar Dnia Voli ŭ Vilni (adzin ź ich raskazaŭ, što ź imi raspłacilisia kryptavalutaj, roliki vykarystali ŭ pieradačy na dziaržtelekanale STB). Raniej z fejkavaj prapanovaj ab najmie ad taho ž vydańnia źviartalisia da biełaruskaj žurnalistki Nastaśsi Rahatko, jakaja supracoŭničała z Ofisam Śviatłany Cichanoŭskaj.
U minułym hodzie niejkija ludzi ad imia «Novaj haziety Jeŭropa» sprabavali trapić dla intervju i ŭ sam Ofis Cichanoŭskaj. Padobny zapyt atrymlivała taksama Narodnaje antykryzisnaje ŭpraŭleńnie (NAU) pad kiraŭnictvam Paŭła Łatuški.
Nieviadomyja vykarystoŭvajuć imia realnaj žurnalistki «Novaj haziety Jeŭropa» Iryny Harynaj. U vydańni adznačali, što jana nie zajmajecca Biełaruśsiu.
Ciapier čytajuć
Biaspałaŭ namalavaŭ ludziej sa ściahami ŭ centry Minska i adpraviŭ fota ŭ milicyju. Źjechalisia try mašyny ź mihałkami51
Kamientary