Piać faktaŭ pra Uładzimira Kanaplova, jaki trapiŭ u niałasku
Škłoŭski hieohraf, jaki pravaliŭ impičmient i syšoŭ u handboł, byŭ adnym z samych upłyvovych biełarusaŭ.
Pavodle infarmacyi «Priessboła», KDB pravodzić pravierku pa spravie ŭčorašniaha čynoŭnika arhkamiteta čempijanatu śvietu pa chakiei Hienadzia Alaksiejenki i staršyni nacyjanalnaj fiederacyi handboła Uładzimira Kanaplova.
Abodva byli zatrymanyja, ale viadoma, što Kanapleva paśla troch sutak aryštu adpuścili na svabodu.
Zatrymańnie adnaho z najbližejšych paplečnikaŭ Alaksandra Łukašenki — dobraja nahoda, kab uzhadać niekatoryja fakty ź jahonaj bijahrafii.
Škłoŭski
Budučy palityk naradziŭsia ŭ vioscy Akulincy Mahiloŭskaha rajona.
Darečy, nakont jaho daty naradžeńnia jość roznyja mierkavańni.
Jak i ŭ Alaksandra Łukašenki, u Kanaplova błytanina z dniami naradžeńnia. Ich… dva. Pavodle pašpartnych źviestak, jon naradziŭsia 3 studzienia 1954. Heta značycca, što na piensiju Kanaploŭ vyjdzie praź miesiac. Ale niekalki tydniaŭ tamu, 14 listapada, handbolnaja fiederacyja ŭžo vinšavała jaho z 60-hodździem. Pavodle ich dakumientaŭ, Kanaploŭ naradziŭsia 14 listapada 1953 h.
Karjera Uładzimir Kanaplova da jaho pryjezdu ŭ Minsku ŭklučała ŭsiaho dva harady — Mahiloŭ i Škłoŭ.
U Mahilovie Kanaploŭ atrymaŭ vyšejšuju adukacyju. U tyja časy i adbyłosia jaho losavyznačalnaje znajomstva z Alaksandram Łukašenkam. Jano zdaryłasia ŭ ścienach Mahiloŭskaha dziaržaŭnaha piedahahičnaha ŭniviersiteta. «My vučylisia paralelna z prezidentam u 1971—1975. Jon historyk, ja — hieohraf. Pieršyja dva hady žyli ŭ adnym internacie, na adnym paviersie, — raskazvaŭ Kanaploŭ «Kamsamolskaj praŭdzie». — Nas jadnaŭ sport. Heta ŭ pieršuju čarhu futboł. Na histfaku była dobraja kamanda, i Łukašenka hulaŭ u joj nie apošniuju rolu. Ja na hieafaku ścipła hulaŭ u abaronie. Pamiž nami było peŭnaje supiernictva ź pieramiennym pośpiecham».
Adsłužyŭšy ŭ vojsku, Kanaploŭ raźmierkavaŭsia ŭ Škłoŭ, dzie pravioŭ nastupnyja 15 hadoŭ svajho žyćcia. Pracavaŭ nastaŭnikam hieahrafii ŭ haradskoj škole-internacie, namieśnikam dyrektara siaredniaj škoły, a paśla inśpiektaram pa spravach niepaŭnaletnich u škłoŭskaj milicyi.
Sarvaŭ impičmient
U kamandzie Łukašenki Kanaploŭ apynuŭsia ŭ 1991-m. Da prezidenckich vybaraŭ jon ličyŭsia pamočnikam narodnaha deputata, sumiaščajučy hetyja abaviazki z pracaj u škole.
Aktyŭna ŭdzielničaŭ u vybarčaj kampanii, sabraŭšy sa svajoj kamandaj kala 70 tysiač podpisaŭ za Łukašenku.
Paśla pieramohi staŭ hałoŭnym pamočnikam prezidenta. U 1995 Kanaploŭ byŭ abrany ŭ parłamient. Tam jon pratrymaŭsia da 2007, pryčym apošnija hady — śpikieram.
«Chvilina słavy» Kanaplova ŭ historyi Biełarusi — heta sarvanaje hałasavańnie ŭ parłamiencie ŭ 1996-m.
Viarchoŭny Saviet rychtavaŭ impičmient Alaksandra Łukašenki, a toj chacieŭ razahnać parłamient z dapamohaj refierendumu. Byŭ dasiahnuty papiaredni kampramis: deputaty spyniajuć praceduru impičmientu, a Łukašenka admaŭlajecca ad praviadzieńnia refierendumu.
Adnak u apošni momant Kanaploŭ, kiraŭnik praprezidenckaj frakcyi «Zhoda», daŭ zahad svaim paplečnikam u parłamiencie prahałasavać suprać kampramisnaha rašeńnia. Heta dało padstavu Łukašenku pryznačyć refierendum i na im źmianić kanstytucyju. A impičmient ažyćciavić tak i nie ŭdałosia.
Syšoŭ u handboł
U 2007 Kanaploŭ, spasłaŭšysia na drennaje zdaroŭje, syšoŭ z palityki. Na toj čas na im «visieła» handbolnaja fiederacyja.
Kanaploŭ nie staŭ adrakacca jaje i ŭsurjoz zaniaŭsia sportam.
Dziakujučy Kanaplovu biełaruski handboł atrymaŭ druhoje dychańnie, pryznavali ekśpierty. Namienkłaturnyja suviazi dazvalali jamu zabiaśpiečvać finansavańnie hetaha vidu sportu navat paśla adstaŭki.
Z usich čynoŭnikaŭ-kiraŭnikoŭ fiederacyj jon byŭ samym paśpiachovym.
Mužčynskaja zbornaja stała znoŭ traplać na top-turniry, i navat samy darahi handbalist śvietu biełarus Siarhiej Rutenka vyrašyŭ hulać nie za zbornuju Ispanii, a za rodnuju Biełaruś.
Cichaje žyćcio ŭ Drazdach
Jak i inšyja łukašenkaŭcy, u siaredzinie 2000–ch Kanaploŭ pasialiŭsia ŭ asabniaku ŭ Drazdach. Płošča 600 kvadrataŭ, try pavierchi, terasa, altanka ŭ dvary, paŭkiłamietra da voziera — pastaralnaje žyćcio bahataha piensijaniera.
Dy jašče i pryjemnyja susiedzi pobač — «pamiežnik» Leanid Malcaŭ i siamja byłoha mera Michaiła Paŭłava.
Raniej Kanaploŭ žyŭ u słužbovaj čatyrochpakajoŭcy kala «Biełaj viežy», adnak kvateru nie pryvatyzavaŭ, viarnuŭ dziaržavie.
Syny ŭ biznesie
Kanaploŭ adyšoŭ ad dziaržaŭnych spravaŭ, zatoje pačali rabić karjeru jahonyja syny. Jany znajšli siabie ŭ kamiercyi. Małodšy Dzianis piać hadoŭ tamu pracavaŭ namieśnikam dyrektara pa ideałahičnaj pracy ŭ minskim restaranie. Ciapier jon staŭ paŭnavartasnym biznesmenam — nabyŭ bar nasuprać Kastryčnickaj płoščy. Dzianisu Kanaplovu naležyć City-cafe Boulevard.
Jak daviedałasia «Salidarnaść», jon ułaśnik jašče i Wine&whiskey bar Mixx na rahu praśpiekta Mašerava i vulicy Čyrvonaj.
Pra starejšaha syna Mikałaja viadoma mienš. Pazaletaś Uładzimir Kanaploŭ u intervju «Narodnaj haziecie» raskazaŭ, što syn vyvučyŭ kitajskuju movu i maje biznes u hetaj krainie.
Kamientary