Ci stała praściej zapisacca na polskuju vizu paśla ŭviadzieńnia fotavieryfikacyi? Dośvied čytačoŭ
Z krasavika 2024 hoda zapisacca na polskuju vizu možna tolki praz asabistuju vieryfikacyju. Dla hetaha treba zahruzić fota pašparta, a taksama zrabić sełfi na kamieru smartfona abo kampjutara. Źmieny ŭviali, kab zrabić samastojnuju rehistracyju ŭ VFS Global bolš dastupnaj i ludziam nie davodziłasia źviartacca da pasiarednikaŭ. Ci stała ŭ vyniku lepš?
Tydzień chadziła z dvuma telefonami
Kaciaryna dniami zapisałasia na padaču dakumientaŭ na polskuju vizu pa zaprašeńni ad svajaka. Jana apisvaje, jak ciapier vyhladała pracedura. Pasiaredniki stvaryli čat u vajbiery dla kamunikacyi z tymi, chto taksama chacieŭ zapisacca. Dla zapisu na vizu treba było zapuścić bot u telehramie. Praz bota nieabchodna było dasłać usie patrebnyja danyja, a taksama fota apošniaj staronki pašparta i sełfi.
«Taksama ŭ čat dasyłajuć spasyłku na ŭstalavańnie dadatku, bieź jakoha zapisacca niemahčyma, bo nastupnyja dziejańni adbyvajucca praź jaho. Jość viersija jak dla Android, tak i dla iOS, ale pasiaredniki adrazu papiaredžvajuć, što va ŭładalnikaŭ iPhone šancaŭ paśpiachova zapisacca značna mienš, čym u ludziej z Android. Tamu, kali jość mahčymaść, rajać znajści Android-pryładu», — tłumačyć Kaciaryna.
Pakolki ŭ žančyny byŭ iPhone, a zapisacca chaciełasia chutka, joj daviałosia adšukać svoj stary telefon, ustalavać na jaho dadatak i pastajanna nasić jaho z saboj, kab nie prapuścić momant rehistracyi.
«Zapisacca atrymałasia tolki z treciaj sproby, ale ŭsio adno liču, što heta było davoli chutka. Tamu ź niekatorym napružańniem i dvuma telefonami ja chadziła ŭsiaho adzin tydzień», — kaža jana.
Žančyna pryznajecca, što raniej pasiaredniki zapisvali jaje nie raniej, čym praz 2-4 tydni ad momantu zvarotu.
«Pa časie atrymałasia dobra, ale sama pracedura składanaja i niervovaja. Uvieś čas treba być napahatovie, a praces rehistracyi adbyvaŭsia ŭ pracoŭny čas, što stvaryła dadatkovyja niazručnaści.
Liču, što raniej było składana, a ciapier stała jašče horš. Hrošy pasiarednikam usio adno płaciš, ale raniej ty zapłaciŭ i ničoha bolš nie rabiŭ, a ciapier treba ŭvieś čas udzielničać u hetym pracesie».
Za pasłuhi pasiarednikaŭ Kaciaryna addała 500 rubloŭ.
«Daviałosia nie tolki płacić, ale i dadatkova hublać svoj čas i niervy»
Inšy surazmoŭca, Michaił, rabiŭ pracoŭnuju polskuju vizu. Jon pryznajecca, što navat z dapamohaj pasiarednikaŭ zapisacca jamu było niaprosta.
«Usio rabiŭ pa instrukcyi, ale trojčy ničoha nie atrymlivałasia. Na roznych etapach źjaŭlalisia niejkija pamyłki. Na čaćviorty raz vyrašyŭ pryjści ŭ ofis, i tam dziaŭčaty zrabili ŭsio ŭ majoj prysutnaści z majho telefona», — uspaminaje mužčyna.
Michaił taksama ličyć raniejšuju sistemu zručniejšaj.
«Ja pracuju dalnabojščykam. Dla mianie raz na hod zapłacić za padaču na vizu — nie prablema. Ale hetym razam daviałosia nie tolki płacić, ale i dadatkova hublać svoj čas i niervy».
Pa znajomstvie sa źnižkaj
Anastasija, jakaja zapisvałasia miesiac tamu na nacyjanalnuju vizu, taksama źviartałasia da pasiarednikaŭ, choć spačatku sprabavała ŭsio zrabić samastojna.
«Ja sprabavała zapisacca sama, spadziejučysia, što budzie praściej. U navinach pisali, što novaja sistema nibyta prybiraje pasiarednikaŭ. Ale samoj zarehistravacca nie atrymałasia. Kali ŭžo nadakučyła sprabavać, źviarnułasia da pasiarednikaŭ. Pa znajomstvie mianie zapisali za 250 rubloŭ», — raskazvaje Naścia.
Zapis pa karcie palaka
Jašče adzin surazmoŭca, Andrej, jaki zapisvaŭsia na vizu pa karcie palaka, taksama paśla niekalkich niaŭdałych sprob pajšoŭ da pasiarednikaŭ.
«Ale navat ź imi zapisacca atrymałasia tolki praz dva tydni. Za svaje pasłuhi pasiarednik uziaŭ 350 rubloŭ», — dzielicca jon.
Dasłaŭ piać zaprašeńniaŭ — kolki viz dali?
Aleh, jaki žyvie ŭ Polščy, za hod dasłaŭ piać zaprašeńniaŭ svajakam i znajomym u Biełarusi.
«Ja adsočvaju, jak iduć spravy z rehistracyjaj tych, kaho zaprasiŭ. U vyniku tolki siastra ŭ kastryčniku zdoleła samastojna zapisacca. Ciešča i cieść taksama biez prablem padalisia, bo piensijaniery nie prachodziać hetuju praceduru praz sajt.
Ale siabram nie šancuje: adzin užo miesiac biezvynikova sprabuje sam i nie zdajecca. Inšy paśla niekalkich niaŭdałych sprob pajšoŭ da pasiarednikaŭ, ale i jany ŭžo dva tydni nie mohuć dapamahčy», — dzielicca nazirańniami Aleh.
Kamientary