Rekordna rańnim budzie zbor biarozavaha soku ŭ Biełarusi ŭ hetym hodzie, paviedamiła pres-sakratar Ministerstva lasnoj haspadarki Ružena Navickaja.
U suviazi ź ciopłym nadvorjem u paŭdniovych rehijonach respubliki ŭžo pačaŭsia ruch klanovaha i biarozavaha soku. Śpiecyjalisty ŭ halinie viadzieńnia lasnoj haspadarki adznačajuć, što nie pamiatajuć takich hadoŭ, kab možna było prystupać da narychtoŭki soku ŭžo ŭ lutym. Zvyčajna pieršyja padsočki pravodzilisia tolki ŭ 20-ch čysłach sakavika. Zatoje zapomniŭsia siezon 2013 hoda, kali praz poźniuju zimu ruch soku ŭ biaroz pačaŭsia anamalna pozna i vielmi chutka skončyŭsia. Lashasam udałosia narychtavać tolki 14,8 t pryrodnaha napoju, što skłała 55,8% da ŭzroŭniu papiaredniaha hoda.
Sioleta ŭsio skłałasia zusim pa-inšamu. Usie lashasy krainy apieratyŭna rychtujucca da pramysłovaj narychtoŭki biarozavaha soku.
Idzie afarmleńnie dakumientacyi, zaklučeńnie damovaŭ z pradpryjemstvami-pierapracoŭščykami, rychtujecca nieabchodnaja tara i technika. U najbližejšyja dni da narychtoŭki pryrodnaha napoju prystupiać lashasy Bresckaj i Homielskaj abłaściej. Trochi paźniej da ich dałučacca i inšyja haspadarki respubliki. «Aptymalnaja dla narychtoŭki soku siaredniesutačnaja tempieratura pavinnaja składać 5-10 hradusaŭ vyšej za nul, — skazała pradstaŭnik Minlashasa. — Pry načnych zamarazkach ruch soku spyniajecca, jak i pry tempieratury, vyšejšaj čym plus 10 hradusaŭ».
Pa słovach Ruženy Navickaj, arhanizacyi Minlashasa prymuć usie nieabchodnyja miery dla narychtoŭki soku ŭ tym abjomie, jaki nieabchodny dla zadavalnieńnia patrebaŭ pierapracoŭčych kambinataŭ i nasielnictva. Pa mahčymaści sok budzie ekspartavacca. «U minułyja hady hety pryrodny napoj byŭ niadrenna zapatrabavany na litoŭskim rynku», — paviedamiła śpiecyjalist.
Z pačatkam siezonu narychtoŭki biarozavaha soku dziaržaŭnaja lasnaja achova asablivuju ŭvahu budzie nadavać achovie biarozavych hajoŭ i źmiešanych lasoŭ, dzie rastuć saśpiełyja biarozy. Heta źviazana ŭ tym liku z tym, što samavolnaja narychtoŭka soku biez dakumientaŭ u Biełarusi zabaronienaja.
Zhodna ź dziejnymi praviłami narychtoŭki druharadnych lasnych resursaŭ i ažyćciaŭleńnia pabočnaha karystańnia, narychtoŭvać biarozavy sok možna tolki ŭ pierastojnych i śpiełych lasach, pryznačanych dla vysiečak hałoŭnaha karystańnia. Adnak narychtoŭka pavinnaja ažyćciaŭlacca nie bolš čym za piać hadoŭ da ich vysiečki i sposabami, jakija nie mohuć nanieści škodu drevam.
Dla pramysłovaj narychtoŭki biarozavaha soku nieabchodna nabyć lasny bilet i atrymać dazvoł ad lashasa.
Laśnictva vyznačyć kankretnyja ŭčastki narychtoŭki.
Akramia taho, u kožnym laśnictvie vyznačanyja ŭčastki lesu, pryznačanyja dla narychtoŭki biarozavaha soku hramadzianami dla ŭłasnych patreb. Usie achvočyja narychtavać sok pavinnyja źviarnucca ŭ adno ź laśnictvaŭ, dzie im pakažuć śpiecyjalna adviedzienyja dla zboru soku ŭčastki, praviaduć instruktaž i prakantralujuć technałohiju padsočki.
Za parušeńnie praviłaŭ narychtoŭki soku praduhledžanaja administracyjnaja adkaznaść.
Pavodle Kodeksa ab administracyjnych pravaparušeńniach Biełarusi, narychtoŭka soku na achoŭnych pryrodnych terytoryjach zabaronienaja i ciahnie nakładańnie štrafu na hramadzian u pamiery ad Br400 tys. da Br3,5 młn, na indyvidualnych pradprymalnikaŭ — da Br10 młn, na jurydyčnych asob — da Br50 młn.
Da terytoryjaŭ, na jakich narychtoŭka sokaŭ zabaraniajecca, adnosiacca haradskija, kurortnyja lasy i lesaparkavyja častki zialonych zon, pałosy advodu čyhunačnych i aŭtamabilnych daroh, inšych transpartnych i kamunikacyjnych linij, nasielenyja punkty, dendrałahičnyja parki, bataničnyja sady i inšyja.
Tur anansuje, što Łukašenku napišuć na vybarach bolš za 90%5
Kamientary