Słavakija na pieramovach u Bracisłavie 15 krasavika prapanavała ŭkraincam vykarystoŭvać dla tranzitu hazu ź Jeŭropy nievialiki hazapravod zamiest adnaho z mahistralnych, jaki chacieła b vykarystoŭvać Ukraina i jaki b zrabiŭ mahčymymi pastaŭki ŭ patrebnych dla ŭkraincaŭ abjomach.
Pra heta paviedamlaje polskaje infarmacyjnaje ahienctva RAR sa spasyłkaj na infarmacyju Reuters.
Słavaki prapanujuć vykarystoŭvać hazapravod, jaki pralahaje ad słavackaj vioski Vojany da hazavaha schovišča ŭ Užharadzie, i vykarystańnie hetaha maršrutu patrabuje dadatkovych inviestycyj dla budaŭnictva nieabchodnaj infrastruktury.
«Adnak Słavakija nie pahadziłasia na reviers, jakoha damahajecca Kijeŭ, praz adzin z čatyroch hałoŭnych mižnarodnych hazapravodaŭ, pa jakich pastaŭlajecca rasiejski haz. Heta dazvoliła b transpartavać «błakitnaje paliva» ŭ zvarotnym kirunku niepasredna va Ukrainu», - adznačaje ahienctva sa spasyłkaj na słavackaha ministra ekanomiki Tomaša Małacinskaha.
Słavaki tłumačać svaju admovu tym, što jany bajacca, što heta moža parušyć damoŭlenaści z rasiejskim «Hazpromam».
Pa dadzienych ahienctva, pieršy varyjant dakładna nie budzie parušać damoŭlenaści z rasiejcami, tamu što tady haz budzie bracca sa słavackaj terytoryi i pradavacca klijentam užo ŭ Słavakii.
Małacinski skazaŭ žurnalistam ab nieabchodnaści dadatkovych kansultacyj z ukrainskim bokam, a pres-sakratar ministerstva adznačyŭ, što baki damovilisia padpisać adpaviedny miemarandum 28 krasavika.
Ministr enierhietyki i vuhalnaj pramysłovaści Ukrainy Juryj Prodan, u svaju čarhu, skazaŭ, što takoje rašeńnie nie zadavalniaje Ukrainu.
«Padrychtoŭka miemaranduma źjaŭlajecca peŭnym krokam u napramku da reviersu ź ES, ale adkryta kažu, što ŭ ciapierašniaj situacyi — nadzvyčaj vyklučnaj — nam budzie treba značna bolš», - skazaŭ jon.
Jak paviedamlaŭ UNIAN, Słavakija maje bolš za ŭsio techničnych mahčymaściaŭ dla samych vialikich pastavak hazu ź Jeŭropy siarod usich krain — najbližejšych zachodnich susiedziaŭ Ukrainy, praź jakija płanujucca takija pastaŭki.
Prodan raniej zajaŭlaŭ, što ŭkrainskaja ŭłada raźličvaje transpartavać praz słavackuju terytoryju da 10 młrd kubamietraŭ hazu i adznačaŭ, što ŭłada ŭžo damoviłasia ab pastaŭkach praz Polšču i Vienhryju ŭ abjomie 20 młn kubamietraŭ u sutki (kala 7,3 młrd kubamietraŭ u hod).
Učora niemieckaja RWE abviaściła ab adnaŭleńni pastavak hazu praz Polšču, praź jakuju Ukraina maksimalna moža ŭ hod prapampavać kala 1,5 młrd kubamietraŭ hazu.
U pačatku krasavika Prodan aceńvaŭ mahčymy impart hazu Ukrainaj u hetym hodzie na ŭzroŭni 27—33 młrd kubamietraŭ.
Kamientary