Ambasadar Rasiei: raniej tre' było patylicu čuchać!
Surykaŭ raz-poraz stanovicca ŭ nas ńjusmejkieram. I heta tolki padkresllivaje stupień zaležnaści Miensku ad Maskvy. Piša ŭ svaim błohu Alaksandar Kłaskoŭski.
Ambasadar Surykaŭ raz-poraz stanovicca ŭ nas ńjusmejkieram. I heta tolki padkresllivaje stupień zaležnaści Miensku ad Maskvy.
Pamiatajecie, jaki skandalny rozhałas vyklikała zajava ambasadara pra mahčymaść pastavić tut ichnyja jadravyja rakiety? Uschadzilisia, bo paličyli varyjant całkam realnym. Pryčym tut nibyta i ruki vykručvać nia treba: Miensk sam naviazvaje pasłuhi što da asymetryčnaha adkazu nachabnym janki:)
Zrešty, jak i tranzytnyja pasłuhi. Ale Maskva nie viadziecca na mahčymyja źnižki, bo ŭžo viedaje sapraŭdny košt biełaruskaha servisu. Siońnia paćvierdziłasia: niadaŭniaje abiacańnie rasiejskaha premjera Zubkova "padumać" nakont prakładki druhoj nitki "Jamała — Eŭropy" było tolki dyplamatyčnym chodam. Nie chaciełasia azmročvać haspadaram nastroj padčas pieršaha zamiežnaha vizytu. Zaraz ža vusnami Surykava dadzieny niedvuchsensoŭny adkaz: “Rasieja zrabiła svoj vybar, pačaŭšy budavać hazapravod “Nord Stream” cieraz Bałtyjskaje mora na Zachad”.
Sapraŭdy, praca tam užo kipić: vialiki siužet pra heta akurat apošnimi dniami krucić "Eŭrańjus". Prajekt ambicyjny i darahi. Biełaruskaje kiraŭnictva całkam słušna kaža, što druhaja nitka cieraz našu terytoryju abyšłasia b u niekalki razoŭ tańniej. Ale jašče bolej słušnaja dla Maskvy inšaja teza biełaruskaha kiraŭnika: našyja stasunki nadoŭha atručanyja hazam.
Dadamo: i zapeckanyja naftaj. Mnohija, naprykład, zabylisia ŭžo, jak u studzieni ŭ impecie naftahazavaj vajny našyja dziejačy dadumalisia vyklikać pazovam u homielski sud uładalnika "Transnafty" Siamiona Vajnštoka. Zabylisia mnohija, ale nie Vajnštok. Z taje pary jon łabijuje (i faktyčna prabiŭ ŭžo praz svoj urad) prajekt naftavaj truby Unieča — Prymorsk (BTS-2) z krutym abychodam našaj terytoryi.
Kaniešnie, u Maskvie taksama nie anioły, ale vidavočna, što i elementarnaja niedamovazdolnaść mienskich tavaryšaŭ piłuje toj tranzytny suk, na jakim siadzić Biełaruś.
Z zajavaŭ Surykava taksama vynikaje, što čakanaha kredytu Maskva sioleta moža i nia dać. A handal adnosna cany hazu ličyć niepatrebnym. Usio, maŭlaŭ, vyznačyć formuła.
"Kali padpisvali, baki sychodzilisia na punkcie hledžańnia, što ŭ ich adnolkavaje staŭleńnie da hetaj formuły i jaje čytańnia. Ciapier pačali čuchać patylicy. Tady nia treba było padpisvacca", — zajaviŭ ambasadar.
Miž tym pačuchać patylicu prymušajuć i zajavy samoha Surykava. Niadaŭna ŭsie rastyražavali jahony ŭpeŭnieny prahnoz nakont 125 dalaraŭ, ciapier ža dyplamat "adumaŭsia" i zahavaryŭ pra dyjapazon $120-150. Karaciej, vyhladaje na toje, što nasamreč formuła humavaja, i całkam mahčymy palityčny kaeficyjent.
Samaj ža intryhoŭnaj dla amataraŭ hadać na kavavaj huščy:) padajecca zajava Surykava pra mahčymuju sustreču Pucina z Łukašenkam u śniežni.
Hipotezu nakont farsavanaj pabudovy "sajuznaj dziaržavy" dziela palityčnaha pracaŭładkavańnia rasiejskaha lidera možna adkinuć z šerahu pryčynaŭ. Ich analiz — asobnaja vialikaja tema. U dvuch słovach: 1) technična mała času; 2) Pucin nia maje niedachopu ŭ varyjantach; 3) małaimavierna, kab Kreml byŭ hatovy vyłučyć umovy, ad jakich niemahčyma admovicca.
Sensacyi najchutčej što nia budzie. Mahčyma, usio ŭvohule abmiažujecca rytulnym pasiedžańniem Najvyšejšaj dziaržrady "sajuznaje dziaržavy", na jakim naležyć zaćvierdzić kiraŭnika "sajuznaha ŭradu". Rytualnaść nie vyklučaje ekanamičnaha cisku Maskvy za kulisami (zamova na pabudovu AES, prodaž naftachimu i h.d.). Vaharom stanie, u pryvatnaści, sakramentalnaje pytańnie cany na haz, jakoje akurat jašče budzie ŭ padviešanym stanie. Voś vam i ŭsia "techničnaja formuła"!
Ciapier čytajuć
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary