Adstaŭny ministr-karupcyjanier pradaje reśpiektabielny katedž kala Drazdoŭ. Prosić $2 miljony
U 2018 hodzie Uładzimir Patupčyk vylecieŭ ź ministerskaha kresła za karupcyju: Łukašenka abvinavaciŭ jaho ŭ spryjańni niezakonnamu siamiejnamu biznesu. Ale nieruchomaść u elitnym rajonie stalicy ŭ čynoŭnika zastałasia. Praŭda, ciapier susiedzi hladziać na jaho zvysoku — u litaralnym značeńni słova.
Ziamlu pad budaŭnictva doma Uładzimir Patupčyk atrymaŭ u 2012 hodzie — tady jon byŭ sienataram, a pasadu ministra enierhietyki atrymaŭ praz hod.
Učastak dali ŭ vodaachoŭnaj zonie za «Minsk-Arenaj», na vulicy Miastraŭskaj. Patupčyk akazaŭsia susiedam hrupy bankiraŭ na čale ź Piatrom Prakapovičam i Paŭłam Kałaŭram. Pobač budavaŭsia i źbiehły kirhizski prezident Kurmanbiek Bakijeŭ.
Afarmlajučy dakumienty na dom, Patupčyk zapeŭniŭ rehistratara, što budavaŭ katedž za ŭłasnyja hrošy, biez pryciahvańnia lhotnaha kredytu.
Kadastravy košt tych 14 sotak ziamli, jakaja dastałasia jamu, składaŭ $225 tysiač.
Ciapier Patupčyk sprabuje pradać elitnuju nieruchomaść — za $2 miljony
Na ŭčastku płoščaj 14 sotak pabudavany dom płoščaj 280 kvadrataŭ i haściavy domik na 70 kvadrataŭ.
U hałoŭnym domie na pieršym paviersie — prastornaja kuchnia, sumieščanaja ź vielizarnaj haścinaj. Taksama tut jość kabiniet.
Dziakujučy fotazdymkam na sajcie nieruchomaści my možam pabačyć, jak žyła siamja ministra. Usie dyzajn-rašeńni na ŭzroŭni siaredziny 2010-ch.
Na druhim paviersie znachodziacca čatyry spalnyja pakoi. Majstar-spalnia płoščaj kala 22 kvadrataŭ maje svoj vanny pakoj (bolš za 16 kvadrataŭ) i dva harderoby (pa 6 kvadrataŭ).
Try inšyja spalni majuć bolš ścipłyja pamiery — 19, 15 i 13 kvadrataŭ. Sanvuzieł dla ich ahulny.
Samy vialiki pakoj, imavierna, niekali naležaŭ synu Siarhieju — na heta namiakaje spartyŭny kompleks na adnoj sa ścienak. Darečy, niekalki hadoŭ tamu maładoha mužčynu, jaki ŭ toj čas zajmaŭ pasadu namieśnika hienieralnaha dyrektara pa ekanomicy «Biełarusnafty», zatrymlivali pa palityčnych matyvach i dali sutki.
Dačce Patupčyka, padobna, dastaŭsia pakoj u kolerach Barbi — kisłotna ružovyja ścieny dy špalery z bujnymi kvietkami ŭražvajuć.
Samaja maleńkaja spalnia, imavierna, dla haściej — tam navat łožka niama, tolki kanapa.
Na hetym ža paviersie raźmieščana i pralnia.
U rekłamnaj abjavie padkreślivajecca: dom budavaŭsia dla ŭłasnaha pražyvańnia, tamu ŭličvalisia ŭsie niuansy dla kamfortu.
U haściavym domiku jość terasa z kaminam, kuchnia z haścinaj, prybiralnia, duš, saŭna.
Adznačajecca taksama, što dva damy zajmajuć płošču nie bolš za 5 sotak, tamu možna padzialić učastak i pabudavać jašče adzin katedž.
Na ŭčastku vykanany łandšaftny dyzajn. Vysadžany dekaratyŭnyja i pładovyja raśliny. Pa ŭsim učastku, a taksama prylehłaj terytoryi z boku vulicy raźviedzieny aŭtapaliŭ.
Admietna, što, kali Patupčyk tolki atrymaŭ ziamlu, vakoł była tolki małapaviarchovaja zabudova. Ciapier ža adrazu za elitnym katedžam bachnuli 26‑paviarchovy budynak. Jaho žychary mohuć navat bieź binokla nazirać za tym, jak bavić čas ministr u svaim damku. Hety ž vysačezny dom taksama adrezaŭ Patupčyka ad vadaschovišča Drazdy, da jakoha kala 400 mietraŭ.
Uładzimir Patupčyk naradziŭsia ŭ 1958 hodzie ŭ Śvietłahorsku. Skončyŭ Biełaruski politechničny instytut (1980) i Rasijskuju akademiju dziaržaŭnaj słužby pry prezidencie Rasii (2002).
U 1980—1984 pracavaŭ na Mazyrskaj CEC, Śvietłahorskaj CEC i na «Homielenierha», u 1984—1990 — u Śvietłahorskim harkamie KPB. U 1990—1998 — namieśnik staršyni Śvietłahorskaha savieta narodnych deputataŭ, namieśnik mera Śvietłahorska. U 1998—2001 — staršynia kamiteta Homielskaha abłvykankama, u 2001 — mer Mazyra, u 2001—2004 — vice-hubiernatar Homielščyny. U 2004—2006 — pamočnik prezidenta (inśpiektar pa Minsku). U 2006—2009 — ministr pracy i sacyjalnaj abarony, u 2009—2010 — vice-premjer. U 2011—2012 — vice-śpikier savieta respubliki. U 2013—2018 — ministr enierhietyki.
«Naša Niva» — bastyjon biełaruščyny
PADTRYMAĆČutki: adstaŭleny ministr enierhietyki Patupčyk zarabiŭ miljony dalaraŭ na pastaŭkach vuhalu z ŁDNR u Jeŭrasajuz?
Jak čynoŭniki stanoviacca miljanierami. Prykład źniataha za karupcyju ministra enierhietyki Patupčyka
Zatrymany syn byłoha ministra enierhietyki Siarhiej Patupčyk — druhi čałaviek na «Biełarusnafcie». I jašče šerah mieniedžaraŭ
Syn eks-ministra Patupčyka vyjšaŭ na volu, ale vylecieŭ z pazicyi druhoha čałavieka ŭ «Biełarusnafcie»
Ciapier čytajuć
Kudy ciapier jeduć vučycca biełaruskija studenty — top krain i tendencyj8
Kudy ciapier jeduć vučycca biełaruskija studenty — top krain i tendencyj
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie7070
Kamientary