Śmiarotny virus z kruiznaha łajniera pranik u Jeŭropu i pačaŭ pieradavacca ad čałavieka da čałavieka
Prynamsi 23 pasažyry sudna MV Hondius, na borcie jakoha była zafiksavana ŭspyška chantavirusa, užo pakinuli łajnier i viarnulisia dadomu ŭ roznyja krainy śvietu, piša New York Post.
Pavodle słoŭ adnaho z pasažyraŭ, jaki dahetul zastajecca na borcie, ludziej nie papiaredzili pra mahčymaje zaražeńnie, kali jany pakidali sudna padčas stajanki na Śviatoj Alenie ŭ Paŭdniovaj Atłantycy 24 krasavika.
«Aŭstralijec viarnuŭsia ŭ Aŭstraliju, čałaviek z Tajvania — na Tajvań, amierykancy — u roznyja štaty ZŠA. Anhličanin — u Anhliju, niderłandcy — pa damach… Astatnich ja nie pamiataju», — raskazaŭ jon.
Na karabli, jaki ruchaŭsia z Ušuai (pravincyja Arhienciny) da Kabe-Vierde, znachodzilisia 147 čałaviek: 88 pasažyraŭ i 59 členaŭ ekipaža 23 nacyjanalnaściaŭ. Sudna išło pa Paŭdniovaj Atłantycy z prypynkami ŭ Antarktycy, Paŭdniovaj Džoržyi, na astravach Najtynhiejł, Trystan da Kuńja, Śviatoj Aleny i Uźniasieńnia, piša The Moscow Times.
Suśvietnaja arhanizacyja achovy zdaroŭja paviedamiła, što ŭ chvorych, vierahodna, byŭ vyjaŭleny redki štam Andes virus, zdolny pieradavacca ad čałavieka da čałavieka. Śmiarotnaść hetaha štamu moža dasiahać 40%. Ekśpierty ličać, što šyrokaha raspaŭsiudžańnia infiekcyja, chutčej za ŭsio, nie atrymaje, pakolki chantavirus značna mienš zarazny, čym COVID-19.
«Dla pieradačy nieabchodny ciesny kantakt ź bijałahičnymi vadkaściami infikavanaha», — patłumačyŭ Ali Khan, dekan Kaledža hramadskaha zdaroŭja Miedycynskaha centra Univiersiteta Niebraski. Pavodle jaho słoŭ, havorka nie idzie pra karotki kantakt.
Pavodle danych arhiencinskich śledčych, krynicaj zaražeńnia na borcie mahła stać siamiejnaja para ź Niderłandaŭ.
Miarkujecca, što jany zarazilisia ad hryzunoŭ padčas ekskursii pa nazirańni za ptuškami va Ušuai (Arhiencina) za niekalki dzion da vychadu sudna z porta 20 sakavika.
70‑hadovy mužčyna pamior 11 krasavika, amal za dva tydni da stajanki sudna na Śviatoj Alenie. Jaho žonka, jakaja paźniej taksama pamierła ad infiekcyi, syšła na bierah razam ź ciełam muža i jašče amal dvuma dziasiatkami pasažyraŭ.
Paźniej pamierła 78‑hadovaja hramadzianka Hiermanii, a jak minimum jašče vosiem čałaviek zastajucca z padazreńniem na infiekcyju i zachvareli na borcie sudna. Pavodle danych apieratara karabla Oceanwide Expeditions, niekalki ciažkachvorych pasažyraŭ byli pieradadzieny miedycynskim bryhadam u Niderłandach.
Siarod evakujavanych akazaŭsia i karabielny doktar, stan jakoha raniej aceńvaŭsia jak ciažki, ale paźniej palepšyŭsia.
Adzin pasažyr sa Šviejcaryi, jaki viarnuŭsia dadomu razam z žonkaj, u sieradu atrymaŭ stanoŭčy test na chantavirus. Spačatku jaho špitalizavali ŭ Ciurychu, adnak pieršy analiz akazaŭsia admoŭnym, pakolki virus moža zastavacca ŭ schavanaj formie da vaśmi tydniaŭ. Ułady Ciurycha zajavili, što «dla nasielnictva Šviejcaryi ryzyki niama».
U Francyi taksama rasśledujecca mahčymy vypadak zaražeńnia ŭ čałavieka, jaki nie znachodziŭsia na borcie sudna. Miarkujecca, što kantakt moh adbycca padčas avijapieralotu z adnym ź infikavanych pasažyraŭ.
Akramia taho, pavodle danych niderłandskaha telekanała RTL, ściuardesa ź niderłandskaha horada Haarlem była špitalizavanaja z padazreńniem na infiekcyju paśla kantaktu ŭ Jochanesburhu z 69‑hadovaj hramadziankaj Niderłandaŭ, jakaja paźniej pamierła ad virusa.
Taksama 65‑hadovuju hramadzianku Hiermanii, jakaja znachodziłasia na borcie turystyčnaha sudna Hondius, dastavili va ŭniviersiteckuju kliniku Dziusieldorfa. Pavodle zajavy daktaroŭ, špitalizacyja stała mieraj zaściarohi: u žančyny pakul niama simptomaŭ i jana ličycca tolki kantaktnaj asobaj. Pacyjentka kantaktavała z pamierłaj niemkaj.
***
Pavodle danych SAAZ, ludzi najčaściej zaražajucca paśla kantaktu z mačoj, ślinaj abo fiekalijami infikavanych hryzunoŭ. Taksama virus moža trapić u arhanizm praz pył u zakrytych abo drenna vientylavanych pamiaškańniach.
Siarod asnoŭnych simptomaŭ chantavirusu:
- vysokaja tempieratura;
- hałaŭny bol;
- bol u myšcach;
- młosnaść i vanity;
- bol u žyvacie;
- kašal i dychavica.
U ciažkich vypadkach chvaroba moža chutka pryvieści da prablem z dychańniem, nazapašvańnia vadkaści ŭ lohkich abo nyračnaj niedastatkovaści.
Ciapier čytajuć
Adstaŭny ministr-karupcyjanier pradaje reśpiektabielny katedž kala Drazdoŭ. Prosić $2 miljony3
Kamientary