Kiraŭniki čyhunačnaj pramysłovaści Francyi vymušanyja pryznać kanfuz.
Alstom i kanadskaja Bombardier śpiecyjalna dla rehijanalnaj sietki čyhunak pabudavali 341 pasažyrski ciahnik, vydatkavaŭšy kala 15 młrd jeŭra. Ich ekspłuatacyja pavinna pačacca da kanca 2016 hoda. Ale prablema ŭ tym, što jany zanadta vialikija dla mnohich stancyj.
Ministr transpartu Frederyk Kiuvije nazvaŭ situacyju trahikamičnaj. Nieabchodna pierabudavać kala 1300 płatformaŭ pa ŭsioj Francyi, kab jany mahli pryniać novyja ciahniki. Heta abyjdziecca ŭ 50 młn jeŭra.
Jak zajavili dziaržaŭnaja čyhunačnaja kampanija SNCF i apieratar čyhunačnaj sietki RFF, novyja ciahniki byli pabudavanyja pa mižnarodnych standartach. Ale ich vahony (usiaho bolš za 2000) akazalisia zanadta šyrokimi dla mnohich stancyj. Vidavočna, zamaŭlajučy ciahniki, SNCF i RFF nie ŭličyli, što mnohija płatformy byli pabudavanyja da pryniaćcia hetych standartaŭ kala 30 hadoŭ tamu. Tamu RFF pieradała SNCF niasłušnyja pamiery płatformaŭ.
Pamyłku znajšli «troški zapozna», pryznaŭ prezident RFF Žak Rapaport. «Heta jak kali b vy kupili novy Ferrari i zrazumieli, što jon nie źmiaščajecca ŭ haražy. Tamu što da hetaha ŭ vas nie było Ferrari», — skazaŭ radyjostancyi France Info Krystof Ṕjanael, dyrektar RFF pa suviaziach z hramadskaściu.
Pryčynaj taho, što adbyłosia, Kiuvije nazvaŭ błytaninu ŭ čyhunačnaj sistemie, vyklikanuju padziełam funkcyj pamiž SNCF i RFF niekalki hadoŭ tamu. Hetaha patrabavali zakony Jeŭrasajuza, jaki takim čynam chacieŭ zrabić sistemu bolš kankurentnaj. Tamu ŭrad Francyi nastojvaje na praviadzieńni reformy. Tady b apieratary ciahnikoŭ i čyhunačnych sietak znachodzilisia pad kryłom adnoj kaardynujučaj arhanizacyi, ale, pakolki pamiž imi zachoŭvaŭsia b padzieł, praviły ES nie parušalisia b.
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty49
Kamientary