Nielha zmahacca za svaje pravy ŭ adzinočku.
Pra heta ŭ intervju sajtu charter97.org skazaŭ były palitviazień, pradprymalnik i vieteran vajny ŭ Afhanistanie Mikałaj Aŭtuchovič, kamientujučy pačatak zabastovak pradprymalnikaŭ u Biełarusi ŭ suviazi ŭkazam Łukašenki №222.
— Jak vy dumajecie, ci pryniasuć vynik pratesty pradprymalnikaŭ va ŭsioj krainie?
— Pastaŭlenych metaŭ našy pradprymalniki nie dabjucca, ułady ich nie čujuć. Ale plusy jość — ludzi pačynajuć aburacca. A to my ŭžo tak dehradavali, što navat baimsia słova skazać.
— Jak by vy paraili ludziam zmahacca za svaje pravy?
— U hetych spravach ciažka davać parady. Kožny čałaviek pavinien prosta zastavacca čałaviekam. Navat kali ja zaraz i skažu niejkija rečy, bo nie ŭsie pačujuć, nie ŭsie zrazumiejuć… Jany ž zmahajucca tolki za svajo. Kali budzie prablema ŭ čužoha, u susieda — jany nie buduć zmahacca. Vy dumajecie, ja nie viedaju ciapier situacyi tut, u Vaŭkavysku? Viedaju, ja ž chadžu na rynki. Tyja, chto handluje rečami — jany aburajucca, ale ja viedaju, što jany nie buduć strajkavać. A tyja, chto pobač, ich susiedzi, jakija handlujuć zapčastkami i chimijaj — jany naŭrad ci ich padtrymajuć. Choć zrazumieła, što kali sydzie rečavy rynak, ludzi stanuć mienš chadzić za tymi ž myjnymi i zapčastki, bo jość miescy, dzie možna bližej kupić. Jany nie razumiejuć, što heta ŭsio ŭzajemaźviazana. A navat tyja, chto razumieje — jany ŭsio roŭna buduć maŭčać i nie vyjduć.
Kamu robiać baluča — tyja piščać, a astatnija prosta za hetym nazirajuć, chiba što tolki spačuvajuć. Da ludziej dachodzić tolki tady, kali ich nahaniaje biada, razumiejecie?
— Vidavočna, što pry hetaj uładzie IP zaŭsiody buduć na miažy poŭnaha źniščeńnia. Moža, para narešcie pierachodzić u adkrytuju apazicyju?
— My ŭžo daŭno pierajšli hetuju miažu. My ŭžo daŭno pavinny byli aburacca, bo ŭ nas adbyvajecca šmat takoha, čaho b za miažoj, va ŭsiakaj krainie Jeŭropy, narod prosta b nie paciarpieŭ. U nas narod tryvaje ŭsio. Zaŭtra nam skažuć płacić za pavietra — budziem płacić za pavietra. Siońnia nam nielha plaskać, a zaŭtra nam užo nielha budzie ŭśmichacca. Ludzi maŭčać, maŭčać, maŭčać… Ale kožnaja maleńkaja kanfliktnaja situacyja moža dać takuju iskru, što pojduć na vulicy ŭsie.
Kamientary