Hurt Dzieciuki zapisaŭ dla prajektu «Re:Pieśniary» pieśniu «A chto tam idzie» na klasyčny vierš Janki Kupały, jaki pa-raniejšamu nadzvyčaj aktualny.
Pieśnia «A chto tam idzie» u vykanańni «Pieśniaroŭ» ličycca rarytetnaj. Jana aficyjna nie vydavałasia i była zapisanaja dla mastackaha filmu «Raskidanaje hniazdo» režysera Barysa Łucenki, jaki pabačyŭ śviet u 1982 hodzie na 100-hodździe paeta. Mulavin nieadnojčy kazaŭ, što Janka Kupała – jaho samy ŭlubiony paet, jaki adkryŭ dla jaho biełaruski suśviet. Tamu na jaho vieršy stvaralisia nia tolki asobnyja vieršy, ale i cełyja cykli. Aryhinalnuju muzyku da hetaj pieśni napisaŭ słavuty kampazytar Siarhiej Kartes, na toj čas hałoŭny muzyčny redaktar kinastudyi «Biełaruśfilm». Siarhiej Albiertavič daŭ asabisty dazvoł na vykarystańnie kampazycyi ŭ prajekcie «Re:Pieśniary».
Mienavita za pieraasensavańnie hetaha śpievu ŭziaŭsia folk-pank hurt Dzieciuki. U ich interpretacyi z dudoj i akardyjonam jana nabyła maršavuju afarboŭku. «Nam padajecca, što jana pasuje pad naš imidž, kali tak možna kazać. Nam pryjšłosia papacieć, bo pieśnia vielmi składana arynžyravana! U našym varyjancie jana vyjšła kačova-maršavaj, davoli ciažkoj i nie zusim ułaścivaj dla nas u muzyčnym planie», – kaža vakalist kamandy Aleś Dzianisaŭ. Muzyka pryznajecca, što ŭ časy svajoj pank-maładości ŭsprymaŭ «Pieśniaroŭ» za aficyjny hurt, tvorčaść jakoha jaho zusim nie zachaplała. Ale ź ciaham času źmianiŭ svajo staŭleńnie: «Pieśniary - heta nia tolki vizytoŭka Biełarusi, ale sapraŭdy Źjava ź vialikaj litary! Z muzyčnaj kropki pohladu hety hurt dakładna na dziesiać hałoŭ vyšej za ŭsialakija «Vierasy» i «Siabry». Plus jany, u adroźnieńni ad vyšej pieraličanych, zaŭsiody staralisia dystancavacca ad ułady i zajmacca mienavita muzykaj».
«A chto tam idzie» moža ŭvajści ŭ stały kancertny repiertuar hurta. Muzyki miarkujuć, što ŭžyvuju jana budzie bolš charavoj, bo słovy hetaj pieśni pavinien viedać kožny biełarus.
A chto tam idzie, a chto tam idzie
U ahromnistaj takoj hramadzie?
– Biełarusy.
A što jany niasuć na chudych plačach,
Na rukach ŭ kryvi, na nahach u łapciach?
– Svaju kryŭdu.
A kudy ž niasuć hetu kryŭdu ŭsiu,
A kudy ž niasuć napakaz svaju?
– Na śviet ceły.
A chto heta ich, na adzin miljon,
Kryŭdu nieść naŭčyŭ, razbudziŭ ich son?
– Biada, hora.
A čaho ž, čaho zachaciełasia im,
Pahardžanym viek, im, ślapym, hłuchim?
– Ludźmi zvacca.
Pasłuchać pieśniu možna na sajcie Tuzin.fm.
Ciapier čytajuć
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju3
Kamientary