Facebook vypuściŭ prahramu dla słabych smartfonaŭ
Sacyjalnaja sietka Facebook pakłapaciłasia pra ŭładalnikaŭ starych telefonaŭ na Android.
Prahrama pad nazvaj Facebook Lite dasiažnaja praz Play Store pakul tolki dla abmiežavanaj kolkaści krain u Azii i Afrycy. Ź Biełarusi spampavać jaje kopiju na svoj strach i ryzyku možna, naprykład, adsiul. U śpisie prahram jana źjavicca pad nazvaj «Lite».
Prahrama źjaŭlajecca sproščanaj źniešnie, ale amal nie pazbaŭlenaj asnoŭnaha funkcyjanału viersijaj asnoŭnaj prahramy Facebook dla smartfonaŭ. Jana patrabuje viersiju Android 2.2 albo naviejšuju. U joj možna čytać i kamientavać zapisy, dadavać ułasnyja zapisy i fota. Trafik ściskajecca z raźliku na słaboje 2G-złučeńnie. Što važna, jana dazvalaje vieści pierapisku biez dapamohi bakovaj prahramy Messenger.
Facebook Lite «važyć» tolki 700 Kb na telefonie, u apieratyŭnaj pamiaci zajmaje kala 30 Mb.
Vierahodna, jana spadabajecca nie tolki ŭładalnikam słabych smartfonaŭ.
Asnoŭnuju prahramu Facebook ciažka vykarystoŭvać uładalnikam starych smartfonaŭ, jana patrabuje šmat pamiaci i sistemnych resursaŭ. Dadatkovaja prablema — nieabchodnaść asobnaj prahramy dla pierapiski. Razam jany «važać» 54 Mb i zajmajuć u «apieratyŭcy» 80-120 Mb.
Prahrama Facebook Lite, jak i asnoŭnaja prahrama Facebook, pakul nie padtrymlivaje biełaruski interfejs, ale padtrymlivaje ruski.
Prahrama vidavočna raźličanaja na ekspansiju na rynki biednych krain, na jakich u bližejšy čas čakajecca najbolšy rost karystalnikaŭ. Dziela padtrymki takich rynkaŭ Facebook i inšyja IT-hihanty zapuścili prajekt Internet.org, u miežach jakoha daduć biaspłatny dostup da častki internetu (naviny, adukacyja, pošuk pracy, nadvorje, Vikipiedyja, sacsietki…) biednym krainam. Anałahičny Project Loon raspačała Google.
Kamientary