U kancy 2012 hodu Minabarony RF uviało niehałosnuju zabaronu na zakupku techniki vytvorčaści i Minskaha zavoda kołavych ciahačoŭ «Vołat» — zamiest ich płanavałasia vykarystoŭvać šasi vytvorčaści KamAZa i UrałAZa.
Mašyny MZKC vazili i voziać, naprykład, rasijskija mižkantynientalnyja jadziernyja rakiety.
Zabarona vykarystoŭvałasia ŭ jakaści šantažu Biełarusi, bo ŭ 2012-2013 hodzie Maskva staviła rubam pytańnie ab pakupcy MZKC.
Adnak biełaruskaje «familnaje srebra» hetak i nie trapiła ŭ čužyja ruki, rasiejskija zavody hetak i nie zmahli pakul stvaryć kankurentaŭ šasi MZKC, i dla novych rakiet i bajavych sistem rasiejcam znoŭ spatrebilisia jakasnyja specyjalizavanyja biełaruskija płatformy.
Płanujecca, što na biełaruskija koły stanie i novy rasijski zienitna-rakietny kompleks siaredniaj dalnaści Buk-M3, paviedamiŭ viadomy biełaruski vajenny analityk i žurnalist Alaksandr Alesin.
Buk-M3 budzie pryniaty na ŭzbrajeńnie armii RF da kana biahučaha hodu, a z 2016 hodu pačnie pastupać u vojski. Šasi pad Buki atrymała indeks MZKC-69221. Niezaležnaja hidrapnieŭmatyčnaaja padvieska ŭłasnaj raspracoŭki nadaje kołavaj bazie vysokuju płaŭnaść choda, što zabiaśpiečvaje stabilnaść pracy ŭstalavanaha abładavańnia.
Šasi ź siamiejstva MZKC-6922 majuć aŭtamatyčnuju hidramiechaničnuju tranśmisiju HMP-400 taksama ŭłasnaj raspracoŭki, jakaja razam z šynami 525/70R21 z palepšanymi charaktarystykami zabiaśpiečvaje vysokuju prachodnaść.
U kamplektacyju taksama ŭvachodziać kamiery źniešniaha ahladu, jakija zdolnyja pracavać u roznych śpiektralnych dyjapazonach, i bartavaja infarmacyjna-kiravalnaja sistema.
U paraŭnańni z husieničnymi šasi kołavaja baza MZKC patrabuje ŭ razy mienšuju kolkaść paliva, vialiki resurs da kapitalnaha ramontu i nie psuje darohi.
MZKC raspracavaŭ taksama pieršy ŭ historyi biełaruski BTR «Umka» i ŭdzielničaje ŭ kitajskaj prahramie stvareńnia kołavych šasi dla mižkantynientalnych balistyčnych rakiet, piša rasijski vajenny błohier bmpd.livejournal.com.
Kamientary