Padatkovaja pra toje, jak buduć šukać «darmajedaŭ»: «Chadzić pa kvaterach nichto nie źbirajecca»

Adno z hałoŭnych pytańniaŭ, jakoje źjaviłasia paśla pryniaćcia Dekreta «Ab papiaredžańni sacyjalnaha ŭtrymanstva», źviazany z tym, jak mienavita ŭłady buduć vyjaŭlać «darmajedaŭ». U Ministerstvie pa padatkach i zborach FINANCE.TUT.BY rastłumačyli, što dla hetaha stvorać śpiecyjalnuju bazu dadzienych, ź jakoj možna daviedacca, chto pracuje, a chto — nie.

Pavialičyć

«Chadzić pa dvarach i kvaterach, kab vyjaŭlać niepracujučych hramadzian, nichto nie budzie, — kaža načalnik hałoŭnaha ŭpraŭleńnia padatkaabkładańnia fizičnych asob Ministerstva pa padatkach i zborach Michaił Rasolka. — Prapisana, što na praciahu troch miesiacaŭ Saŭmin pavinien vyznačyć paradak uzajemadziejańnia dziaržaŭnych orhanaŭ i arhanizacyj u metach realizacyi hetaha dekreta».

Michaił Rasolka nahadaŭ, što fizičnaja asoba sama moža pryjści ŭ padatkovy orhan z 1 žniŭnia pa 31 maja i zajavić ab tym, što jana nie ŭdzielničała ŭ finansavańni dziaržaŭnych raschodaŭ. Za heta hramadzianin atrymaje źnižku pa vypłacie zboru «za darmajedstva» u pamiery 10%. Heta značyć vypłacić u biudžet treba budzie nie 20 bazavych vieličyń, a 18 (nie 3,6 młn rubloŭ, a 3 240 000 rubloŭ). Termin vypłaty zboru — nie paźniej za 1 lipienia 2016 hoda.

Tych, chto nie zachoča dobraachvotna pryznacca ŭ «darmajedstvie», buduć vyjaŭlać «nie ŭručnuju, a aŭtamatyčna». Jak raspavioŭ načalnik hałoŭnaha ŭpraŭleńnia padatkaabkładańnia fizičnych asob, płanujecca raspracavać śpiecyjalnaje prahramnaje zabieśpiačeńnie, dziakujučy jakomu źjavicca baza dadzienych ab pracujučych i niepracujučych.

«Naprykład, VNU padaduć źviestki pra studentaŭ dzionnaj formy navučańnia, Fond sacyjalnaj abarony nasielnictva — ab płacielščykach uznosaŭ i atrymalnikach piensij i dapamoh, arhanizacyi — pra svaich rabotnikaŭ i hetak dalej, — kaža Michaił Rasolka. — U vyniku mietadam vyklučeńnia my atrymajem dadzienyja ab tych, chto nie pracuje i nie ŭdzielničaje ŭ finansavańni dziaržaŭnych raschodaŭ. Voś hetyja hramadzianie i atrymajuć paviedamleńni na vypłatu zboru». Nahadajem, raźličycca z kaznoj za «darmajedstva» ŭ 2015 hodzie ŭ hetym vypadku treba budzie da 15 listapada 2016 hoda.

Atrymlivajecca, što možna budzie ŭvieści ŭ bazu dadzienych proźvišča hramadzianina i adrazu daviedacca, «darmajed» jon ci nie. Sfarmiravany taki rejestr budzie da kanca hoda. Heta značyć, pieršyja paviedamleńni na vypłatu novaha padatku biełarusy atrymajuć nie raniej studzienia 2016 hoda.

Jak skazana ŭ dekrecie, «zbor, apracoŭka, zachoŭvańnie, vykarystańnie piersanalnych dadzienych hramadzian ažyćciaŭlajecca bieź ich piśmovaj zhody z zachavańniem patrabavańniaŭ, vyznačanych zakanadaŭčymi aktami pa abaronie infarmacyi, raspaŭsiudžvańnie i (abo) pradastaŭleńnie jakoj abmiežavana».

Akramia taho, jak udakładniŭ Michaił Rasolka, kali vyśvietlicca, što ŭ niepracujučych hramadzian vydatki pieravyšajuć dachody, im pryjdziecca na praciahu 30 dzion pradstavić u padatkovuju tłumačeńni pra krynicy prybytku. «Naprykład, čałaviek pracavaŭ adzin dzień u hodzie, ale kupiŭ aŭtamabil za 100 tysiač dalaraŭ», — patłumačyŭ pradstaŭnik MPZ. Kali tłumačeńni nie buduć pradastaŭleny, hramadzianinu naličać jašče i padachodny padatak.

Paśla atrymańnia paviedamleńnia na vypłatu «padatku na darmajedstva» ŭ hramadzian budzie 30 dzion dla taho, kab dakazać svoj udzieł u finansavańni dziaržaŭnych raschodaŭ. Naprykład, kali hramadzianin nie znachodziŭsia na terytoryi Biełarusi bolš za 183 dzion, jamu treba budzie pradastavić dokazy: adznaki ŭ pašparcie ab rehistracyi ŭ inšaj dziaržavie, damovu z zamiežnym pracadaŭcam, adznaki ab vyjeździe-ŭjeździe, dahavor ab arendzie kvatery ŭ inšaj krainie i hetak dalej. Takim čynam, kali hramadzianin pracavaŭ na terytoryi Rasii nielehalna i biez rehistracyi, to ŭ Biełarusi jon budzie ličycca «darmajedam» i jamu pradjaviać da vypłaty zbor.

Nahadajem, za niavypłatu zboru «za darmajedstva» praduhledžany štraf ad dvuch da čatyroch bazavych vieličyń abo administracyjny aryšt.

• 0
• 0
• 0
• 0
• 0
• 0
• 0
• 0