Alaksandr Łukašenka 29 krasavika źviarnuŭsia sa štohadovym Pasłańniem da biełaruskaha naroda i Nacyjanalnaha schodu. Asnoŭnyja kirunki palityki krainy zastajucca niaźmiennymi, zavieryŭ jon.
13.40
Pry kancy było jašče niekalki pytańniaŭ na ekanamičnuju i sacylnuju prablematyku, u tym liku ab prahramie raźvićcia vodazabieśpiačeńnia i kanalizacyi.
13:15
Pytańnie ad deputata Abalenskaha ad Salihorskaj vybarčaj akruhi nakont taho, jakim Alaksandr Łukašenka bačyć udzieł ZŠA ŭ vyrašeńni ŭkrainskaha kanfliktu.
«Minskija pieramovy — heta najpierš zasłuha prezidentaŭ Rasii i Ukrainy. Vajna navat nie ŭ našaha hanku, jana idzie ŭ nas. Pakul jašče vajna ŭ nas nie haračaja. Našy vajujuć z abodvuch bakoŭ. Pakul što adzinki. Vajna niekali skončycca, ale hetyja bajeviki, jakija paniuchajuć kryvi viernucca siudy. Mianie heta chvaluje.
Haračy punkt va Ukrainie – heta naš bol. Ja rablu ŭsio, kab kanflikt nie vychodziŭ za miežy Danbasa.
Ja kazaŭ «Błumbierhu», što nie viedaju metu amierykancaŭ u vajnie. Ja skazaŭ, kali vy chočacie miru, to ŭklučyciesia ŭ pieramovy pa Ukrainie. Kali ZŠA, jak asnoŭny hulec u śviecie, samaja mahutnaja dziaržava ŭ vajennym płanie, zachoča miru, to budzie mir. Chiba heta kiepska, što Amieryka dałučycca da «narmandskaha farmatu»? Kali ZŠA zojmie inšuju pazicyju, to miru nie budzie», — doŭha i trochi ŭchilista tłumačyŭ Alaksandr Łukašenka.
13:07
«My majem płany ŭ vypadku niebiaśpieki padniać i ŭzbroić paŭmiljona biełarusaŭ. Heta budzie dastatkova, kab supraćstajać lubym zadumkam suprać Biełarusi».
«My zrobim usio, kab zabiaśpiečyć mir, niezaležnaść i dynamičnaje raźvićcio našaj krainy», — skončyŭ svoj dvuchhadzinny vystup Alaksandr Łukašenka.
Zaraz pavinny pačacca pytańni ad deputataŭ.
13:04
«Ruski śviet — heta nie pra nas. My ruskija ludzi, ale heta nie značyć, što my rasijanie, my — biełarusy. Dazvolcie nam mieć svoj punkt hledžańnia na śviet», — skazaŭ Łukašenka na adras Rasii. Ale litaralna praz chvilinu jon zajaviŭ procilehłaje: «My pryjedziem 8 maja ŭ stalicu našaj radzimy — našaj byłoj radzimy — Maskvu. I prademanstrujem, što my ruski śviet».
12:59
«My pryjdziem da zbližeńnia Jeŭrazijskaha sajuza i Jeŭrapiejskaha sajuza. Dziela zbudavańnia Jeŭropy ad Cichaha da Atłantyčnaha akijanaŭ».
Potym jon pačaŭ šmat havaryć, što «biełarusy i rasijanie — heta adzin ruski narod. «Dumka łunaje nie tolki ŭ libierałaŭ rasijskich, ale i ŭ častki kiraŭnictva, što Łukašenka zrabiŭ kren na Zachad. Moža, niechta zvarjacieŭ i ŭziaŭ kren na Zachad, ale nie my».
«Ja ŭsim zachodnikam, amierykancam kažu: «Mužyki, kali što adbudziecca my budziem z Rasijaj». Łukašenka nazvaŭ «durnoćciem i hłupstvam» dumku, što jon admoviŭsia jechać u Maskvu na parad 9 Maja va ŭhodu Zachadu.
«My pryjedziem 8 maja ŭ stalicu našaj radzimy — Maskvu. I prademanstrujem, što my ruski śviet».
Razam z tym Łukašenka, vidavočna źviartajučysia da Rasii, kaža, što my chočam žyć u asobnaj kvatery, a nie ŭ cieščy ci śviekryvi: «My nie zabaranili hieorhijeŭskija stužki, my zrabili svaje. Małajcy kamsamolcy našy», — skazaŭ kiraŭnik krainy.
12.40
Łukašenka patrabuje kadravych pieramien u najvialikšych dziaržaŭnych ŚMI.
Łukašenka vykazaŭ niezadavolenaść pracaj dziaržaŭnych telekanałaŭ, choć i nazvaŭ kiraŭnikoŭ telekanałaŭ svaimi siabrami. «U nas niekatoryja ŭ ŚMI zasiedzielisia, pracavać nie chočuć», — skazaŭ Łukašenka.
12.38
Łukašenka parekamiendavaŭ čynoŭnikam i asabliva deputatam Nacyjanalnaha schodu razmaŭlać z apazicyjaj.
«Nie ŭsie ŭ apazicyi hadkija, nie ŭsie chočuć kiepskaha dla krainy. Uzhadajcie apošniuju zajavu adnaho ź dziejačaŭ, nie pomniu ź jakoj arhanizacyi, što my možam iści ŭ prezidenty tolki ŭzvažyŭšy adkaznaść, što pry nas nie budzie horš. Heta samaja važnaja zajava apazicyi za ŭsie maje hady. Zrazumieli narešcie».
«Nie admaŭlajciesia ad dyskusii z apazicyjaj, siabrujcie ź imi — nichto nie zabaraniaje», — padkreśliŭ Alaksandr Łukašenka.
12:28
Alaksandr Łukašenka namiaknuŭ, što zarobki ŭ krainie paskorana raści nie buduć.
«Kali my nie možam pavysić zarobki — nie treba pavyšać. U nas ža pra heta nichto nie prosić».
12.27
Łukašenku pachvaliŭ kiraŭnika Katalickaj carkvy Biełarusi Tadevuša Kandrusieviča za spartovy ład žyćcia: jon hulaje ŭ mini-futboł i jeździć na rovary.
12.26
U VNU šmat dublujučych fakultetaŭ, ale nie chapaje bolš vuzkich śpiecyjalistaŭ, kaža Łukašenka.
12.25
Alaksandr Łukašenka nazvaŭ nieefiektyŭnaj dziaržaŭnuju palityku ŭ halinie kultury. Jon zapatrabavaŭ stvareńnia prostych biełaruskich sieryjałaŭ na ŭzor tych, jakija zdymajuć rasijskija telekanały.
«U kulturu ŭkładzienyja niemałyja hrošy. Ale žadanaj addačy pakul niama. Rasija stvaryła stolki prościeńkich, lohkich filmaŭ. Mnie spadabaŭsia film «Leninhrad-46», «Laśnik». Jany ž u Minsku zdymajucca. U tych zakutkach, jakija navat Ładućka nie naviedvaŭ. Niaŭžo my nie možam stvaryć takija filmy? Ludzi b hladzieli. U paścielach, hladžu, kuvyrkajucca našy dziaŭčatki biełaruskija z ruskimi mužykami. Ludziam nadakučyła hetaja abnažonka.
U nas ministr kultury, jak myš pad vienikam. Nam narmalnyja filmy patrebnyja. Pieśni, kazki. Dobra, što rasiejcy heta robiać. Ale i my pavinny svoj układ rabić».
12:14
«Šapira ŭ sinahozie maliŭsia. Tolki ŭ Minskaj vobłaści idzie doždž». Apładysmienty. «Małojca, Siamion Barysavič!»
Potym Łukašenka jašče raz zhadaŭ jaŭreŭskija karani Šapiry. «Nijak nie ŭdajecca ŭziać Zisiera z tut.by pad kantrol. Jon siabie viadzie nieprystojna. Ja daručyŭ jamu [Šapira — «NN»] uziać pad kantrol usich jaŭrejaŭ u Biełarusi, navat Pavieł Jakubovič byŭ nie suprać… Zisieru ŭsio niajmiecca», — pahroźliva zaŭvažyŭ jon.
12:08
«Što za drymučaść? Čamu ŭ vysokaha duchavienstva niama dziaciej? Ja pytajusia ŭ našych relihijnych dziejačaŭ, jakija ahitujuć za siamju, a kolki ŭ vas dziaciej, Vaša śviaciejšastva, vysokapravaschadzicielstva? «Niama», — adkazvajuć. Jak ty možaš ahitavać za siamju, kali svaich nie maješ? Adčuvaju, dzieści ŭcichuju kasiačać na staranie. I ja navat viedaju, što kasiačać».
Nuncyj Hudžeroci zarahataŭ pry hetych słovach. Voś videa:
12:02
U Łukašenka zbolšaha čytaje pa papiercy, čytaje chutka. Vielmi mała adstupleńniaŭ.
Była adna razmova z kiraŭnikom Administracyi prezidenta Alaksandram Kosincam: «Kolki zavieźli hruzavikoŭ z-za miažy?». — «6200», — adkazaŭ Kosiniec.
Na što Łukašenka skazaŭ, što MAZ prosić na ŭnutrany rynak kupić chacia b 2000 mašyn.
«Umiejuć rabić usio, — kaža Łukašenka ab biełaruskaj miedycynie. — Vyniali z čałavieka ŭsie orhany i pierasadzili, i žyvie jašče». Uzhadaŭ pra apieracyju byłomu kiraŭniku izrailskaha «Masada», kali astatnija admovilisia.
«85% usich rabot na AES robiać mienavita biełarusy. Heta supierśpiecyjalisty, jakija ŭmiejuć rabić usio i ni razu jašče nie budavali atamnych stancyj».
11:44
U nastupnym hodzie Łukašenka abiacaje ŭviadzieńnie maratoryju rostu na staŭki padatkaŭ.
«Nie błytajcie štości z čymści. Chto rupicca ab pradpryjemstvie, ab kalektyvie — nikoli nie budzie pakarany», — adznačyŭ Łukašenka.
«Čamu vyrablajučy ŭłasnyja chaładzilniki, my ŭvozim chłam z-za miažy?». Łukašenka kaža, što padtrymlivajučy vytvorčaść ułasnych chaładzilnikaŭ i televizaraŭ, my padtrymlivajem vytvorčaść i ŭ Rasii, i ŭ Kazachstanie.
11:30
Ton pramovy Alaksandra Łukašenki siońnia vielmi papuliscki.
Kaža, što ceny raści nie buduć i krytykuje čynoŭnikaŭ.
«Kali chtości va ŭradzie choča kiravać z kabinieta, hledziačy z akna to heta nie toj padychod. Jany pavinny bačyć pradpryjemstva, razumieć, jakija tam pracesy adbyvajucca. Ale heta nie značyć, to ministr kožny dzień budzie biehać pa pradpryjemstvach».
«My nie budziem šukać dziasiatkaŭ faktaŭ, kab pradjavić abvinavačvańni kiraŭniku, dastatkova adnaho fakta, što jon bandziuha i złodziej. Kolkaść pravierak budzie źnižacca».
«Źnižeńnie inflacyi – pryjarytetnaje dla nas zadača. U nas ža rost cen u asnoŭnym ad Kabiakova. Heta bolš być nie pavinna. U nas ceny ŭsie pad kantrolem. Kali nam u pačatku hoda treba było strymać «zarvaŭšychsia», my heta zrabili».
11.19
Naša budučynia rašajecca nie na płoščach, a ŭ ekanomicy, skazaŭ Łukašenka.
«Naša budučynia nie rašajecca nie na frantach i płoščach, a ŭ ekanomicy, ale i tut my sutykajemsia z našaj lanotaj. Mnohija našy pradpryjemstvy zahružanyja i nie znachodziać rynkaŭ zbytu. Heta niepryjemnyja pytańni i lahčej za ŭsio było b syści ad ich. Ale my adkryta havorym pra heta. Nijakaha papulizmu».
Pryčynami kryzisu Łukašenka nazyvaje sankcyi suprać Rasii, padzieńnie cenaŭ na naftu. «Prablemy susiedziaŭ stanoviacca našymi ŭłasnymi».
Łukašenka abiacaje da kanca hoda važnyja rašeńni ŭ śfiery ekanomiki.
11.10
«Uroki vajny mahli zabycca, chto zaŭhodna, ale nie biełarusy. Mir, paradak i niezaležnaść Biełarusi — najvyšejšyja kaštoŭnaści. Baraćba za heta idzie ŭ ekanomicy. Mienavita ŭ ekanomicy — harantyja niezaležnaści i zaruka miru, i akurat ekanomika pieražyvaje ciapier nie najlepšyja časy».
11.05
Zvarot pačaŭsia ab 11.00. Kiraŭnik krainy nie zatrymaŭsia. Vystupleńnie tranślujecca ŭ žyvym efiry pa telekanale «Biełaruś-1» i Pieršym nacyjanalnym kanale Biełaruskaha radyjo.
Na pasiedžańni prysutničaje 54 členy savieta respubliki i 109 deputataŭ pałaty pradstaŭnikoŭ
Paśla prasłuchoŭvańnia himna Łukašenka pačaŭ pramaŭlać, pačynajučy ź nievialikaha ŭstupu.
«Ja razumieju, što jon budzie ŭsialak abmiarkoŭvacca. Budzie šmat razmovaŭ, interpretacyj. Pasłańnie budzie svojeasblivym, aktualnym, uličvajučy ŭsie mierapryjemstvy, što projduć zaŭtra, paślazaŭtra, ciaham hoda».
Łukašenka z pačatku pačaŭ havaryć pra insinuacyi adnosna 70-hodździu Pieramohi. «My damaŭlalisia, što my ciaham hoda praviadziom minimum try narady – pa sielskaj haspadarcy (pryjšoŭ čas padvieści vyniki ŭsiamu hetamu barachtańniu), žyllova-kamunalnym pytańniam, pa adukacyi».
Jon akcentavaŭ uvahu, što šmat pytańniaŭ vyklikaje siaredniaja škoła, prahramy jakoj nie adpaviadajuć uzrostu vučniaŭ.
«Ja nie stanu chavać, pieradvybarčaja prahrama prezidenta, ułady, budzie akamulacyjaj tych pytańniaŭ, jakija my vyrašyli».
Ciapier čytajuć
Ad rekietu da prodažu fota mahił. Jak vyhladaje znutry hrupoŭka Project X, jakaja viarbuje ludziej dla pieravozki mihrantaŭ ź Biełarusi ŭ ES4
Kamientary