Staršynia Rady BNR źviarnułasia da biełaruskich supołak z nahody mierapryjemstvaŭ 25 Sakavika.
** *
Darahija Surodzičy!
U 2008 hodzie biełarusy ŭva ŭsim śviecie adznačajuć 90-tyja ŭhodki BNR.
Dzievianosta hadoŭ tamu, u nadzvyčaj ciažkich umovach, naš narod znajšoŭ u siabie advahu i siłu abvieścić śvietu, što jon taksama choča być haspadarom ŭ svajej chacie. Ustaŭnyja Hramaty BNR, i mienavita Akt 25-ha Sakavika, jość najbolš kaštoŭnymi dakumentami ŭ historyi biełaruskaha narodu. Biaź ich Biełarusaŭ mahčyma ŭžo nie było-b na hetym śviecie. Uhodki ich my z udziačnaściu musim adznačyć.
Piesymisty miž nami mahčyma skažuć, što niama čym ciešycca, bo-ž my ŭsio jašče nie dasiahnuli našaj mety stacca volnaj eŭrapiejskaj krainaj, takoj, jakimi jość siońnia našyja zachodnija susiedzi.
Tych, chto tak dumajuć, prašu prypomnić pra pieražytaje ŭ 20-m vieku, pra našuju vytryvałaść, pra našuju niepachisnuju vieru ŭ lepšuju budučyniu našaha narodu.
Zmahalisia my na praciahu 90 hadoŭ suprać šalonaj rusyfikacyi, baranili našyja najbolšyja kaštoŭnaści, našuju movu i kulturu, usiudy dzie mahli prypaminali śvietu, što Biełaruś žyvie i što narod biełaruski maje prava, tak jak i ŭsie narody śvietu, na volu i niezaležnaść.
Jość čym hanarycca, jość što śviatkavać.
Darahija Surodzičy, abaviazkam kožnaha z nas jość ździejśnić hety apošni vysiłak, jaki zrobić nas volnymi ludźmi. U krainach śvietu, dzie Vy pražyvajecie, dajcie da viedama Vašym uładam pra niaznosnyja adnosiny łukašenkaŭskaj namenklatury da našaj moładzi, najlepšych dačok i synoŭ Biełarusi, da našaj movy i da našaj spadčyny.
Adnačasna, źviarniciesia da Vašych uradaŭ, kab dali da viedama łukašenkaŭskamu režymu, što śviet nie budzie viečna taleravać ździeku na našych vulicach i praspektach nad mirnymi demanstrantami, jakija 25 Sakavika buduć žadać uračysta adznačyć 90-uju hadavinu BNR, naš Dzień voli i niezaležnaści.
Razam my asiahniem našuju metu – volu i demakratyju dla našaha narodu.
Žyvie Biełaruś!
Ciapier čytajuć
DFR kašmaryć transpartnikaŭ: u vialikich łahistyčnych apierataraŭ kryminalnyja spravy, vobšuki i aryšty17
Kamientary