Uładalnik elektramabila ŭ Hrodnie: Na 100 km darohi vychodzić 20 tys. rubloŭ, ale mahło b być jašče tańniej

Pastupova ŭ Hrodnie źjaŭlajucca novyja elektramabili. Zaraz ich u horadzie try: dva «Nissan Leaf» i adzin «Mitsubishi i MiEV».

Mikałaj, uładalnik elektramabila Mitsubishi, karystajecca im štodzionna z 1 lipienia 2015 hoda i za hety čas prajechaŭ 2500 km. Cikava, što kupić hety elektramabil Mikałaj advažyŭsia, pražyvajučy ŭ šmatpaviarchovym domie.

«Elektramabili jak vid transpartu staŭ razhladać jašče z 2010 hoda, kali studenty-kanstruktary prajechali na samarobnym elektramabili praz usiu Paŭnočnuju Amieryku. A ŭ 2014 hodzie, jak tolki daviedaŭsia ab rašeńni Savieta Jeŭrazijskaj ekanamičnaj kamisii, što pošliny na elektramabili ŭ Biełarusi, Rasii i Kazachstanie admianiajucca, adrazu kupiŭ «Mitsubishi i MiEV» na aŭkcyjonie ŭ ZŠA, — raspaviadaje Mikałaj. — Ale na mytni abnulać pošlinu nichto nie źbiraŭsia i mnie daviałosia vypłacić 54% ad katałožnaha koštu «i MiEV». Viedaŭ by heta raniej, mahčyma, kupiŭ by «i MiEV», starejšy za try hady, i tady na mytni vypłaciŭ by PDV u pamiery 20%».

«Paśla vyśvietliłasia, što majmu «i MiEV» nieabchodny nievialiki ramont: kamputar nie razumieŭ, što batareja całkam zaradžana. Na ruskamoŭnych forumach pra hety aŭtamabil jašče nadta mała infarmacyi. Tamu ŭsie adkazy i padkazki znachodzili ŭžo na anhłamoŭnych resursach. Tak ci inakš, aŭtamabil na chadu i biez prablem prajšoŭ techahlad».

Na techahladzie aŭtamabil vyklikaŭ ździŭleńnie. «Supracoŭniki techahladu chadzili vakoł mašyny z pryboram dla vymiareńnia CO, pakul ja nie ŭmiašaŭsia», — raspavioŭ Mikałaj.

— Jak zaradžać elektramabil, kali žyvieš u zvyčajnym šmatpaviarchovym domie?

— U mianie ułasny haraž, «Mitsubishi i MiEV» zastajecca ŭ im na noč i zaradžajecca. Čas zaradžańnia kala 7,5 hadzin. U haražach nie samy vyhadny taryf, tamu 100 km šlachu abychodziacca mnie ŭ 20 tys. rubloŭ. U paraŭnańni ź inšymi ŭładalnikami elektramabilaŭ heta doraha, ale adnosna astatnich aŭtaamataraŭ — ekanomija značnaja. Kali raniej na bienzin z majho zarobku išło 1,6 młn rubloŭ za miesiac, to ciapier tolki 250 tys., ekanomija tolki na palivie 1,0—1,5 młn. rubloŭ.

— Jaki realny prabieh u «i MiEV» ad adnoj zaradki i ci chapaje jaho tabie?

— Na adnoj zaradcy prajazdžaju niedzie 120—140 km, u zaležnaści ad stylu jazdy. Užo try razy źjeździŭ u Lidu z načleham, byŭ u Śvisłačy. Takoha zapasu enierhii mnie dastatkova. Ale ŭsio roŭna trymaju pry sabie svoj bienzinavy aŭtamabil. Im, darečy, za apošnija dva miesiacy karystaŭsia ŭsiaho adzin raz, u dalokaj pajezdcy. Ad elektramabilaŭ ŭžo nie admoŭlusia, ale «i MiEV», mahčyma, pradam. Kab nie trymać dva aŭtamabili, chaču sabie Chevrolet Volt. Jon bolšy pamieram, prajazdžaje 65 km ad batarej, a dalej ŭklučajecca bienzinavy ruchavik. Była b u mianie žonka, «i MiEV» abaviazkova pakinuŭ by joj, dla jazdy pa horadzie.

U darozie elektramabil dastaŭlaje zadavalnieńnie — lohka razhaniajecca, nie čuvać huł ruchavika, a na pavarotach i pry ruchu pa kole idzie «jak pa rejkach» praź nizki centr vahi.

«Biasšumnaść aŭtamabila, heta asobnaja historyja, — kaža Mikałaj. — Da hetaha treba pryzvyčaicca i samomu. Asabliva ŭ dvarach. Nikomu nie sihnalu, bajusia napałochać, asabliva pažyłych ludziej, i čakaju, pakul usio projduć».

• 0
• 0
• 0
• 0
• 0
• 0
• 0
• 0