Filijał MZVN spyniŭ vytvorčaść z-za skaračeńnia kvot na vypusk ałkaholu

Filijał ZAT «Minski zavod vinahradnych vin» poŭnaściu spyniŭ vytvorčaść z-za skaračeńnia kvot na vytvorčaść ałkaholnaj pradukcyi na 2015 hod, zaćvierdžanych pastanovaj Savieta ministraŭ № 850 ad 13 kastryčnika.

Pra heta havorycca ŭ liście hienieralnaha dyrektara pradpryjemstva Ivana Trockaha da ministra handlu Valancina Čakanava, tekst jakoha pastupiŭ u BiełaPAN.

U liście adznačajecca, što vytvorčaść filijału zajmaje ŭ hrašovym vyražeńni 67,5% ad usioj vypuskanaj pradukcyi. «Spynieńnie vytvorčaj dziejnaści nieminuča pryviadzie da rostu sacyjalnaj napružanaści, bo kalektyŭ našaha filijału, a heta bolš za 400 čałaviek, faktyčna zastaŭsia biez pracy jak minimum da kanca 2015 hoda. U mnohich rabotnikaŭ na ŭtrymańni znachodziacca dzieci, jakich nieabchodna karmić, apranać, zabiaśpiečvać ich isnavańnie», — havorycca ŭ liście. 

Tam taksama adznačajecca, što tolki za 2014 hod pradpryjemstva vypłaciła ŭ biudžet 1,7 trłn. rubloŭ padatkaŭ i zboraŭ, a za dzieviać miesiacaŭ 2015 hoda — 1,5 trłn. rubloŭ. Sioleta na ekspart adhružana pradukcyi prykładna na 590 młn. dołaraŭ. Akazana sponsarskaja dapamoha na 2,7 młrd. rubloŭ. 

Pamianšeńnie kvoty na 230 tys. dał dla pradpryjemstva pryviadzie da niedaatrymańnia biudžetam 175 młrd. rubloŭ. Likiora-harełačnaja pradukcyja na składach budzie realizavanaja za listapad, što «pryviadzie da deficytu pradukcyi ŭ mahazinach krainy, niezadavalnieńnia handlovych arhanizacyj i pazbaŭleńnia spažyŭcoŭ jakasnaj pradukcyi, tym bolš napiaredadni navahodnich i kaladnych śviataŭ», adznačaje hiendyrektar. 

U liście taksama adznačajecca, što pradpryjemstva, jakoje vykarystoŭvała dla zabieśpiačeńnia vytvorčaści ŭ 2015 hodzie bankaŭskija kredyty pad vysokija pracentnyja staŭki, z-za istotnaha pamianšeńnia vyručki nie zmoža pahasić ich svoječasova. «Akramia taho, na 2015 hod zaklučany dahavory z pakupnikami na pastaŭku pradukcyi, jakija nie buduć vykananyja z našaha boku, i da pradpryjemstva buduć prymienienyja štrafnyja sankcyi, što jašče bolš uskładnić finansavaje stanovišča pradpryjemstva. Z-za ŭsiaho hetaha pa vynikach čaćviortaha kvartała pradpryjemstva niepaźbiežna paniasie vielizarnyja straty, ź jakich vybracca vielmi składana», — havorycca ŭ liście. 

Hiendyrektar prosić ministra handlu chadajničać pierad Savietam ministraŭ ab adnaŭleńni kvoty na vytvorčaść harełki i likiora-harełačnych vyrabaŭ u 2015 hodzie ŭ raniejšych abjomach, pryniatych da ŭniasieńnia źmienaŭ, zychodziačy ź jakich i była raspracavanaja vytvorčaja prahrama pradpryjemstva. 

Dać aficyjny kamientar ab situacyi na pradpryjemstvie paabiacali paźniej.

• 0
• 0
• 0
• 0
• 0
• 0
• 0
• 0