1. Kali zapłanavanaja denaminacyja?
Pavodle prezidenckaha ŭkaza, novyja hrošy trapiać u abarot 1 lipienia 2016 hoda.
2. Chto źbiadnieje, a chto pabahacieje pry denaminacyi?
Zachavajecca status-kvo. Heta nie sumnaviadomaja reforma Paŭłava, mianiać banknoty na novyja možna biez abmiežavańniaŭ.
3. Kolki nuloŭ adkiniecca?
Ciapierašnija 10 tysiač rubloŭ stanuć 1 novym rublom. To bok adkidvajecca ažno čatyry nuli! Takaja radykalnaja reforma patrabuje źjaŭleńnia drobnych hrošaj, imi stanuć daŭno zabytyja kapiejki. 1 novy rubiel budzie roŭny 100 kapiejkam. U tekście ŭkaza niama kankretnaj frazy pra toje, što kapiejki buduć čakanicca ŭ vyhladzie maniet. Adnak pakolki praduhledžvajecca padzieł hrošaj na rubli/kapiejki, vidavočna, što adroźnieńnie musić być i ŭ sposabie vytvorčaści. Takim čynam, Biełaruś stracić status apošniaj u Jeŭropie krainy, jakaja nie vykarystoŭvaje maniety.
4. Kolki možna budzie raźličvacca starymi hrašyma?
Dla Biełarusi heta budzie ŭžo treciaja denaminacyja, tamu schiema zamieny hrošaj adpracavanaja. Na praciahu paŭhoda (z 1 lipienia 2016 da 31 śniežnia 2016) možna budzie raźličycca ŭ luboj kramie i starymi, i novymi banknotami. Adpaviedna budzie ŭkazvacca i dźvie cany.
Nastupnyja try hady (2017—2019) staryja banknoty možna budzie abmianiać u bankach, a ŭ 2020—2021 – u Nacbanku.
5. Navošta patrebnaja denaminacyja?
Ceny ŭ Biełarusi raśli tak chutka, što kožny žychar krainy staŭ miljanieram. Heta niazručna, a jašče i śmiešna dla turystaŭ. Tamu denaminacyja sprościć raźliki i ŭsprymańnie cenaŭ.
Adnak anansavańnie denaminacyi mienavita ciapier, pierad inaŭhuracyjaj — pieradusim pijar-chod. Heta jašče i zajava na novy ekanamičny kurs. Denaminacyja była patrebnaja ŭžo daŭno, ale inflacyjny šlach raźvićcia ekanomiki nie dazvalaŭ Prakapoviču i Jermakovaj navat zaikacca pra adkidvańnie nuloŭ. Ciapier ža kamanda Nacbanka dekłaruje hałoŭnaj metaj nie naroščvańnie VUP, a stabilizacyju inflacyi, chacia b da ŭzroŭniu nižej za 10%.
Kolki nasamreč ciahnucca pracoŭnyja pajezdki Łukašenki? Cikavyja ličby10
Kamientary