Dziarždep ZŠA: Biełaruś — heta aŭtarytarnaja dziaržava

U štohadovym dakładzie Dziarždepartamienta ZŠA ab situacyi z pravami čałavieka ŭ śviecie, jaki apublikavany 14 krasavika, adznačajecca, što ŭ Biełarusi zachoŭvajucca «značnyja prablemy ŭ śfiery pravoŭ čałavieka».

U raździele, pryśviečanym Biełarusi, u pryvatnaści, adznačajecca: hramadzianie pa-raniejšamu nie majuć mahčymaści źmianiać urad šlacham vybaraŭ; u sistemie, pazbaŭlenaj strymak i procivah, ułady ździajśniajuć złoŭžyvańni; byłyja palitviaźni da hetaha času nie adnoŭlenyja ŭ hramadzianskich i palityčnych pravach; ułady tak i nie dali nijakich tłumačeńniaŭ pa faktach «palityčna matyvavanych źniknieńniaŭ» (havorka idzie pra źniknieńni apazicyjnych palitykaŭ i žurnalista ŭ 1999—2000 hadach).

«Biełaruś — heta aŭtarytarnaja dziaržava, — havorycca ŭ dakładzie. — Kanstytucyja krainy praduhledžvaje pramyja vybary prezidenta, jaki źjaŭlajecca kiraŭnikom dziaržavy, i parłamienta. Premjer-ministr pryznačajecca prezidentam i źjaŭlajecca naminalnym kiraŭnikom urada, ale ŭłada skancentravanaja ŭ prezidenta de-fakta i de-jure «.

U dakumiencie taksama adznačajecca, što paśla 1994 hoda (kali ŭ Biełarusi prajšli pieršyja prezidenckija vybary) usie vybarčyja kampanii, što pravodzilisia ŭ krainie, u tym liku prezidenckija vybary 2015 hoda, nie adpaviadali mižnarodnym standartam.

Siarod inšych parušeńniaŭ pravoŭ čałavieka ŭ dakładzie nazyvajucca złoŭžyvańni z boku siłavych struktur, u tym liku šlacham «drennaha staŭleńnia da padazronych padčas rasśledavańniaŭ i ŭ turmach», advolnyja zatrymańni hramadzian za krytyku ŭłady, udzieł u demanstracyjach i ź inšych palityčnych pryčyn.

Sudovaja halina ŭłady ŭ Biełarusi nie źjaŭlajecca niezaležnaj i zaznaje ŭmiašańnie z boku inšych halin ułady, a sudovyja rašeńni «časta źjaŭlalisia pradkazalnymi i vynosilisia za začynienymi dźviaryma ŭ adsutnaść abvinavačanaha», adznačaje Dziarždep ZŠA.

Ułady ŭ Biełarusi praciahvajuć abmiažoŭvać hramadzianskija pravy i svabody, uklučajučy prava na svabodu słova, svabodu ŚMI, schodaŭ, asacyjacyj i relihii, havorycca ŭ dakładzie.

Adznačajecca taksama, što ŭłady praciahvajuć admaŭlać u rehistracyi niedziaržaŭnym arhanizacyjam, palityčnym partyjam, pravaabarončym arhanizacyjam, a zatym pahražajuć im pieraśledam za dziejnaść biez rehistracyi.

Dyskryminacyju źviedvajuć pradstaŭniki sieksualnych i etničnych mienšaściaŭ, ludzi ź invalidnaściu, z dyjahnazam VIČ/ŚNID, a taksama «tyja, chto imkniecca havaryć na biełaruskaj movie», havorycca ŭ dakładzie.

Jaho aŭtary taksama pakazvajuć na prablemu sa słužbovaj karupcyjaj va ŭsich halinach ułady, jakaja pa-raniejšamu aktualnaja ŭ Biełarusi.

Na prośbu BiełaPAN prakamientavać dakład Dziarždepartamienta ZŠA pres-sakratar MZS Biełarusi Dźmitryj Mirončyk zajaviŭ: «Heta ŭnutrany dakumient amierykanskaj administracyi. Dziarždepartamient rychtuje jaho pa zapycie Kanhresa ZŠA. Namieru kamientavać unutranyja dakumienty amierykanskaj administracyi ŭ nas niama».

• 0
• 0
• 0
• 0
• 0
• 0
• 0
• 0