Nazvanyja pieršyja łaŭreaty litaraturnaj premii imia Ciotki
Łaŭreatami pieršaj litaraturnaj premii imia Ciotki (Ałaizy Paškievič) — premii dla dziciačych piśmieńnikaŭ i ilustrataraŭ dziciačych knih — stali piśmieńnica Nadzieja Jaśminska z knihaj «Siem ružaŭ» i mastačka Kaciaryna Dubovik, jakaja aformiła tuju ž knihu. Uračystaja cyrymonija ŭhanaravańnia pieramožcaŭ adbyłasia 3 maja ŭ staličnaj kulturnaj prastory «Korpus 8».
Imia pieramožcy ŭ naminacyi «Najlepšaja kniha dla dziaciej i padletkaŭ» nazvała člen žury paetka Viera Burłak. Jana adznačyła, što z 36 naminantaŭ u šort-list uvajšli dzieviać padadzienych na konkurs knih. Aprača «Siami ružaŭ» heta «Lasnaja tryvoha» Viktara Hardzieja, «Janka, Šmurdzik, Buchmatka dy inšyja» Michasia Ziziuka, «Vialikija pryhody Kakosa Marakosa» Sierža Minskieviča, «Siem kamianioŭ» Alaksieja Šeina, «Krasamoŭnaje serca» Aleha Abłažeja, «Atrakcyjony dla vadzianikoŭ» Natalli Bučynskaj, «Busieva škoła» Raisy Baravikovaj i Uładzimira Lipskaha, a taksama «Zorka dla vaviorki» Alesia Badaka.
«Nam było vielmi składana pryjści da kansensusu, — adznačyła Burłak. — Ale, napeŭna, znakava toje, što pieršuju premiju imia Ciotki, u jakoj prahladajecca vielmi mocny žanočy pačatak, atrymała adzinaja kniha, jakaja maje hiendarnaje skiravańnie».
Łaŭreata premii ŭ naminacyi «Najlepšaje mastackaje afarmleńnie» abviaściŭ člen mastackaj častki žury Valeryj Słavuk. Jon adznačyŭ, što maładaja mastačka Kaciaryna Dubovik, jakaja pieramahła ŭ konkursie ilustrataraŭ, pakazała siabie jašče padčas navučańnia ŭ Biełaruskaj dziaržaŭnaj akademii mastactvaŭ — aformlenaja joj u jakaści dypłomnaj pracy kniha Stefana Cvejha była vydadziena pry dapamozie aŭstryjskaha banka. Kažučy pra afarmleńnie «Siami ružaŭ», Słavuk padkreśliŭ, što heta «prafiesijna, pa-svojmu zroblenaja kniha, jakaja całkam zasłuhoŭvaje ŭznaharody».
Abiedźvie łaŭreatki ŭ jakaści pryza atrymali admysłova zroblenyja statuetki z vyjavaj nievialičkaj mietaličnaj knihi na draŭlanym ščycie, a taksama pa čeku na sumu 2 tys. dołaraŭ u ekvivalencie.
Pryvatnaje vydaviectva «Halijafy», jakoje vydała knihu «Siem ružaŭ», atrymała ad arhanizataraŭ premii hanarovy dypłom.
***
Premiju imia Ciotki zasnavali Biełaruski PEN-centr, Sajuz biełaruskich piśmieńnikaŭ i dabračynny fond «Viartańnie» ŭ kancy 2015 hoda. «Apiekunom» hetaj premii była vybrana biełaruskaja paetka, publicyst i hramadski dziejač kanca XIX — pačatku XX stahodździa Ałaiza Paškievič, najbolš viadomaja pad psieŭdanimam Ciotka. U svoj čas Paškievič stvaryła pieršuju biełaruskuju škołu ŭ Vilni, zapuściŭšy tym samym masavuju biełaruskamoŭnuju adukacyju. Vystupała redaktaram časopisa dla dziaciej i moładzi «Łučynka». Jaje aŭtarstvu naležyć kniha «Pieršaje čytańnie dla dzietak biełarusaŭ».
Pieršaja premija imia Ciotki ŭručanaja ŭ hod, kali spaŭniajecca 140 hadoŭ z dnia naradžeńnia Ałaizy Paškievič i 110 hadoŭ z vychadu «Pieršaha čytańnia dla dzietak biełarusaŭ».
Kamientary