Pasolstva Rasijskaj Fiederacyi paličyła za lepšaje ŭstrymacca ad kamientavańnia abvinavačvańniaŭ u niezakonnych dziejańniach Rasii ŭ adnosinach da Ukrainy, vykazanych členam Savieta Respubliki Iharam Marzalukom.
25 žniŭnia na sustrečy z vybarščykami kandydat u deputaty Pałaty pradstaŭnikoŭ pa Mahiloŭskaj-Leninskaj vybarčaj akruzie № 84, namieśnik staršyni Pastajannaj kamisii Savieta Respubliki Nacyjanalnaha schodu pa mižnarodnych spravach i nacyjanalnaj biaśpiecy Ihar Marzaluk zajaviŭ, u pryvatnaści, što aneksijaj Kryma i dziejańniami na Danbasie Rasija «ździejśniła žudasnuju reč» i «razburyła ŭschodniesłavianskaje adzinstva».
«Aficyjnaja rasijskaja pazicyja ŭ dačynieńni da situacyi na Danbasie i padziej, źviazanych z uvachodžańniem Kryma (majem na ŭvazie i horad Sievastopal) u skład Rasijskaj Fiederacyi ahulnaviadomaja; jaje asnoŭnyja pałažeńni nieadnarazova vykładalisia ŭ vystupleńniach Prezidenta Rasijskaj Fiederacyi U.U.Pucina, Ministra zamiežnych spraŭ Rasijskaj fiederacyi S.V.Łaŭrova i šerahu inšych dakumientaŭ, jakija znachodziacca ŭ adkrytym dostupie», — havorycca ŭ liście, jaki pastupiŭ 30 žniŭnia ŭ BiełaPAN z pres-słužby pasolstva RF u Minsku.
«U pryncypovym płanie chacieli b adznačyć, što ŭ svaich dziejańniach Rasijskaja Fiederacyja niaŭchilna vykonvaje patrabavańni zachavańnia norm mižnarodnaha prava», — paviedamlaje pres-słužba.
«Za punkt adliku ŭ acenkach pryčyn ciapierašniaha kryzisu na Ukrainie rekamiendavali b brać dziaržaŭny pieravarot u hetaj sapraŭdy brackaj dla Rasii i Biełarusi krainie, učynieny ŭ lutym 2014 hoda hrupaj viadomych asob pry vidavočnaj padtrymcy takich ža viadomych pradstaŭnikoŭ zamiežnych dziaržaŭ, mnohija ź jakich nie paličyli umiašańniem ŭ spravy niezaležnaj dziaržavy svaje publičnyja źjaŭleńni i vystupleńni z trybuny kijeŭskaha Majdanu ŭ piku lehitymnym uładam Ukrainy, jak i inšyja svaje, niesumiaščalnyja ź mižnarodnym pravam dziejańni, jakija ŭčyniajucca pa hety dzień za kulisami ŭkrainskaj trahiedyi», — havorycca ŭ adkazie.
«Što da vykazvańniaŭ pa zhadanych temach nazvanaha Vami biełaruskaha deputata, to ličym heta jaho asabistaj spravaj i pa hetaj pryčynie ličym dla siabie za lepšaje ŭstrymacca ad jakich-niebudź kamientaryjaŭ», — havorycca ŭ liście z rasijskaha pasolstva.
Kamientary