«Efiekt hubnoj pamady» ŭ prodažach sapraŭdy pracuje

L'Oréal, najbujniejšy ŭ śviecie vytvorca kaśmietyki, paviedamiła pra najbolš vysokija kvartalnyja prodažy za apošnija dva hady. Pavodle spravazdačy, vyručka francuzskaj kaśmietyčnaj hrupy ŭ pieršym kvartale 2026 hoda skłała 12,2 miljarda jeŭra — heta na 6,7% bolš u paraŭnańni z anałahičnym pieryjadam minułaha hoda, kali ličyć pa supastaŭnych pakazčykach.

Vynik akazaŭsia vyšejšym za prahnozy analitykaŭ. Na fonie spravazdačy akcyi L'Oréal, jakaja vałodaje brendami Maybelline i Lancôme, vyraśli na 8,5% u pačatku tarhoŭ u minuły čaćvier, 23 krasavika.

Jak adznačajecca, asnoŭnym ruchavikom rostu stała Jeŭropa, dzie było zafiksavana pavieličeńnie prodažaŭ na 10,3%.

U kampanii heta tłumačać dziejańniem tak zvanaha «efiektu pamady», kali na fonie kryzisaŭ i vajny spažyŭcy praciahvajuć kuplać adnosna niedarahija tavary dla palapšeńnia asabistaha samaadčuvańnia.

«Dla mianie Jeŭropa — heta absalutnaje paćviardžeńnie taho, što my nazyvajem «efiektam pamady» abo dafaminavym efiektam pryhažości. Našy daśledavańni pavodzin spažyŭcoŭ vyrazna pakazvajuć: niahledziačy na zaniepakojenaść i peŭnyja tryvohi, ludzi mohuć skaračać vydatki na darahija, značnyja vytraty, ale vykarystoŭvajuć kaśmietyku jak formu kampiensacyi — jak srodak spravicca sa stresam i jak psichałahičnuju padtrymku. I my nazirajem heta ŭ roznych katehoryjach», — cytuje The Times hienieralnaha dyrektara L'Oréal Nikala Ijeranimusa.

Pry hetym, jak adznačyŭ kiraŭnik kampanii, pakul nie adbyłosia «absalutna nijakich źmien» u madelach spažyvańnia, niahledziačy na rost cenaŭ na naftu i turbulentnaść na suśvietnych rynkach, vyklikanuju kanfliktam na Blizkim Uschodzie. Jon, adnak, nie vyklučyŭ, što pry zachavańni vysokich vydatkaŭ na łahistyku i syravinu, u tym liku płastyk, kampanii moža spatrebicca pavyšeńnie cen paźniej u hetym hodzie.

Analityki Barclays nazvali bazavy rost kampanii «vielmi ŭražlivym». Pavodle ich źviestak, najlepšyja vyniki pakazali napramki prafiesijnaj kaśmietyki i dermatałahičnaha dohladu, a asnoŭnymi drajvierami rostu stali premijalnyja srodki dla dohladu za vałasami i parfumieryja.

Dadatkovym stymułam dla aptymizmu stała toje, što najbujniejšaja ŭ śviecie kaśmietyčnaja hrupa paviedamiła pra prykmiety adnaŭleńnia na kitajskim rynku. Apošni praciahły čas pieražyvaŭ zapavoleńnie z-za pastajannaj ekanamičnaj niapeŭnaści i źmieny spažyvieckich zvyčak u rehijonie.

Kampanija papiaredžvaje, što ŭ druhim kvartale na vyniki moža paŭpłyvać kanflikt na Blizkim Uschodzie, ale pakolki hety rehijon daje mienš za 3% ahulnaj vyručki, uździejańnie čakajecca abmiežavanym.

Mocnyja vyniki L'Oréal kantrastujuć z bolš słabymi pakazčykami inšych spažyvieckich kampanij i luksavych hrup, takich jak LVMH, Kering (uładalnik Gucci) i Hermès (vytvorca sumak Birkin), čyj rost u pieršym kvartale byŭ padarvany kanfliktam na Blizkim Uschodzie.

• 3
• 0
• 0
• 1
• 0
• 1
• 0
• 0