Ministerstva achovy zdaroŭja płanuje admianić abaviazkovy ahlad hiniekołaham 12-hadovych dziaŭčat, paviedamiła 7 vieraśnia na pres-kanfierencyi ŭ Minsku načalnik adździeła miedycynskaj dapamohi maci i dzieciam ministerstva Ludmiła Lohkaja.
Jana nahadała, što abaviazkovy štohadovy ahlad akušeram-hiniekołaham praduhledžany dla dziaŭčat 3, 6, 12 hadoŭ, a taksama dziaŭčat 15, 16 i 17 hadoŭ. «Ahlad 12-hadovych dziaciej byŭ źviazany ź ich pałavym paśpiavańniem. Zaraz raspracavany prajekt pastanovy Ministerstva achovy zdaroŭja ab dyspansieryzacyi, adnym z punktaŭ jakoha praduhledžvajecca, što takoha ahladu nie budzie. Daktary adznačajuć, što pałavoje paśpiavańnie moža adbyvacca i raniej, i paźniej. Tamu ŭ hety pieryjad (12—14 hadoŭ) dziaŭčat buduć ahladać na padstavie zvarotu baćkoŭ», — skazała Lohkaja.
Jana źviarnuła ŭvahu, što nie ŭsie patałohii možna vyjavić pry naviedvańni piedyjatra, u tym liku pryrodžanyja asablivaści i zapalenčyja pracesy. Hiniekołah taksama aceńvaje hihijeničny dohlad dziaŭčynak i daje rekamiendacyi baćkam.
Jak adznačyła Lohkaja, dziaciej moža ahladać jak dziciačy doktar-hiniekołah, tak i darosły, jaki maje śpiecyjalnuju padrychtoŭku. Razam z tym dziaciej treba psichałahična padrychtavać da pryjomu hiniekołaha. «Dziaŭčyncy-padletku treba rastłumačyć, što jana budučaja mama i hety ahlad nie ŭjaŭlaje ničoha strašnaha, jaho prachodziać usie žančyny na praciahu ŭsiaho žyćcia», — adznačyła pradstaŭnik Ministerstva achovy zdaroŭja.
Jak paviedamlałasia raniej, u Minsku arhanizavanaja praca kabinietaŭ družalubnaha staŭleńnia da padletkaŭ. U kožnym kabiniecie pracuje akušer-hiniekołah, jaki akazvaje kvalifikavanuju dapamohu dziaŭčatam-padletkam. Akramia hetaha, pracujuć piedyjatr i psichołah. U asnoŭnym u kabiniety źviartajucca sa svaimi prablemami dziaŭčynki. Najbolš častyja — žadańnie pierapynić ciažarnaść. Padletki mohuć źviarnucca ŭ luby kabiniet niezaležna ad miesca žycharstva.
Kamientary