Zatrymany ŭ Biełarusi «šviedski biznesoviec» akazaŭsia afhanskim biežancam

Pradprymalnik z Šviecyi znachodzicca ŭ źniavoleńni ŭ Biełarusi z kanca krasavika hetaha hoda. U KDB kažuć, što jon byŭ zatrymany za machlarstva. Pra heta paviedamlaje šviedskaje vydańnie Aftonbladet. Infarmacyju haziecie paćvierdziła pres-sakratar šviedskaha MZS Karyn Niułund.

«U jaho jość advakat. Pasolstva sočyć za spravaj i znachodzicca ŭ kantakcie ź miascovymi ŭładami», — paviedamiła jana. Pradstaŭniki ambasady niekalki razoŭ naviedvali paddanaha karaleŭstva Šviecyi.

Pa źviestkach šviedskaha boku, biznesoviec byŭ aryštavany biełaruskimi pravaachoŭnikami 27 krasavika i z taho času znachodzicca ŭ źniavoleńni.

Jak piša Aftonbladet, zatrymany kiruje kampanijaj, jakaja zarehistravanaja ŭ Šviecyi, jon supracoŭničaŭ ź biełaruskim uradam. Sa słoŭ jaho brata, švieda zatrymali ŭ Minsku. U jaho taksama kanfiskavali telefony, kampjutarnuju techniku i pasadzili ŭ «sakretnuju turmu».

Miarkujučy pa ŭsim, havorka idzie pra zatrymańnie KDB pa abvinavačvańni ŭ machlarstvie ŭ krasaviku hetaha hoda.

Nahadajem, 26 krasavika 2016 hoda pa abvinavačvańni ŭ bujnym machlarstvie byli zatrymanyja hramadzianie Armienii, Biełarusi i Šviecyi. Jany śćviardžali, što ŭ ich jość suviazi ŭ KDB, Śledčym kamitecie i siarod vysokich słužbovych asobaŭ dziaržavy i prapanavali hramadzianinu Biełarusi «vyrašyć» pytańnie, źviazanaje z rasśledavańniem kryminalnaj spravy. Za hetuju «pasłuhu» biełarus addaŭ zamiežnikam 335 000 dalaraŭ ZŠA i juvielirnyja ŭpryhažeńni na sumu bolš čym 150 000 dalaraŭ ZŠA.

«Ahulnaja suma za akazanyja nibyta pasłuhi pavinna była skłaści 1,5 młn dalaraŭ ZŠA. Adnak davieści da kanca svoj złačynny namier zamiežniki nie zmahli, bo byli zatrymanyja i źmieščanyja pad vartu», — raspaviali ŭ viedamstvie.

U Kamitecie dziaržbiaśpieki taksama patłumačyli, što ŭ realnaści šviedskim paddanym źjaŭlajecca hramadzianin Afhanistana, jaki ŭ statusie biežanca znachodziŭsia na terytoryi Biełarusi z 1999 pa 2004 hod pad inšymi ankietnymi dadzienymi. U kastryčniku 2004 hoda jon źjechaŭ ź Biełarusi, a ŭ śniežni ŭžo zajechaŭ pad inšymi dadzienymi, na jakija im ašukanskim šlacham byŭ atrymany šviedski pašpart. «Takim čynam, prasočvajecca ździajśnieńnie im supraćpraŭnych dziejańniaŭ nie tolki ŭ Biełarusi, ale i na terytoryi Šviecyi», — kanstatavali ŭ KDB.

U dačynieńni da zatrymanych byli raspačatyja kryminalnyja spravy pa č. 4 art. 209 (machlarstva) i č. 2 art. 431 (dača chabaru) Kryminalnaha kodeksa Biełarusi, što praduhledžvaje pakarańnie ŭ vyhladzie pazbaŭleńnia voli terminam ad 2 da 15 hadoŭ.

• 0
• 0
• 0
• 0
• 0
• 0
• 0
• 0