U Minsku stvoranaja Asambleja narodnych pradstaŭnikoŭ

U skład novaj pradstaŭničaj arhanizacyi, ustanoŭčuju kanfierencyju jakoj praviała 6 kastryčnika ŭ Minsku pravacentrysckaja kaalicyja, uvojduć pryblizna 70 apazicyjnych eks-kandydataŭ u deputaty na vybarach 2016 hoda, a taksama abranaja deputatam Hanna Kanapackaja.

U pravacentrysckuju kaalicyju, nahadajem, uvachodziać Abjadnanaja hramadzianskaja partyja, arhkamitet pa stvareńni partyi «Biełaruskaja chryścijanskaja demakratyja» i ruch «Za Svabodu».

U zajavie ab stvareńni asamblei, pryniataj delehatami kanfierencyi, havorycca, što pa vinie ŭładaŭ «Biełaruś znachodzicca ŭ zaciažnym sacyjalna-ekanamičnym kryzisie, a sens usich pieraŭtvareńniaŭ u sacyjalnaj śfiery zvodzicca da pierakładańnie adkaznaści za vyrašeńnie ŭsich prablem na samich hramadzian».

«Niahledziačy na abiacańni i zapeŭnivańni ŭładaŭ, narod Biełarusi i siońnia pazbaŭleny prava i mahčymaści praz svabodnyja, adkrytyja i demakratyčnyja vybary samastojna kiravać krainaj i abirać deputataŭ u miascovyja orhany vykanaŭčaj ułady, deputataŭ parłamienta i prezidenta. Praviačy režym nie vykanaŭ pieravažnuju bolšaść rekamiendacyj ABSIE pa demakratyzacyi vybarčaha zakanadaŭstva, i na praktycy vybary prajšli pavodle ŭžo zvykłaha scenaryja falsifikacyj narodnaha volevyjaŭleńnia, pry poŭnym kantroli z boku ŭładnaj viertykali i pry padtrymcy sudoŭ, prakuratury i orhanaŭ achovy pravaparadku», — havorycca ŭ zajavie.

Apazicyjaniery adznačajuć, što zamiest dyjałohu z pradstaŭnikami ŭsich palityčnych i hramadskich sił u krainie va ŭmovach kryzisu «aŭtarytarny režym praciahvaje palityku eskałacyi ahresii ŭ dačynieńni da svaich hramadzian, palityčnych apanientaŭ i ŭsich niezaležnych ad ułady struktur hramadzianskaj supolnaści».

Biełaruski parłamient pradstaŭniki asamblei ličać dekaratyŭnym instytutam, zaklikanym absłuhoŭvać viertykal ułady. Udzielniki kanfierencyi zajavili ab tym, što, na ich dumku, u krainie niama svabody presy, abmiažoŭvajucca palityčnyja pravy, u tym liku niekalki hadoŭ nie moža atrymać rehistracyju BCHD, źviedvaje pieraśled valnadumstva, ihnarujucca pravy hramadzian na mirnyja schody, znoŭ jość palitźniavolenyja.

Abapirajučysia na źviestki niezaležnaha nazirańnia na vybarach, členy asamblei zajavili ab tym, što «ŭ Biełarusi niama zakonna abranaha lehitymnaha parłamienta», a «ŭsie 110 deputataŭ pryznačanyja vykanaŭčaj uładaj».

«U takoj situacyi Pałata pradstaŭnikoŭ nie moža pradstaŭlać narod Biełarusi jak va ŭnutranaj, tak i ŭ mižnarodnaj palitycy. My dekłarujem naš ćviordy namier praciahvać supracoŭnictva ŭ miežach pravacentrysckaj kaalicyi ŭ dalejšym», — skazana ŭ zajavie.

Vyznačanyja try kirunki dziejnaści asamblei: infarmavańnie hramadzian ab alternatyŭnych prahramach sacyjalna-ekanamičnaha i palityčnaha raźvićcia Biełarusi; praviadzieńnie hramadskich kampanij u padtrymku sacyjalna-ekanamičnych i palityčnych reformaŭ; realizacyja patrabavańnia ab praviadzieńni svabodnych vybaraŭ užo padčas nastupnaj vybarčaj kampanii — pa abrańni miascovych savietaŭ.

Asambleja stvarajecca «dla abjadnańnia i padtrymki ŭsich rehijanalnych lidaraŭ, čyja pieramoha ŭ vybarčaj kampanii 2016 hoda była vykradzienaja ŭładami ŭ vyniku falsifikacyj».

Zhodna z prapanovaj sustaršyni arhkamiteta BCHD Vitala Rymašeŭskaha delehaty kanfierencyi vystupili za admienu kryminalnaha pieraśledu za dziejnaść ad imia niezarehistravanaj arhanizacyi i padtrymali inicyjatyvu «Maładoha frontu» ab nadańni bieł-čyrvona-biełamu ściahu statusu historyka-kulturnaj kaštoŭnaści.

Pryniataje taksama rašeńnie ab stvareńni ŭ miežach arhanizacyi kamisij, jakija buduć zajmacca zboram prapanoŭ i raspracoŭkaj zakonaprajektaŭ pa takich kirunkach, jak miedycyna, adukacyja, kultura, sielskaja haspadarka, žyllovaja palityka i ŽKH, ekałohija, miascovaje samakiravańnie, piensijnaja reforma.

U skład prezidyuma asamblei ŭvajšli Anatol Labiedźka, Vital Rymašeŭski i Juraś Hubarevič.

U pracy ŭstanoŭčaj kanfierencyi arhanizacyi akramia pravacentrystaŭ uziali ŭdzieł pradstaŭniki Biełaruskaj partyi «Zialonyja» i Biełaruskaj sacyjał-demakratyčnaj partyi (Hramada). Pavodle słoŭ Labiedźki, pravacentrysckaja kaalicyja na nastupnym tydni pačnie pieramovy z hetymi strukturami ab sumiesnaj pracy pa peŭnych kirunkach.

• 0
• 0
• 0
• 0
• 0
• 0
• 0
• 0