Dyrektarka CECHa Julija Daraškievič paprasiła ŭ Uber-y źniać hieorhijeŭskuju stužku. I tut pačałosia…
Niezvyčajny vypadak zdaryŭsia z dyrektarkaj tvorčaj prastory CECH Julijaj Daraškievič.
«Uber z hieorhijeŭskaj stužačkaj. Na majo vietlivuju prapanovu źniać, kiroŭca paviedamiŭ, što raźviałosia tut banderaŭcaŭ i dalej pa tekście. Na maju prośbu raźviarnucca i viarnuć mianie da padjezda, vysadziŭ na prypynku. Moj śviet nie budzie raniejšym. Hrošy z kartki śpisali», — napisała Daraškievič.
Uber — heta mižnarodnaja kampanija z ZŠA, jakaja stvaryła mabilnuju aplikacyju dla pošuku, vykliku i apłaty taksi abo pryvatnych kiroŭcaŭ. Z dapamohaj dadatku Uber zamoŭca reziervuje mašynu z kiroŭcam i adsočvaje jaje pierasoŭvańnie da pakazanaha punktu, apłata robicca z dapamohaj bankaŭskaj kartki. U Minsku Uber pracuje ad minułaha hoda.
Paśla incydentu Julija Daraškievič napisała pretenziju na kiroŭcu praz sajt Uber-a. Niekatoryja kamientatary ŭ fejsbuku adznačyli, što taksama składali skarhu na hetaha taksista, bo jon raskazvaŭ maładym ludziam, jak škada, što jany nie žyli ŭ SSSR.
«Słužba padtrymki źviazałasia dastatkova chutka, kiroŭca zabłakavany, pravodziacca raźbiralnictvy, jak minimum tydzień jon pracavać nie budzie (a chutčej za ŭsio ŭvohule nie budzie). Stužačka tut navat druhasnaje — maja pretenzija da chamskaj maniery viadzieńnia razmovy i nievykanańnia zadač pa maršrucie», — adznačyła Daraškievič.
Varta adznačyć, što adrazu ŭ fejsbuk dyrektarki CECHa pryjšło šmat ludziej zboku, jany nie źjaŭlajucca «frendami» Julii, jakija ŭ ahresiŭnaj formie, a časam navat z maciukami pačali pierakonvać aŭtarku, što jana nie maje racyi, a kiroŭca zrabiŭ usio pravilna. Niekatoryja navat adkryta pierajšli na abrazy. Chacia bolšaja častka pastaviłasia z razumieńniem i raili Daraškievič, što rabić u takoj situacyi.
Julija apisała incydent padrabiazna: «Ja sieła ŭ mašynu, ubačyła stužačku, spytała (vietliva!): «A navošta jana tut? Ja dumała, što Ubier rekamienduje ŭstrymlivacca ad demanstracyi palityčnych pierakanańniaŭ». Na heta kiroŭca adrazu staŭ adkazvać ahresiŭnym tonam niešta nakštałt: «U nas stolki dziadoŭ palehła, a vy majecie sumleńnie zadavać takija pytańni. Mnie što, źniać jaje?» Na što ja adkazała, tak, źniać, kali možna. Dalej na maju hałavu pasypałasia łajanka nakštałt «raźviałosia tut banderaŭcaŭ ŭsialakich». Paśla čaho ja skazała, što chaču źmianić mašynu i paprasiła mianie viarnuć da padjezda. Kiroŭca adkazaŭ mnie admovaj i vymusiŭ vyjści prosta la bližejšaha bardziura (nakolki ja razumieju, u nienaležnym dla prypynku miescy)», — napisała Daraškievič.
U kampanii Uber dyrektarcy CECHa paćvierdzili, što taksistam sapraŭdy rekamiendujecca nie vykarystoŭvać u sałonie nalepki, stužki i druhija znaki, jakija demanstrujuć palityčnyja pohlady.
Hieorhijeŭskuju stužku ŭ jakaści svajho znaku ŭziali ludzi, što pačali vajnu na ŭschodzie Ukrainy. Paśla hetaja stužka stała ŭsprymacca jak simvał ahresii nie tolki va Ukrainie, ale i inšych susiednich krainach. Aficyjnaja Biełaruś admoviłasia ad vykarystańnia hieorhijeŭskaj stužki na karyść «jabłynievaha ćvietu». Svaju stužku taksama prydumali ŭ Kazachstanie.
Dziadok patłumačyŭ, čamu vyzvalili mienavita tych palitviaźniaŭ, kaho vyzvalili24
Kamientary