Staršynia BAŽ Andrej Bastuniec prezientuje knihu paezii i abiacaje vydać raman
31 kastryčnika ŭ kniharni «Ŭ» adbudziecca prezentacyja knihi paezii «Dokazatielstva dvižienija». Jaje aŭtar — Andrej Bastuniec.
U 2011 hodzie Andrej zapisaŭ albom pad takoj samaj nazvaj — «Dokazatielstva dvižienija», dzie vykonvaŭ pad hitaru pieśni na svaje vieršy i svaju ž muzyku, krychu paźniej jašče adzin. I voś sioleta vyjšła pieršaja paetyčnaja kniha staršyni Biełaruskaj asacyjacyi žurnalistaŭ, jurysta pa specyjalnaści Andreja Bastunca. Ale ŭklučaje kniha piać vieršavanych zbornikaŭ. Vieršy hetyja pisalisia z 1990-ch i da siońniašniaha dnia.
— Andrej, ciapier vy staršynia BAŽ, u vas jašče niekalki pasadaŭ, šmat pracy, abaviazkaŭ. Ci pišacca ciapier, ci ŭźnikaje žadańnie i natchnieńnie pisać vieršy, ci jość čas na paeziju?
— Nia vielmi… I sprava nie ŭ pasadach, prosta niama času spynicca. Niadaŭna jeździŭ u Niamieččynu amal na tydzień, pajezdka była pracoŭnaja, padčas pierajezdaŭ niekalki vieršaj napisaŭ. I heta ŭsio, čym ja mahu za apošnija paru hadoŭ pachvalicca.
— To bok novaj vašaj knihi čakać nia chutka?
— Heta knižka čakała 20 hadoŭ. Mahčyma, praz nastupnyja 20 i druhuju paetyčnuju vydam. Ale ŭ mianie padrychtavanaja kniha prozy, jakuju ja spadziajusia vydać u bližejšym časie. Heta raman. Nazyvajecca vielmi prosta — «Historyja». Składana koratka raspavieści, pra što jon. Pra mahčymaść i niemahčymaść kachańnia, skažam tak.
— Ale vierniemsia da paetyčnaha zbornika, jaki vy prezentujecie ŭ paniadziełak. Spačatku vyjšaŭ adzin dysk z vašymi pieśniami, potym druhi. U paetyčny zbornik uvajšli tyja ž samyja vieršy?
— Nasamreč, u knihu ja amal nie ŭklučaŭ tyja vieršy, na jakija napisanyja pieśni, bo heta ŭsio ž taki dva roznyja žanry. I navat kali ŭ mianie niekatoryja teksty, jakija stali pieśniami, i mahli b ličycca vieršami, u knihu ja ŭsio ž taki pieravažna ŭklučyŭ inšyja tvory. Choć kniha nazyvajecca hetaksama, jak i pieršy moj albom — «Dokazatielstva dvižienija».
— Andrej, miarkujučy i pa pieśniach, i pa vieršach, teksty ŭ vas takija filazofskija, vy stvarajecie ŭražańnie čałavieka samotnaha, jaki idzie pa śviecie adzin, jon u pošuku, šmat razvažaje, vahajecca, sumniajecca. Vy nasamreč taki intravert, ci heta ŭsio ž paetyčny vobraz?
— Mnie ciažka adkazać na hetaje pytańnie. Padajecca, zvonku vidniej.
Prezentacyja knihi vybranych vieršaŭ «Dokazy ruchu» Andreja Bastunca adbudziecca 31 kastryčnika ŭ kniharni «ŁohvinaŬ» (praspekt Niezaležnaści, 37a). Pačatak a 19-j.
U imprezie voźmuć udzieł kulturolah Maksim Žbankoŭ, paetka Sabina Bryło, piśmieńnik Siarhiej Łapcevič.
Kamientary