Kniharnia.by pa tradycyi pradstaŭlaje svoj top-10 samych pradavanych knih. U hety raz jaho ŭznačalvaje pieršy zombi-chorar pa-biełarusku, jaki źjaviŭsia ŭ prodažy tolki 1 listapada, ale ŭžo paśpieŭ stać samym pradavanym. A taksama nabiraje papularnaść novaja kniha Kiryła Stasielki «Marginalis».
1. Uładzimir Sadoŭski «1813»
Navieła, apaviadańni. Pieršy zombi-chorar pa-biełarusku!
Dziejańnie navieły «1813» adbyvajecca ŭ 1813 hodzie ŭ apošnija dni zimy. U razburanaje Vialikaj vajnoj miastečka na ŭskrajku Minskaj hubierni naviedvajecca hość sa stalicy. Michał Kleafas Ahinski — dypłamat, kampazitar, a zaraz sienatar Rasijskaj Impieryi — pryjazdžaje pahaścić da svajho dziadźki ŭ familny zamak la Maładečna. Z nadychodam adlihi ŭ navakollach miastečka pačynajuć adbyvacca niezrazumiełyja rečy: zabityja žaŭniery paŭstajuć z pola minułaj bitvy i napadajuć na žycharoŭ pasielišča. Chutka zamak Ahinskich apynajecca ŭ abłozie chadziačych mierćviakoŭ. Michału Kleafasu nie zastajecca ničoha inšaha, jak znoŭ uziać u ruki zbroju i zmahacca za svabodu rodnaha kraja. Tolki hetym razam voraham buduć nie žyvyja ludzi, a paŭstałyja pačvary.
U knizie taksama źmieščany ŭ jakaści bonusa piać novych apaviadańniaŭ Uładzimira Sadoŭskaha.
2. Viktar Marcinovič «Mova»
Minsk, 4741 hod pa kitajskim kalendary. Časy Smutku skončylisia, nadyšła era ŭzvyšeńnia Sajuznaj dziaržavy Kitaja i Rasii, bieskłapotnych uciechaŭ, šopinh-relihii i cold sex'u. Adnak isnuje Niešta, čaho ŭ hetym hramadstvie sucelnaha dabrabytu nie staje jak vady i pavietra. Sientymientalny kantrabandyst Siaroža pad stracham śmiarotnaha pakarańnia ŭvozić kaštoŭny skarb z-za miažy i apynajecca pad pilnym kantrolem minskaha padpolla, uznačalenaha kitajskaj mafijaj pad kiraŭnictvam tajamničaj Ciotki. Razam jany sprabujuć złamać sistemu, u jakoj dabro i zło, aśvietniki i złačyncy, kachańnie i spažyvańnie, viernaść i zdrada pamianialisia miescami.
Ci možacie vy ŭjavić Biełaruś bieź Biełarusi? Hety raman — strašny son pra budučyniu, praduchilić jakuju možna tolki ŭ łučnaści z tym skarbam, vakoł jakoha i raspačynajecca dziejańnie hetaha linhvistyčnaha bajevika.
3. Kirył Stasielka « Marginalis»
Nasyčany i zachaplalny fiłasofski raman, dziejańnie jakoha achoplivaje bolš za čatyrysta hadoŭ, paŭtary sotni piersanažaŭ i dziasiatki krain. Heta pazł z mnostva siužetnych linij, fiłasofskich dy psichałahičnych matyvaŭ, jakija składajucca ŭ adno cełaje.
Dziejańnie ŭ ramanie razhortvajecca vakoł uładalnikaŭ staražytnaj zahadkavaj knihi. U pošukach siabie i svajho «ja» hieroi ramana prychodziać da razumieńnia, što časam nie mienšaje značeńnie maje toje, što znachodzicca na palach — pa-za centram, pa-za miežami. Pa-za miežami historyi, žyćcia, uvahi…
Raman «Marginalis» byŭ pryznany samym nasyčanym tvoram biełaruskaj litaratury. U ramanie abjomam 251 944 znaki sustrakajecca nie mienš za 136 piersanažaŭ. Rekord byŭ zafiksavany biełaruskim anałaham Knihi rekordaŭ Hinesa — prajektam «Rekordy Kufara».
4. Maks Ščur «Zaviaršyć hieštalt»
PIERAMOŽCA PREMII HIEDROJCA 2016 HODA!
«Zaviaršyć hieštalt» — dziońnik padarožža «čałavieka z fotaaparatam» u prastory i časie, z Čechii va ŭlubionuju krainu jahonaj maładości Hałandyju. Pa darozie hieroj-apaviadalnik sustrakaje ludziej z roznych krain Jeŭropy i śvietu, abmiarkoŭvaje ź imi nadzionnyja pytańni estetyki, erotyki i hieapalityki i napružana čakaje, kali ź im narešcie zdarycca niešta, što apraŭdaje jahonaje rašeńnie vyjechać za miažu — jak ciapier, tak i dvaccać hadoŭ tamu ź Biełarusi. Jon pierakanany, što hałoŭnaja sustreča jahonaha žyćcia čakaje jaho ŭ Amsterdamie.
5. Kuchmistr Vieraščaka «Litvinskaja kuchnia»
Hetaja ŭnikalnaja kniha składajecca z bajek, napisanych dobra viadomym Kuchmistram Vieraščakam dla «Našaj Nivy» i «Źviazdy» ciaham apošniaha dziesiacihodździa. Blizkaje znajomstva z «Kucharkaj Litoŭskaj», kulinarnymi realijami paemy «Pan Tadevuš», miemuarami Leona Patockaha, Jana Bułhaka, Mielchijora Vańkoviča, Michała Paŭlikoŭskaha i mnohimi inšymi tekstami XIX — pieršaj pałovy XX st. stvaraje dosyć arhaničnuju karcinu kuchni, jakuju siońnia ŭsio čaściej nazyvajuć «litvinskaj». Heta šlachieckaja i miaščanskaja kuchnia byłoha VKŁ, u niejkaj stupieni taksama — zamožnaha sialanstva.
6. Viktar Marcinovič «Sfahnum»
Troje maładych złačyncaŭ zabivajuć padzielnika i hublajuć čužyja hrošy, jakija ciapier daviadziecca viartać luboj canoj. Jany vyrašajuć zalehčy na dno ŭ maleńkaj vioscy, ratujučysia adnačasova ad kredytoraŭ i kryminalnaha vyšuku. I ŭsio pajšło b pavodle zadumy, kali b nie źniešnie paŭmiortvaja biełaruskaja vioska ź jaje nieŭmiručaj pahanskaj mistykaj, jakaja padkazvaje niečakanaje raźviazańnie prablemy. Hieroi za paŭkroku ad ščaślivaha finału, ale ci nie zarana hladzieć u nieba, kali pad nahami — bahna?
7. Alhierd Bacharevič «Biełaja mucha, zabojca mužčyn»
DRUHAJA PREMIJA HIEDROJCA 2016 HODA! Adna z najbolš papularnych knih 2016 hoda!
Novy raman Alhierda Bachareviča — historyja žanočaj bandy, «dzievak biez cara ŭ hałavie», jakija kinuli vyklik patryjarchalnamu hramadstvu. Chto jany: terarystki, varjatki, mastački? Abo prosta pryvidy minułaha, ź jakimi niečakana sustrakajecca hałoŭny hieroj knihi?
8. Alhierd Bacharevič «Dzieci Alindarki»
Hieroi našumiełaha ramana Alhierda Bachareviča — biełaruskamoŭnyja dzieci, pacyjenty zahadkavaj ustanovy pad nazvaju «Łahier». Jak sučasnyja Henzel i Hretel, jany traplajuć u ciomny les, dzie ich čakajuć zusim nie dziciačyja pryhody. Kazka, satyra, antyŭtopija — knihu možna adnieści da kožnaha z hetych žanraŭ, ale jana ŭsio roŭna zastajecca knihaj pra nas, tych, chto žyvie tut i ciapier.
Hety raman A. Bachareviča ŭhanaravany pieršaj premijaj «Kniha hodu» i treciaj premijaj Hiedrojca ŭ 2015 hodzie. Nieŭzabavie ŭ Francyi vyjdzie jaho pierakład na francuzskuju movu.
9. Ludmiła Rubleŭskaja «Avantury Pranciša Vyrviča, zdradnika i kanfiederata»
U čaćviortaj knizie avanturna-pryhodnickaha cykłu Ludmiły Rubleŭskaj zahonny šlachciuk Pranciš Vyrvič i połacki doktar Baŭtramiej Lodnik znoŭ vypraŭlajucca ŭ pryhody. Na hety raz jany traplajuć u Francyju, dzie Lodnik pracuje razam ź viadomym navukoŭcam Žanam Žylibieram. Na hety raz Lodnika ŭciahvajuć u tajemnaje tavarystva, što zajmajecca złačynnymi apieracyjami na ludziach. Prancišu Vyrviču daviadziecca ryzyknuć žyćciom, kab vyzvalić starejšaha siabra. A pa viartańni na radzimu — novyja pryhody… Tut adbyvajecca mahnackaje paŭstańnie suprać karala Stanisłava Paniatoŭskaha, i hieroi apynajucca niby pamiž žornami, ich pierakidvaje to na adzin bok palityčnych siłaŭ, to na druhi. Daviadziecca sustrecca ź jehipieckaj pryncesaj i karonaj śviatoha Alfreda, płavać u vadzianym źmiei ŭ padziemnych aziorach pad Turavam, razhadvać tajamnicu šlema arabskaha lekara Albukasisa… Vas zachopiać cudoŭnaja mova i aŭtarski humar, nievierahodnyja pavaroty siužetu, zachaplajučaja atmaśfiera stahodździa płašča i kinžału, sapraŭdnyja tajamnicy biełaruskaj historyi.
10. Ludmiła Rubleŭskaja «Avantury studyjozusa Vyrviča»
Heta druhaja kniha, jakaja raskazvaje pra pryhody ŭ 18 stahodździ byłoha škalara Mienskaha jezuickaha kalehijumu, maładoha šlachcica Pranciša Vyrviča i doktara Baŭtramieja Lodnika z Połacku. Ciapier Pranciš staŭ studentam Vilenskaj akademii, a doktar Lodnik, były słuha Pranciša, jaki zdabyŭ sabie šlachiectva na poli bojki — surovym prafiesaram hetaj akademii. Abodvum lićvinam daviadziecca vypraŭlacca ŭ niebiaśpiečnuju vandroŭku ažno ŭ Anhielščynu, praz usiu Jeŭropu, ažyŭlać lalku-aŭtamat pa imieni Pandora, zabivać sapraŭdnaha cmoka, uciakać ad čumy, zarablać hrošy ŭ łondanskim bajcoŭskim kłubie i vybłytvacca z mahnackich intryhaŭ vakoł trona Rečy Paspalitaj…
Kamientary