Pieršyja rasparadžeńni Donalda Trampa na pasadzie prezidenta

Prezident ZŠA Donald Tramp padpisaŭ ukaz, jaki pradpisvaje ŭstanovam «źnizić rehulavańnie» ŭ čakańni admieny uviedzienaj 6 hadoŭ tamu sistemy achovy zdaroŭja (viadomaj jak «Abamaker»). Jon taksama nakiravaŭ u Sienat prapanovy pryznačeńniaŭ na pasady ŭ svajoj administracyi, paviedamlaje VVS.

Pavialičyć

Donald Tramp u adpaviednaści sa svaimi pieradvybarčymi abiacańniami maje namier jak maha chutčej admianić praviedzienuju papiarednim kiraŭnikom dziaržavy Barakam Abamam reformu, jakaja vyklikała masu sprečak.

Reforma achovy zdaroŭja 2010 hoda, jakaja atrymała niefarmalnuju nazvu «Abamaker» (Obamacare), praduhledžvaje subsidyi małamajomasnym na miedycynskuju strachoŭku.

Dziakujučy hetaj reformie ciapier miedycynskaj strachoŭkaj vałodajuć na 20 młn amierykancaŭ bolš. U vyniku, kali da reformy strachoŭku mieli kala 85% ź ich, to ciapier joju achoplenyja prykładna 91% žycharoŭ ZŠA.

Bolšaść uładalnikaŭ novaj strachoŭki atrymlivaje datacyi ad dziaržavy. Kab dziaržbiudžet moh sabie heta dazvolić, «Abamaker» abaviazvaje ŭsich amierykancaŭ zavieści sabie miedstrachoŭku — u advarotnym vypadku jany płaciać štraf, jaki składaje ciapier u siarednim 995 dalaraŭ u hod.

Zakon byŭ pryniaty ŭ 2010 hodzie tolki demakratami, jakija ŭ toj čas kantralavali kanhres. Zatym respublikancy, damohšysia bolšaści ŭ pałacie pradstaŭnikoŭ, a potym i ŭ sienacie, dziasiatki razoŭ hałasavali za admienu zakona, ale nie mahli pieraadoleć vieta prezidenta.

U chodzie vybarčaj kampanii Tramp nieadnarazova abiacaŭ u pieršyja ž dni paśla ŭstupleńnia ŭ pasadu admianić «Abamaker».

Pakul Tramp tak i nie prapanavaŭ alternatyvy niepapularnamu siarod respublikancaŭ zakonu.

Paśla asabistaj sustrečy z Barakam Abamam Tramp zajaviŭ, što hatovy zachavać niekatoryja elemienty sistemy miedycynskaha strachavańnia.

Novaja administracyja

Adrazu ž paśla ŭstupleńnia na pasadu prezidenta Donald Tramp nakiravaŭ u Sienat prapanovy pa pryznačeńniach na pasady ŭ svajoj administracyi.

U śpisie taksama ŭtrymlivajucca prapanovy pa pryznačeńniach ambasadara ZŠA ŭ AAN, pradstaŭnika ŭ Radzie biaśpieki, nadzvyčajnaha i paŭnamocnaha pasła ŭ KNR, pradstaŭnikoŭ u bujnych mižnarodnych finansavych instytutach.

Raniej stała viadoma, što Sienat zaćvierdziŭ kandydaturu Džejmsa Mecisa na pasadzie ministra abarony ZŠA.

Kandydaturu hienierała padtrymali 98 sienataraŭ, tolki sienatar Kirsten Džylibrend vykazałasia suprać.

Džejms Mecis — pieršy kadravy vajskoviec na čale Pientahona bolš čym za paŭstahodździa.

U dadzieny momant amierykanskaje zakanadaŭstva zabaraniaje vajskoŭcam, jakija prabyli ŭ adstaŭcy mienš za siem hadoŭ, uznačalvać ministerstva abarony, adnak sa zhody Kanhresu moža być zroblenaje vyklučeńnie.

• 0
• 0
• 0
• 0
• 0
• 0
• 0
• 0