Až 600 miljonaŭ dalaraŭ za «BieST»

Najbujniejšy turecki aperatar sotavaj suviazi kampanija Turkcell nabyvaje 80 % akcyj ZAT «Biełaruskaja sietka telekamunikacyj» («BieST»). Sa słovaŭ dyrektara «Turksieł Ilecišym Chiźmietlery A.Š.», ź «BieSTu» chočuć zrabić «adnu z najlepšych kampanij śvietu».

Jašče 20 % akcyj zastajucca za biełaruskim bokam. Adpaviedny dahavor padpisany 29 lipienia ŭ Miensku va ŭradzie Biełarusi pamiž Dziaržaŭnym kamitetam pa majomaści jak pradaŭcom, «Biełteł Telekamunikaśjon Chiźmietlery A.Š.» u jakaści pakupnika i «Turksieł Ilecišym Chiźmietlery A.Š.» u jakaści haranta.

Pavodle infarmacyi aficyjnych krynicaŭ, umovy zaklučanaj ździełki praduhledžvajuć, što apłata pravodzicca ŭ try etapy: 300 młn. dalaraŭ budzie vypłačana na datu zaviaršeńnia ździełki, jakaja nadydzie paśla zakančeńnia 30 dzion z daty padpisańnia pahadnieńnia, a dadatkovyja płaciažy pa 100 młn. dalaraŭ buduć praviedzieny adpaviedna 31 śniežnia 2009 i 2010 hadoŭ. Jašče adzin płaciež u pamiery 100 młn. dalaraŭ budzie zrobleny paśla atrymańnia kampanijaj «BieST» stanoŭčaha hadavoha dachodu.

U interviju prahramie «Panarama» Pieršaha nacyjanalnaha kanała staršynia Dziaržaŭnaha vajenna-pramysłovaha kamiteta Biełarusi Mikałaj Azamataŭ (u padparadkavańni DVPK znachodzicca adzin z zasnavalnikaŭ «BieST» — NDI srodkaŭ aŭtamatyzacyi DNVA «Ahat»), kamentujučy padpisany dahavor, paviedamiŭ, što ŭ sukupnaści biełaruski bok za 80% akcyj ZAT «BieST» atrymaje 600 młn. dalaraŭ. Heta značyć, zaznačyŭ jon, ciapierašniaja cana «BieST» — 750 młn. dalaraŭ. Aprača taho, pavodle jaho słoŭ, «Turkseł» maje namier dadatkova investavać 400 młn. dalaraŭ u raźvićcio sietki.

Ministr suviazi i infarmatyzacyi Mikałaj Pancialej pa vynikach ździełki ŭ hutarcy z žurnalistami zaznačyŭ, što rynak mabilnaj suviazi ŭ krainie ŭžo amal padzieleny, ale resurs kala 1 młn. abanentaŭ jašče jość. «Ale samaje hałoŭnaje — jość novyja technalohii, treciaha pakaleńnia, na padychodzie technalohii čaćviortaha pakaleńnia. Ja dumaju, što baraćba pavinna być nie za adciahvańnie abanentaŭ ad adnoj kampanii da druhoj, a za košt naroščvańnia abjomaŭ vyručki, vykarystańnia najnoŭšych technalohij, servisaŭ. Minsuviazi ŭ stanie rehulavać rynak takim čynam, kab usie kampanii na biełaruskim rynku raźvivalisia ŭ roŭnaj kankurentnaj baraćbie i kab biznes byŭ paśpiachovym», — patłumačyŭ ministar.

Hiendyrektar «Turkseła» Mechmet Siuraja Džyliŭ padkreśliŭ: «My pryjšli ŭ Biełaruś dla taho, kab investavać, my pryjšli jak dobryja partnery i ličym, što respublika maje dastatkova vysoki patencyjał raźvićcia jak u sfery ekanomiki, hetak i ŭ technalohijach. Aprača taho, biełaruskija specyjalisty vałodajuć vysokim intelektualnym patencyjałam. Z ulikam hetaha my chacieli b zrabić z «BieSTa» adnu z samych lepšych kampanij śvietu».

ZAT «BieST» zarehistravana 5 listapada 2004 hoda. Zasnavalnikami vystupili NDISA DNVA «Ahat» i RUP «Biełtelekam» z dalami ŭ statutnym fondzie 75 % i 25 % adpaviedna. U lipieni 2006 hoda aperatar atrymaŭ kitajski kredyt dla stvareńnia infrastruktury ŭ pamiery 234 młn. dalaraŭ. Jaho viartańnie pačniecca ŭ 2009 hodzie i budzie doŭžycca da 2014 hoda.

Pa vynikach 2007 hoda abanenckaja baza ZAT «BieST» skłała 181,6 tys., ź ich 119,6 tys. padklučylisia letaś. Na 1 lipienia 2008 hoda abanenckaja baza składała 187 tys. čałaviek. U studzieni—červieni 2008 hoda aperatar padklučyŭ tolki 5,1 tysiačy novych abanentaŭ. Sietka «BieST» pakryvaje 26,3 % terytoryi Biełarusi, na jakoj žyvuć 68,6 % nasielnictva. U sietcy dziejničajuć 438 bazavych stancyj.

Turkcell źjaŭlajecca lidzirujučym GSM-aperataram Turcyi, naličvaje 35 młn. abanentaŭ i zajmaje 57% rynku. Kampanija maje dolu ŭ GSM-aperatarach Azerbajdžana, Hruzii, Kazachstana, Małdovy, Paŭnočnaha Kipra, Ukrainy.

• 0
• 0
• 0
• 0
• 0
• 0
• 0
• 0